بسم الله الرحمن الرحيم
فى البداية بس عاوزة اقول كلمتين
انا كتبت موضوع انى خسيت 15 كيلو وبعدها بناء على رغبة البنات عملت جروب والحمدلله وصلنا للجزء الـ 3 عاوزة اوضح توضيح بسيط انى اقسم بالله بكتب كل دة عشان اللى نفسها تخس وشايفة الموضوع صعب تشوف ان فى غيرها بيخس عادى جدا وتتشجع وتبدأ وربنا اعلم باللى اقصدة (دى اول كلمة معلش كلمة طويلة حبتين )
تانى كلمة بقى : الموضوع دة اهداء لجروبى بكل البنات اللى فية عشان هما يستاهلوا اكتر من كدة ربنا يكرمهم ويباركلهم يارب
ندخل فى المفيد بقى وركزى كدة معايا عشان الموضوع طويل شوية بس ان شاء الله مش هنخرج منة غير واحنا مقررين نخس وعندنا ارادة قوية كمان
لو بتعرفى تخسى يبقى انتى عديتى اكتر من نص المرحلة
اما لو مش عندك ارادة ومش عارفة تخسى اعمليلك كوباية شاى متينة كدة بس بسكر دايت لحسن راح تدعوا عليا بعدين اصل الموضوع طويل حبتين
نبدأ بسم الله وبالصلاة على حبيبنا محمد علية افضل الصلاة واتم التسليم
عشان نبدأ على مية بيضة قومى كدة اقفى قدام المراية وشوفى شكلك عامل ازاى؟؟؟
تخينة..؟ مليانة..؟ جسمك زايد حاجة بسيطة..؟
طب اما بتبصى فى المراية بتقررى اية؟ بتقررى تخسى؟ ااااااااااااااااااة هو انا ورايا حاجة غير الرجيمات وقرفها
طب عاوزة تخسى قد اية؟؟
انا نفسى اخس 10 كيلو بس مش عارفة
طب وانتى؟
انا بقى نفسى اخس يجى 50 كيلو بس كتير اوى وعمرى ماهعرف انا اصلا من اول يوم ببوظ الدايت ولو كملت يبقى اسبوع بالكتير وبمل
بصوا بقى يابنات ولا 10 كيلو ولا 50 كيلو كتير والله ماكتير خالص
ماتبرقوليش كدة بس
انتى لو عندك ارادة هتخسى وهنعرف مع بعض ازاى
طبعا الاكل نقطة ضعفنا كلنا
بس انتى متخيلة انك مابتبقيش مبسوطة غير بس فى اللحظة اللى بتاكلى فيها اصل اللى بعدها بتكون لحظة تأنيب ضمير
الاكل دة طوعم ايوووووووووووون طوعم اتحدفلك من نفسك الامارة بالسوء اللى عاوزة تضيع اللى بتعملية
طب وهى بتعمل معاكى كدة لية عمرك فكرتى لية نفسك بتتحداكى اول مابتفكرى تعملى دايت؟
ببساطة عشان انتى اللى بتتحديها يعنى انتى اللى بدأتى
عارفة بدأتى ازاى؟
بدأتى بانك حرمتيها من كل حاجة بتحبها
والصراحة انتى اللى غلطانة ازاى يعنى عاوزة تحرميها من الحبيب الغالى وتسكتلك هههههههههه
يبقى لازم لازم تصاحبيها قبل ماتفكرى تعملى دايت تسيبى يوم كامل تهيأى نفسك للدايت
والله دة مش تخريف
انتى مثلا ناوية تبدأى بكرة دايت يبقى النهاردة مع نفسك كدة هتقعدوا انتوا الاتنين وتفكروا سوا وتقفوا مع بعض مش ضد بعض
بمعنى هتقفى قدام المراية وهتبصى على نفسك بس ماتتكلميش سيبى احساسك هو اللى يعبر متضايقة؟ مبسوطة؟ شايفة نفسك حلوة؟ شايفة نفسك وحشة؟
