السلام عليكم ورحمة الله وبركاته
ازى الحال يا فتوكات يا قمرات
جايبالكوا النهاردة وصفة كيكة لذيذة جدا بدون دهون خالص صحية وطعمها جميل جدا يارب تعجبكوا
المقادير:
3 كوب دقيق
6 بيضات (الأفضل تكون بلدى لو مفيش حطى الصفار بس)
2 كوب سكر (لو بتعملى دايت حطى كوباية او اقل سكر دايت) ده بيخليها سكرها مظبوط او قليل سنة لو بتحبيها مسكرة اكتر زودى السكر
نص كوب عصير برتقال
نص كوب لبن (لو بتعملى دايت حطيه منزوع الدسم)
كيس بيكنج بودر
كيس فانيليا
بشر برتقال
الطريقة:
اخلطى البيض فى الخلاط او بمضرب البيض جامد لحد ما ينفش ويعلى
بعد كده حطى السكر واضربيه مع البيض شوية هتلاقى الخليط بيعلى وينفش أكتر
حطى العصير واللبن والفانيليا وبشر البرتقال مرة واحدة واضربى الخليط بتاع تلات دقايق كده
تكونى ناخلة الدقيق والبيكنج بودر فى عجانة او طبق غويط على جنب
تصبى عليهم الخليط وتقلبى لحد ما يبقوا متجانسين مع بعض ولو لقيتى العجينة سايلة شوية حطى حبة دقيق كمان لحد ما تبقى تقيلة سنة تنزليها كده تعمل دواير فى العجين
ادهنى الصينية او القالب بسمن طبقة ماتتشافش تبقى بس بتلمع كده لو لقيتيه كتير امسحيه بمنديل هيفضل موجود سمنة برضه بس طبقة ممسوحة
بطنى الصينية بحبة دقيق وحطى الخليط
حطيه فى فرن درجة حرارته عالية وافتحى بعد تلت او نص ساعة حسب فرنك واغرسى سكينة لو طلع فيها عجينة يبقى لسة شوية
وكررى موضوع السكينة ده كل بتاع خمس دقايق لحد ما ميطلعش فيها عجينة
طلعيها برة فى حتة مش معرضة للهوا عشان ماتهبطش
وبالهنا والشفا يا أحلى فتوكات مواضيع هذا القسم برعاية
محبة المتحرى كونان محبة المتحرى كونان فتكات حبوبة Fatakat 841284 الجيزة – مصر
