السلام عليكم ورحمة الله وبركاته
ازيك يا فتوكاتي الغاليين انا قررت باذن الله ابدا رجيم المرضعات لغادة الصايغ من الاول الشهر الجاي يوم السبت 1/5/2016
اللي تحب تشترك معايا تسجل بياناتها
الاسم:
الوزن الحالى:
الوزن قبل الحمل :
الوزن المستهدف:
الطول:
السن:
عمر البيبي:
ان شاء الله هنكون جروب من 20 عضوة كل 10 فريق يعني هنكون فريقين عشان نتشجع اكتر
اول تسعة هيشتركوا هنكون فريق واحد والعشرة الباقيين يكونوا الفريق التاني ويشوفوا يحبوا من تكون القائدة بتاعتهم
الرجاء الاتي:
عدم كتابة اي عضوة بياناتها الا في حالة الجدية التامة
يوميا تسجل ولو كلمة بسيطة في الموضوع مثلا مواظبة — غير مواظبة في ( الفطار او الغداء او العشاء ) —باظ اليوم كله اي حاجة تتابعنا بيها على الاقل لو مش هتقدر العضوة تسجل يوميا تسجل في ورقة حالةكل وجبة وتبقى تكتبهم مرة واحدة مثلا السبت الفطار الغدا العشا مظبوط الاحد الفطار مظبوط الغدا باظ العشا مظبوط وهكذا…….. دا مهم جدا لان كل فريق هيكون ليه 700 نقطة متقسمة على عدد الايام والعضوات
كالاتي:
420 نقطة للوجبات:
14يوم * 10 عضوات * تلات وجبات يوميا =420
الوجبات كل وجبة بنقطة والوجبة اللي هتبوظ هتخسر الفريق نقطة وكل فريق بقى وشطارته
ملحوظة لو عضوة مثلا مشيت كل الوجبات مظبوطة بس كلت مثلا حلويات او ايس كريم برده هيتخصم منها نقطة وجبة في اليوم
280 نقطة للرياضة :
14 يوم *10 اعضاء* مرتين رياضة كل مرة تساوي نصف ساعة=280
مثلا اللي هتمشي نص ساعة هتاخد نقطة واحدة اللي هتمشي ساعة هتاخد نقطتين اللي هتمشي نص ساعة وتعمل تمارين نص ساعة برده نقطتين اقل من نص ساعة مش هنحسب نقط خالص
الاجمالى 700 نقطة
كل اسبوعين هناخد يوم فري
ملحوظة اول اسبوع مش هنحسب نقاط الرياضة لان المفروض نبدا فيها بالتدريج عشان كده هنحسب نقاط الوجبات فقط ومن تاني اسبوع هنحسب نقاط الرياضة والوجبات يعني اول اسبوعين نقاط الوجبات 420 والرياضة اول اسبوع لا يوجد نقاط للرياضة والاسبوع التاني 140 نقطة للرياضة يبقى الاجمالى 560 نقطة ودا لاول اسبوعين فقططططط
مهم جدا نلتزم بالايام هبتدي امتى وهناخد فري امتى وهكذا عشان منتلخبطش
رجاء اللي حياتها مش مستقرة يعني هتسافر بعد كام يوم او بيجيلها ضيوف كتير او مش هتقدر تلتزم بالايام لظروف خاصة بيها تتابع المسابقة من غير ما تشترك عشان متاثرش على اعضاء الفريق الباقيين
العضوة اللي هيعدي اسبوعين ومش هتكتب اي تقارير هنلغي اشتراكها من الفريق
الرياضة مش هنحدد رياضة معينة طبعا يفضل المشي بس كل واحدة تمارس الرياضة اللي تحبها انا مثلا صعب امشي عشان بنوتي مش بعرف اسيبها لاي حد لزقة في كل حتة حتى الشغل ومش بقدر امشي بيها في الجو المتقلب دا بس عندي اوربتراك هعمل عليه باذن الله احتمال اجيب النطاطة(ترامبولين) عشان مقدرش انط الحبل على جيراني اللى تحت البيت يقع المهم ريااااااااضة