لو وصلك احساس انك مش راضية عن نفسك يبقى كدة نبدأ الشغل اما لو حسيتى انك راضية عن نفسك حتى لو كنتى تخينة بس احساسك انك حلوة كدة يبقى عمرك ماهتعرفى تخسى عشان مفيش عندك قناعة داخلية يبقى تنسى فكرة الدايت دلوقتى وروحى يوم تانى قدام المراية يوم ماتحسى نفسك مش حلوة كدة ومحتاجة تخسى يبقى عندك قناعة داخلية انك تخسى وبكدة نفسك هتبقى فى صفك عشان هى كمان شافت دة
طيب خلاص انا وقفت قدام المراية وقررت اخس بس بكرة الاربعاء وانا هبدأ من السبت ان شاء الله
لو انتى ونفسك راضيين وموافقين ابدأى يوم السبت اما لو انتى قررتى تبدأى السبت بس نفسك بعد اما شافت روحها فى المراية تخينة قررت تبدأ من بكرة طبعا هى مش هتقولك كدة
بس انتى هتحسى ان ضميرك مأنبك وبيقولك هتستنى كل دة لية لية لييييييييييية
وقتها لازم تتفاهموا مع بعض وتتفقوا على يوم
خلاص اتفقتوا على السبت
مش معنى ان لسة فى 3 ايام على يوم السبت انى اكل 15 وجبة فى اليوم وفى النهاية بدل اما تبدأى دايت بوزن 100 كيلو هتبدأى بـ 105
دة اكبر غلط اومال اية الصح يا ريتا؟؟
الصح انك تستغلى الايام دى فى صالحك
ازاى ابدأ رجيم يعنى؟؟ لا مش هتبدأى بس هتعملى التالى
بدل اما بتفطرى برغيفين هتفطرى برغيف ونص وبدل مابتتغدى بطبقين رز هتتغدى بطبق ونص وبدل مابتتعشى بـ 5 ارغفة فينو خليهم 4 وتانى يوم قللى حاجة بسيطة وتالت يوم قللى حاجة بسيطة تانى
اية بقى اللى عملناة دة؟؟ جهزنا المعدة وعرفناها اللى هيحصل بس مش فاجأناها احنا مهدنالها الموضوع
يوم الاربعاء عدى ويوم الخميس عدى ويوم الجمعة عدى وجة يوم السبت
طبعا احنا كنا محضرين الدايت اللى هنمشى علية الاسبوع دة
صحينا الصبح استعنا بالله وبدأنا يومنا بالنظام اللى كتبناة
فطرت قبل اما اولادى يصحوا وجوزى او قبل اما اخواتى وماما وبابا يصحوا وتمام كدة سلقتلى بيضة وكلتها
واما صحيوا جهزتلهم الفطار هتلاحظى اية؟
هتلاحظى ان لقمة العيش الفاضى مش قادرة تحرمى نفسك منها وهتموتى عليها او حتة الجبنة او لحسة فول او قرص طعمية
طب هنرجع لنقطة كدة بسيطة معلش سامحونى
قبل الدايت اما كنتى بتملى المعدة الملية المعتبرة وواكلة وكلة تمام وجة بالليل بابا جاب كفتة مشوية ولا فراخ ولا اى حاجة بتبقى هتموتى عليها زى مابتكونى عاملة دايت؟
طب ابسط حاجة انتى ممكن يوم تفطرى فينو وتتغدى رز وتتعشى جاتوة وكيك يعنى اليوم كلة مفيهوش عيش خالص بس مع ذلك مش بتضعفى قدامة
يعنى ببساطة النظام اللى بتعملية هو السبب فى كل دة
خسى ببطئ وصحة افضل مليون مرة من انك تخسى بسرعة وبمرض ربنا يعافينا
يعنى متجيش واحدة تقولى عاملة دايت معرفش اية والنهاردة يوم اللبن
عاوزة تقنعينى انك هتقضى اليوم كلة من اولة لاخرة لبن وهتكملى؟ اة اللين مفيد.. لكن الجسم خد عنصر واحد بس بس بس من الحاجات الكتير اللى محتاجها ودة هسيبب الملل دة غير الاكتئاب
