السلام عليكم
من فضلكم انا عندى استفسار ضرورى جدا علشان اعرف هكشف تانى ولا اروح لانهى تخصص بالظبط
من كذا سنه وانا لما اقوم فجاة بدوخ والدنيا تنمل فعنيه فترة كدة وده عادى الموضوع ده طبعا بدأ يزيد حتى لو واقفه او بعمل شيئ
اخدت فيتامينات وقالوا من القعده يمكن وراح ومسكنى مكانه صداع مزمن فظيع مرة نصفى ومرة جزئى ومع الصداع ده كنت بحس بانتفاضه غريبه كأن حد بيكهربنى وسبب الصداع انى كل مروح مكان ولو شوية صغيرين وارجع اصاب به اما طول منا فى البيت مفيش خالص
والموضوع ده بيزيد فى الحر بالذات لو ماشيه فى الصيف تلاقى الدوخة دى جت والدنيا نغششت كدة فعنيه وكأن هيغمى عليه ومتروحش الا لما توقف
تطور الامر لضيق فى التنفس طول فترة الصداع وعدم تقبل اى روايح حتى لو عادية ولا اى صوت عالى ودايما بعد منام حوالى 5 ساعات اقوم عندى الرغبة فى شرب ميه بكميات كبيرة جدا بشكل لا شعورى
وروحت لكل التخصصات مع العلم نظرى ضعيف قالى مفيش مشاكل روحت لمخ واعصاب مقتنع ان ده ضغط عصبى وتوتر مع انى اكدتله انى مش متوتره ومفيش ما يعصبنى ابدا ومع ذلك اعطانى كمية مهدئات وادوية منشطة للعقل ومجموعة متنوعة اخرى ( بصراحة انا بخاف من ادوية الاعصاب مرضيتش اخدهم واخدت الفيتامينات بس )
بدأت اتأقلم على الوضع واشوف ان مفيش حل وبعدين رحت لباطنة تانى بعد ما الموضوع اصبح لا يحتمل مع بكاء وانتفاضات من النوم عجيبة قالى روحى انف واذن رحت قالى دى حساسية فى الجيوب الانفيه واخدت العلاج وطبعا لانى مخرجتش طول فترة العلاج شعرت بانى قد تحسنت لكن لما خرجت تانى عادت نفس الحالة بنفس السوء المهم خلاص اتعودت انى اصدع عنيه تدمع اتنفض وانام بعد عذاب مع الالم واصحى اشرب وانام تانى وتانى يوم اصحى كأنى خارجة من مرض تقيل ودايخة ومش قادرة احافظ على توازنى لحد اخر اليوم .. مش ده موضوعنا لانه مش المشكلة الكبير
اللى حصل بقى انى من شهر تقريبا نمت كالعادة عادى جدا وكنت مهزرة مع اخواتى ولا فيه اى شيئ
على الفجر صحيت فجاة لقيت ايدى الاتنين والنص الشمال من وشى ورجلى الشمال مصابين بشيئ زى الكهربا بالظبط كانى ماسكة سلك كهربى وباخد شحنات قوية وده عمل تشنجات يدوب ناديت عليهم ينقذونى واصبحت الرؤية غير واضحة والسمع كأنه من بعيد جدا وعنيه واقفه وبقى متجمد تماما ونفسى سريع جدا ولا اشعر الا بالكهربا دى فجسمى طول الوقت عماله اقول فيه ايه ايه اللى جرالى ومش ملتفته تماما للى حوليا .. عرفت بعد كدة ان جسمى كان متلج وان قلبى كان بيدق بشكل محسوس جدا يعنى اللى يحط ايده على قلبى يحس بالدقه جامد
جابو دكتور وفوجئت بيه ادانى حقن مسكنه ومهدئه
وحقن فيتامين ب 12 ومجموعة مضادات حيوية وادوية اعصاب
المهم بعد مفوقت ورحت استشارة بحكى للدكتور على اللى حسيت بيه وطبعا مكنش واضح ليا قوى اللى حسيته لانى كنت خايفه وقتها من اللى حصلى حسيت انها جلطه .. قالى ان ده نفسى وان ده زعل وتوتر
سكت مع انى مش مقتنعه خالص لانى مكنتش زعلانه اطلاقا بالعكس الحمد لله الحمد لله كنت فى احسن حال وكويسه جدا
المشكلة ان الامر لم يتوقف عند هذا الحد
بدأت تجيلى الحالات دى على فترات مرة كل يومين تلاته لحد مقلت وبقت تيجى كل اسبوعين
بس فى الاول كنت انادى عليهم وكانو يدلوقوا على ايدى ميه وعلى وشى ويشربونى ويفوقونى وخلاص بنام وانا معيطة وزعلانه على نفسى جدا
ودلوقتى مبقتش انادى لحد وبقيت اترك امرى لله واستحمل الكهربا دى رغم انى بحس ان قلبى بيوقف ونفسى بيروح ومؤلمه جدا
فبقت تيجى على خفيف جدا
المهم انى عاوزه اسال دلوقتى انا عاوزه اكشف اروح لتخصص ايه بالظبط واعمل ايه ؟
وهل ده نفسى زى مهما بيقولوا ؟
ومفيش علاج لحالتى دى ؟؟
معلش طولت عليكم بس كنت بحكى اللى عنده كله علشان تعرفوا اللى بيجرالى بالظبط
ربنا يجازيكم خير
for me 20 for me 20 703145_1.gif فتكات متميزة Fatakat 703145 المنوفية – مصر
سبحان الله و بحمده