رجاء اخير عدم تحويل الموضوع لنوع من الشات فقط كتابة تقرير او استفسار نحاول الاجابة عليه غير كده لا
القائدة هيكون دورها الاتي متابعة عضوات فريقها وفي نهاية كل اسبوعين تسجل تقرير شامل بحالة كل عضوة وتجميع نقاط فريقها
وطبعا دا كله عشان نتشجع اكتر ويكون في حماس اكتر
والرجيم كالاتى :
المشاركة الأصلية كتبت بواسطة غاده الصايغ 
السلام عليكم ورحمة الله وبركاته
رجيم المرضعات
الافطار
كوب لبن محلاه بملعقة عسل ابيض صغيره + 2 بيضة مسلوقة او اومليت ب ملعقة صغيره زيت زيتون او ذرة + ربع رغيف عيش بلدي + طبق سلاطة كبير
بين الفطار والغدا يا اما كوب عصير فاكهه ( ثمرة واحده والباقي ماء او ماء ولبن ) محلاه بملعقة صغيره عسل ابيض
او ثمرة فاكهه ماعدا المانجو البلح والتين والعنب والقصب
الغداء
طبق سلاطة كبير + طبق خضار كبير ني × ني + نصف فرخة او 2 قطعة لحمة او سمكة كبيره مسلوق او مشوي + ربع رغيف
بين الغدا والعشاء
يا اما كوب عصير فاكهه ( ثمرة واحده والباقي ماء او ماء ولبن ) محلاه بملعقة صغيره عسل ابيض
او ثمرة فاكهه ماعدا المانجو البلح والتين والعنب والقصب
العشاء مثل الفطار
التعليمات :-
1-دا لو مشيتي عليه تمام تخسي في الشهر من 6 الي 8 كيلو
2- المشي ابتدي ب 10 دقائق وكل يوم زودي
علي ال10 دقائق 10 دقائق تاني
وهكذا لحد ماتوصلي لساعة في اليوم
( في حالة الولاده القيصيري في اول 6 شهور مشي فقط )
من دون اي ريا ضة اخري 3-لو محتاجة سكر زياده في شاي او اي مشروبات
يبقي سكر الفاكهه او دايت سويت من الصيداليه
سكر الفاكهة الملعقة منه او الكيس فيه 16 سعر
فخليكي حذره متخديش اكتر من 3 او 4 اكياس او ملاعق بالكتير
4-المايه طبعا شئ مفروغ منه مش اقل 2 لتر في اليوم
قبل كل وجبه ب10 دقائق اساسي 2 كوب مايه
5-لو تحبي تبدلي العشاء
ب4 ثمرات فاكهه من المسموحة + كوب لبناو كوب زبادي ( خالي الدسم )
6-مسليات حلويات لاهتفيدك ولا هتفيد البيبي في الرضاعة
بالعكس هتسمنك وهتجبله مغص وانتفاخ
7-النشويات بردوا الزياده منها بتأدي لنفس النتيجة
8- المشروب السحري مفيد جدا لادرار اللبن وهايل جدا لتسريع الحرق
مكون من نسب متساويه من
( الشاي الاخضر – الجنزبيل – الكمون – الشمر – نعناع – روز ماري – ينسون )
بطحنو مع بعض وتحطهم في برطمان وتاخدي ملعقة صغيره
من الخليط وتصبي عليهم المايه المغليه وتغطيهم
وقبل ما تشربي نحط عليه نصف ليمونه
3 مرات في اليوم قبل الافطار بربع ساعة
قبل الغدا بربع ساعة قبل النوم مباشر
9-مهم اوي بقي تجيبي فيتامين ( هيما كابس او هيمسي )
لصحتك وللرضاعه هايل خالص انا شخصيا كنت بستخدمه
موفقين ان شاء الله
معلش يا جماعة انا رغيت كتير عشان اكون موضحة كل حاجة واى استفسار انا تحت امركم
والفريق اللي هيكسب ليه
أم حبيبة 2024 أم حبيبة 2024 114027_4.gif سوبر فتكات Fatakat 114027 العاشر من رمضان – مصر