بس انا ونفسى اتفقنا على كدة؟ لا انتى ونفسك اتفقتوا انكوا هتخسوا ماتفقتوش انك هتجنى عليها وتضيعيها
هى هتسمعلك وتسمع كلامك بس فى اللى تقدر علية اللى مش هتقدر علية هتطلع عينك فية لحد ماتكرهى اصلا فكرة الدايت
يبقى لية بقى من الاول ماتمشيهاش على نظام صحى وتقدر تستمر علية
طب واحدة تانية بقى حلوة وامورة وماشية بنظام حلو مش حارمة نفسها فية من اى حاجة يعنى بتاكل نشويات وبروتينات وخضروات بس اكيد الدايت فية ممنوع ومسموح وجت صعفت قدام حاجة حلوة
مش عاوزاكى عاملة زى سورى فى اللفظ صندوق الزبالة اى حاجة تترمى فية حلوة وحشة مفيدة ضارة اى حاجة المهم انك تملى المعدة وخلاص
لا لازم تتغيرى لازم كل حاجة تاكليها تعرفى طعمها مش ترمى وخلاص
شوفوا كارتون لينجوينى عارفين الفار ريمى؟؟ اهو فار بس عجبنى طريقة اكلة اوى كان بياكل اكتر من نوع وبيحاول يستطعم كل مكوناتة
الله لو نبقى كدة دة احنا بنى ادمين ربنا مدينا حاسة اسمها التذوق عشان ناكل ونعرف طعم اللى بناكلة ونركز فية
طيب فى مشكلة تانية بتقابلنا انى بعد اما اكل بحس انى عاوزة اكل تانى النص رغيف دة مش مكفينى
لو اكلك غلط يعنى ماشية بنظام كيميائى هتعاطف معاكى
اما لو ماشية بنظام صحى هقولك على فكرة
واحنا فى رمضان ونمتى بعد صلاة التراويح وراحت عليكى نومة وصحيتى متأخر يعنى قبل الفجر بـ 5 دقايق
هتعملى اية؟
ممكن ماتتسحريش ..ولو جعانة
هتقولى ياخبر ابيض لسة 5 دقايق الحق اكل اى حاجة بسرعة
على اما صحيتى وقومتى من السرير ووصلتى للتلاجة وطلعتى طبق الجبنة وطلعتى عيش عدى 4 دقايق ولسة دقيقة وقعدتى تاكلى بسرعة بسرعة وكلتى ربع رغيف بس الفجر أذن ولسة جعانة او الاكل كان طعمة حلو او كان فى زيتونة هتموتى عليها
هتعملى اية والفجر أذن خلاص
هتاكلى ولا هتمنعى اكل؟ لا طبعا مستحيل اكل دة انا لو بموت خلاص مش هدوق حاجة دة الفجر اذن
الله طب مانتى حلوة وشغالة اهو اومال ركنينك لية ههههههههههه
يعنى انتى عندك ارادة اهو بتعرفى تتحكمى فى نفسك لية مش بنعمل كدة فى الدايت؟؟
اصل انا بحب الجاتوة اوى بس الدكتور قالى انة من الممنوعات وانا بضعف قدامة
طب تخيلى معايا تانى انك لاقدر الله والف بعد الشر عنك تعبانة اى تعب ما مثلا عندك دور برد بس شديد حبة والدكتور مانعنى من الرنجة مع انى بموت فيها وفجأة الاقى رنجة فى طريقى وهموت واخد حتة هتاكليها وتتعبى نفسك اكتر ولا هتمسكى نفسك واهى موجودة واما تخفى تاكلى منها براحتك؟ همسك نفسى طبعا كلة الا صحتى
الله طب مانتى حلوووووووووووة اهو اومال اية بقى
باختصار لازم نتحكم فى نفسنا لاننا اصلا بنعرف والامثلة قدامك اهى (اللى مش بيعرف يتحكم فى نفسة عمرة مايكون انسان)
طب ممكن ناخد حتة كدة تأنيب ضمير على الماشى
