السلام عليكم و رحمة الله و بركاته
ازيكم يا فتوكات
النهاردة بقا هاعملكم حاجة باعملها مرة او مرتين في السنة عشان لما باعملها بيبطلوا ياكلوا و بيشتغلوا عليها بس لحد ما تخلص
هنعمل النهاردة الشطيطة او هريسة الشطة حاجة كده مش تفتح النفس لا دي تفندقها علي الاخر قال يعني هي مسدودة هههههههههههه
بسم الله نبدأ
ما لهاش مقادير معينة
هتجيبي فلفل احمر رومي و حامي و زي ما تحبي عاوزاها حامية قوي و لا نص و نص و لا حامية علي بسيط انتي تحطي الفلفل الحامي زي ما انتي عاوزة
توم مفروم و زيت و ملح و صلصة طماطم بس لو بيتي تبقي احلي
الطريقة
تغسلي الفلفل كويس و تشيلي منه البذر
تفرميه في الخلاط او الكبة بس حطي مية قليل جدا و بعدين تحطيه في حلة و علي النار علي طول لحد ما تقرب المية تنشف منه
تحطي عليه التوم المفروم و تسيبيه يغلي
بعد كده تحطي الصلصة و دي انا كنت عملاها في البيت و بعدين تملحيه كويس و تسيبيه يغلي شوية بس قلبيه علي طول عشان ما تشيطش
تضيفي شوية زيت حلوين و هو بيغلي كده و تقلب كويس و تطفي عليها
لما تبرد حطيها في برطمانات و تحطي علي وشها شوية زيت و تشيليها في التلاجة و الف هنا و شفا
هتعجبكوا جدا جنب الاكل هي بتتباع جاهزة في السوبر ماركت بس بتبقي غالية كتير عن تكاليفها
لو حابين تحطولها اي اضافات براحتكم و طبعا انا مش ذاكرة كميات معينة عشان انتم كل واحدة تظبطها زي ما تحب
لو فتحت نفسكوا الشطيطة عاوزة دعوة حلوة و ما تنسوش التقييم
و السلام عليكم و رحمة الله و بركاته مواضيع هذا القسم برعاية
molo_s2016 molo_s2016 277585_1.gif فتكات رائعة Fatakat 277585 القاهرة – مصر
سبحان الله و بحمده