السلام عليكم يا فتوكاتى
عاملين ايه
طبعا الايام ده موسم الزيتون ولسه موجود فى السوق
انا هعملهلكم بطريقه سهله اووى وسريعه
ومرضتش انزلها الا لما استوى واتأكدت من النتيجه وهتشوفوا بنفسكم
طبعا احنا عارفين ان فى زيتون تفاحى وده بيبقى زى التفاحه بالضبط بس صغير
وفى تفاحى جامبو بيبقى تخين اووى
والعزيزى يببقى طويل شويه
ومعروف برضه ان العزيزى بياخد شهور فى التخليل
وناس بتنقعه وتغير المايه وحاجات كتير كده
بس انهارده انا عملته بكل سهوله والتيجه بجد مبهرة زى الجاهز
الى بيتباع اسمه زيتون بالخلطه
المهم نبدأ بالمقادير
2 كيلو زيتون عزيزى
عصير كيلو وربع ليمون وهنحتاج القشر بتاعه (هيتعصر بالايد)
2 كيس ملح وزنهم نص كيلو
كيلو فلفل اخضر حامى
3 معالق توم
للخلطه ( نص كيلو فلفل احمر حامى ونص كيلو جزر و3 معالق حبه البركه و3 معالق عصفر)
ازازة خل كامله
زيت للوش
ملحوظه
النقع ملوش اى لازمه انا قبل كده جربت نقعته وجربت بعديها منقعتوش الاتنين نفس النتيجه
والى يثبت لك ان النقع ملوش اى تأثير لو دوقتى طعم المايه الى اتنقع فيها الزيتون هتلاقيها عاديه مش مرة ولا حاجه
وده بيدل طبعا ان المراره مش بتنزل فى المايه
( الملح مش كتير ومش هيطلع حادق معاكى خالص الملح ده الى هيضيع مرارة الزيتون والباقى هيملحه بالملح المقبول المظبوط
وكذلك الخل هو الى هيسويه سريعا وبرضه هيضيع المرارة ومش هتحسى بطعم لاذع بعد السوا ولا حاجه
ولا هيتهرى الزيتون ولا حاجه
وانا طبعا بقلكم كده وانا عملاه وواكله نصه وعملاه عند ماما كمان يعنى مرتين بنفس المقادير والطريقه )
الطريقة
هنغسل الزيتون كويس بالمايه ونعمله شقوق بالسكينه كده
من الاربع جهات
هنفرم مقادير الخلطه الفلفل الاحمر والجزر فى الكبه ونضيف عليهم حبه البركه والعصفر والتوم
هنخلط الزيتون مع مقادير الخلطه ونضيف الفلفل الاخضر بس حاسبى على ايدك لانه مولع بجوانتى او باى مغرفه كبيرة
هنعصر الليمون وهنخلط عليه الخل والملح ونقلبه كويس
وهو ده السائل بتاعنا مش هنحط مايه خالص
نبتدى نعبى البرطمان كويس ونسيب ربعه فاضى من فوق
نكبس الزيتون كويس فى البرطمان ونغطى بالقشر كويس اووى
لغايه ما نلاقى مفيش مكان باين فى الزيتون
هياخد قشر كتير وده المطلوب لان لو دخله هواء ده الاى بيسبب الريم الابيض
الى ناس كتير بتشتكى منه فى المخللات ونحط على وشه زيت كتير
شايفين شكله حلو ازاى
ونغطى بكيس نظيف ونقفل كويس
اول 5 ايام تحطوا حاجه يالا بنات تحت البرطمان لانه بيسيل وممكن يبهدلك الدنيا حتى وهو مقفول لان طبعا المكونات
بتتفاعل مع بعضها ومع القفل هتلاقى فوران جامد اووى بعد كده بيبقى عادى
هتسبييه حوالى من 3 اسابيع لشهر
انا عملته يوم 13 |9 وفتحت عليه يوم 3|10 يوم الوقفه كان مستوى وتمام
يعنى نقول سيبوه شهر وافتحوا عليه هيبقى ممتاز ان شاء الله
ولغايه دلوقتى عندى طعمه بيبقى احلى واحلى طبعا
ولا مهرى ولا حادق
ولا فى ريم فى البرطمان ولا الهواء
لانه اتعزل كويس فى الاول عن الهواء
وده شكله
من قريب
شايفين اللون والشكل
اقرب
وبس كده يا رب يكون عجبكم يا قممرات وتجربوه ومتخافوش على ضمانتى
وده احلى بسكويت بالجبنه للى هينورونى ويقيموا
مواضيع هذا القسم برعاية
شروق الشمس 2024 شروق الشمس 2024 282785_28.gif ربنا يشفيكى يا أمى Fatakat 282785 مع جوزى – فى بيتى