كام مرة سمعتى كلمة ياعجلة .. كام مرة سمعتى يا تخينة .. كام مرة سمعتى انتى مش هتخسى بقى .. كام مرة سمعتى كلمة شايفة الجسم .. كام مرة سمعتى انا كان نفسى مراتى تبقى رفيعة .. طبعا الامثلة كتير وكل واحدة عندها كلمة جاية على الجرح
احنا اتفقنا انك عندك ارادة تتحكمى فى نفسك بس فى الاوقات اللى بتكونى عاوزة تتحكمى فى نفسك
طب اما انتى وهى وهى وانا عندنا ارادة لية نستنى نسمع كلمة زى دى من حد وتوجعنا وتنيمنا معيطين؟؟
اصل انا عاوزة اخس كتير يجى 50 كيلو ومحتاجة سنة عشان اخسهم بالنظام اللى بتقولى علية دة
ومالة ياحبيبتى ماتخسى فى سنة ولا حتى 2 اية المشكلة انتى عارفة اصلا انك لو 100 كيلو ومشيتى بنظام صحى ومثلا اول اسبوع خسيتى 3 كيلو وتانى اسبوع 2 وتالت اسبوع 1 ونص ورابع اسبوع 1 ونص يعنى 8 كيلو فى الشهر يعنى بقيتى 92 متخيلة دة هيغير شكلك ازاى؟
طب ماهو يافالحة اما اعملة تانى هلاقى وزنى ثابت ومش هخس
اية المشكلة طب مانا ياما ثبت وزنى اكسرى النظام يومين وفى اليومين دول دورى على نظام تانى بس يكون صحى برضو ولو خلاص مش عارفة خالص تابعى مع دكتور كويس وامشى على نظامة بالحرف مش صعب يابنات والله انى اشوف الورقة اللى فى ايدى لاقيت مثلا الفطار نص رغيف او او او او + بيضة او او او او
اية المشكلة انى افطر بيضة النهاردة بالنص رغيف وبكرة اغير وافطر حاجة تانية وانوع عشان مازهقش وكذلك فى الغدا والعشا
فى ضهر ورقة الدايت اعمل جدول بايام الاسبوع واليوم اللى يعدى علمى علية صح ويبقى لسة 5 ايام عدى يوم كمان علمى صح ولسة 4 وعلطول هتلاقى الاسبوع طار وخسينا ودخلنا فى التانى وهكذا
نرجع ليوم السبت اللى قولنا هنبدأ فية دايت فاكرينة؟
طب احنا قولنا اننا ضعفنا قدام لقمة عيش او حتة جبنة وكلناااااااااااها وضميرنا أنبنا
"خلاص النهاردة باظ هكملة بقى وهبدأ من بكرة ان شاء الله" وبكرة باظ "يااااااااة خلاص بقى يوم السبت والاحد باظوا هكمل بقى الاتنين والثلاثاء والاربعاء والخميس والجمعة فرى وابدأ تانى من يوم السبت"
ههههههههههههه بجد وربنا؟؟؟؟؟؟؟؟؟
انتى متخيلة اللى حصل؟
ضيعتى الاسبوع اللى كنتى ممكن تنزلى فية من 3 لـ 5 كيلو عشان لقمة واحدة ضعفتى قدمها
اومال اعمل اية يعنى ياريتا انتى عبيطة ماهو اليوم باظ قدامك اهو
هقولك انا تعملى اية
يوم اما تنوى تبدأى دايت هتجيبى كشكول جديد فى اول صفحة هتكتبى النظام اللى هتمشى علية وتانى صفحة هتكتبى وزنك وتاخدى مقاساتك وتالت صفحة هتعملى جدول بايام الاسبوع زى اللى عملناة فى ضهر ورقة الدايت ومن رابع ورقة هتكتبى تقريرك كل لقمة تتحط فى بوقك هتكتبيها لو دوقتى الاكل وانتى بتطبخى اكتبى لو شربتى حبة مية اكتبى
وفى اخر اليوم هتشوفى يومك مشى ازاى لو لاقيتى مثلا لقمة العيش اللى ضعفنا قدامها الصبح.. فى الغدا لاقيتى بوق بيبسى ..فى العشا لاقيتى قطمة جاتوة اة كل دة ممنوع لكن عرفت انة زيادة وتانى يوم اظبطة عن اليوم دة
ولو انتى جد بقى اعملى عقاب لنفسك لو مجبتيش 10 من 10 هتتعاقبى مثلا لو 9 من 10 هزود لتر مية او مشروب تخسيس لو 8 من 10 اعمل رياضة خفيفة لو 7 اعمل رياضة اشد لو 6 يبقى ازود لتر مية ورياضة لو 5 يبقى ازود مية ورياضة ومشروب وهكذا
يعنى "كونى دكتورة نفسك"
اعملى لنفسك ثواب وعقاب
يعنى مثلا شيلى كل يوم جنية او نص على حسب ظروفك وحددى هدف فى الاسبوع الاول وليكن 2 كيلو لو خسيتى الاتنين يبقى انتى اللى كسبتى وهتاخدى الفلوس تجيبى بيهم حاجة تاكليها فى اليوم الفرى اللى هو يوم الميزان اما لو مخستيش هتتبرعى بيهم تحطيهم فى مسجد مثلا او تديهم لحد محتاج بنية انك تخسى برضو هتبقى مصلحة ليكى
واحنا قاعدين فى امان الله بنتفرج على التليفزيون وبنقزقز لب وسودانى وبنشرب بيبسى بقى وكلها حاجات بتتخن الفيل لاقينا الباب خبط وقامت ماما فتحت الباب لاقيت بنت جارتنا البت الرفيعة المعصعصة دى اللى كل اما بشوفها معدتى بتقلب من كتر ماهى موزة وقالتلها تعالى اتفضلى ودخلت البت لاقيتى فارشة قدام التليفزيون عمالة احش وهى تبصلى كدة من فوق لتحت
الله مالها البت دى بتبصلى كدة لية
انتى طبعا متغاظة منها عشان ارفع منك وطول عمرها سمباتيك حتى وانتوا صغيرين بتلعبوا مع بعض كانت هى زى المسمار وانتى زى البلونة ولو خبطتت فيكى بكلمة تفرقعى فى وشها "نفسنة بنات انا عارفة ههههههه"
انتى عارفة لو انتى ماشية بدايت بس بتخسى ببطئ او مثلا لسة بدأة دايت النهاردة او امبارح يعنى لسة مكملتيش اسبوع وجت تاخد بصل وبصتلك البصة الوحشة دى اوعى تزعلى ابدا ازعلى لو مش بتعملى اللى عليكى لكن طول مانتى بتعملى اللى عليكى امشى جمبها وانتى فخورة مش مكسورة
البنت الرفيعة بطبيعتها بتبقى عاملة زى الطالبة اللى نجحت بالواسطة هى متعبتش ولا بزلت مجهود عشان توصل للى هى فية دة لكن انت بقى الجامد الفرس الشجاع يا عسل يا قمر انت اللى بتنجحى بس بمجهودك
طب الدكتور قالى اعمل كل يوم نص ساعة رياضة وانا بكرة الرياضة
هقولك فكرة حلوة اختارى نوع معين انتى بتحبية وابدأى اتمرنى علية لحد ماتبقى محترفة كأنك داخلة بطولة
ياستى انا مبحبش رياضة اسكتى بقى
خلاص مش لازم تحبى رياضة انزلى اتمشى كل يوم
ياسلام ياختى اسيب الراجل والعيال وانزل اتمشى انتى اتجننتى ياريتا
خلاص مش بتحبى رياضة معينة ومش هتقدرى تمشى كل يوم
طب تعالى كدة نحسبها نص ساعة فى اليوم يعنى 30 دقيقة فى 6 ايام يعنى 180 دقيقة
اية رأيك لو فى يوم بعد اما العيال تنام ورجعى لجوزك ايام زمان بقى ووريلة امجادك ياست وارقصى ساعة كاملة حتى لو مش بتعرفى هزى ياستى اى حاجة اهو الراجل يفرح حبة من نفسة يبقى كدة خلصنا 60 دقيقة لسة 120
طب اية رايك تجمعى اولادك وتقعدوا تلعبوا مع بعض وتجرى معاهم اة والله تجرى معاهم مش عيب هيفرحوا اوى وتقعدوا مثلا نص ساعة لعب وتعمليها مكافأة ليهم لو خلصوا مزاكرة بدرى تلعبوا سوا يبقى خلصنا كمان 30 دقيقة يعنى لسة 90
اية رايك تاخدى جوزك وتنزلوا تتمشوا انتى وهو تروحوا مشوار بعيد بس تاخدوة مشى فى ساعة .. كدة لسة نص ساعة
اية رايك لو عندك مشاية تقومى تتمشى عليها النص ساعة دى
اية رايك ان تمارين الاسبوع كلها خلصت فى حاجات بسيطة اوى
طب احنا دلوقتى عرفنا ازاى يكون عندنا ارادة ولو مش عندنا هنجيبها ازاى
طب ممكن نتخيل سوا كدة اننا وصلنا لهدفنا
"انا كنت 110 كيلو ومكنش عندى ارادة خالص بس وقفت قدام المراية لاقيتنى مش راضية عن نفسى دورت على النت على دايت حلو وصحى ولاقيت وبدأت فية اول يوم كان صعب شوية وعكيت وجبت 7/10 وقولت تانى يوم مش هقل وهجيب اكتر من الـ 7 وفعلا جبت 8 بس كنت محتاجة جسمى يتشد وابقى حلوة بعد اما اخس دورت على رياضة وخصصت 300 دقيقة فى الاسبوع وبقيت كل شوية اعمل كام دقيقة وخصصت كمان 15 لتر مية فى الاسبوع عشان المية بتخلى الوش حلو ومورد كدة وجبت كشكول وسجلت فية كل الكلام دة وبقيت اشرب لتر مية واكتبة اعمل ساعة رياضة واكتب والاسبوع خلص بالمية والرياضة والمشروبات والاكل الصحى ولاقيتنى خسيت 5 كيلو وباين عليا خاسة اكتر من كدة فرحت اوى ودخلت الاسبوع التانى بس حسيت ان حماسى قل شوية بس ماسكتش وجبت الكشكول وكتبت فى اخرة هدفى واللى مضايقنى وانا تخينة والحاجات اللى نفسى اخس عشانها وبقيت كل اما اضعف ارجع اقراة وبقيت اتحمس اكتر عدى الاسبوع دة وانا خاسة 3 كيلو والاسبوع اللى بعدة 2 بدأت اقل فى النزول لكن عندى عزيمة واصرار انى انزل بدأت ازود الرياضة وازود المية الاسبوع اللى بعدة 2 كمان وعدى اول شهر وكسرت المية وغيرت النظام عشان الملل ومشيت على نظام تانى وبقيت بخس زى الاول ويمكن احسن كمان وعدى تانى وتالت ورابع شهر وكسرت الـ 80 الله دة انا قربت اوصل لهدفى بس كل اللى يشوفتى يفكرنى اقل من الـ 80 بكتير بس تعبت من الدايت ومليت عاوزة اخد راحة اسبوع دورت على نظام تثبيت عشان ماتخنش فى الفترة دى وعدى اول وتانى وتالت ورابع اسبوع لكن لسة هدفى موجود انى اوصل لـ 60 رجعت تانى بالرياضة والمشروبات والاكل الصحى والمية وشهر ورا شهر ورا شهر خسيت ووصلت لـ 60 يااااااااااة احساس روعة كل اما ادخل محل عشان اجيب حاجة امسك مقاس وسط البنت تقولى لا دة كبير عليكى هجيبلك اصغر وتنادى على صاحبتها تقولها هاتى اصغر مقاس من الموديل دة ياااااااااااة انا بلبس اصغر مقاس يانااااااااااااااااس اما بقى اصحابى وقرايبى كل اللى يشوفنى يقول اية دة خسيتى كدة ازاى عاوزة اعرف النظام قولت لـ 2 من اصحابى اللى عندها ارادة بقيت كل اما اقابلها الاقيها خاسة عن المرة اللى قبلها اما التانية وزنها ثابت وبتبوظ الدايت كل اما تلاقى نفسها ثابتة فبتزيد اكتر
اما بقى جوزى بقى مبسوط بيا اوى وماصدقش انى ممكن اوصل لكدة بقينا بنروح دريم وماجيك وبركب المراجيح والالعاب اللى هناك بدل اما كنت اقعد اتفرج من بعيد لبعيد بقيت بعمل سباق انا وهو وانا اللى بسبقة كمان
بقيت مرتاحة اوى ومبسوطة بنفسى اوى انا ازاى كنت ساكتة على نفسى انا ازاى ماستعجلتش على الاحساس الجميل دة مع انة سهل جدا لو منعت شوية من الاكل هوصلة يعنى الموضوع مش مستحيل كنت لية ابص على اللى خسوا واتحسر على نفسى كنت لية مابتشجعش كنت لية اما ازعل اكل اية علاقة دة بدة هل الاكل هيرجع اللى زعلنى او هيحل المشكلة دة بالعكس كان بيدخلنى انا فى مشكلة السمنة وقرفها انا اى حد اشوفة انصحة انة يمشى بنظام دايت ومايملش ابدا منة ولو زهق ياخد شوية اجازة من الدايت بس بشرط يثبت عشان اما يرجع يكمل على اللى خسة مش يبدأ من الاول
دلوقتى انا لو زدت كيلو واحد اعمل دايت اسبوع وجوزى يقولى يابنتى حرام عليكى انتى كدة حلوة الكيلو مش كتير اقولة لا انا بقيت 61 واصمم انى اخس واوصل لـ 60 تانى وبيبقى فرحان بيا اوى وانا كمان بقيت فرحانة بنفسى اوى ويارب كلكوا تجربوا الاحساس دة وتخسوا"
قريتوا القصة دى؟
دى من تأليفى بس مش مستحيلة يعنى اكيد قريبة من حكاية بنات كتير
عاوزاكى تغمضى عنيكى وتتخيلى كدة انتى وزنك كام وشكلك عامل ازاى دلوقتى وانك كافحتى لحد ماوصلتى للوزن اللى انتى عاوزاة واتخيلى كدة شكلك بقى عامل ازاى و جسمك بقى ازاى واية احساسك بعد اما وصلتى لهدفك وخسيتى
زى اما حكيت القصة اللى فوق دى
نصايح بقى ع السريع
– ياريت محدش يعرف انك بتعملى دايت عشان محدش يفضل مراقبك ويعقدك
– الميزان مش كل شوية دة انتى كمان لو تقدرى كل شهر يبقى احسن يعنى على الاقل مرة كل اسبوع
– خسى عشان نفسك مش عشان حد ولا عشان جوزى ولا خطيبى ولا عشان اغيط البت جارتنا بتاعة البصل
– خلى عندك هدف تخسى عشانة
– خليكى دكتورة نفسك وحطى لنفسك ثواب وعقاب
– امشى على نظام صحى عشان ماتمليش ويبقى نفسك ليها حق انها تكرة اليوم اللى بتعملى فية دايت
– حبى نفسك وصاحبيها
– اما تضعفى بعد اما تاكلى الاكل بتاعك سواء نص رغيف او الـ 5 معالق رز افتكرى ان الفجر أذن وخلاص انتى صايمة
– لو ضعفتى قدام اكلة من الممنوع افتكرى انك تعبانة والاكلة دى هتأذيكى واما تخفى هتاكليها براحتك
– عيشى حياتك حتى لو تخينة ماتمشيش مكسورة امشى دايما راسك مرفوعة وافتكرى ان من جد وجد ومن زرع حصد وربنا بيدى لكل واحد على قد تعبة اتعبى وانتى تلاقى نتيجة تعبك ان شاء الله
يارب تكونوا استفدتوا وانا كدة خلصت يابنات ولو المحاضرة عجبتكوا ماتنسوش التقييم
ريـتـال ريـتـال 1051352_12.gif سوبر فتكات Fatakat 1051352 cairo – Egypt