السلام عليكم يا بناويت
يارب تكونوا فى افضل صحة ,
الموضوع ده انا فكرت اكتبه واوضح حجات كنتو بتسألوها كتير فى الموضوع دا بعد ما لقيت هما تجمع للاجسام المضادة والبنات اللى عندها مشاكل فى الحمل وبتاخد ابر الكليكسان او الاينوهيب او الهيبارين
واسمحولى هخلى الموضوع فى صيغة أسئلة
1- ايه هو الكليكسان وليه بيستخدم؟؟
الكليكسان ده مادة مضادة لتجلط الدم . وبيستخدم فى الحمل للناس اللى سبق وحصل لها اجهاضات متكررة سببها اجسام مضادة بتسبب تجلط للدم وكمان الدم مش بيوصل للجنين عن طريق المشيمة وبالتالى يتوقف نبض الجنين !!!
2- ايه الفرق بين الكليكسان والاينوهيب والهيبارين ؟
الكلسكان والاينوهيب نفس الاكشن بمواد شبيهه ولها نفس التاثير وفترة عمرة النصف (اللى هى بتقعد فى الدم اد ايه )
الهيبارين بيتاخد مرتين او 3 فى اليوم , وبيحتاج تحاليل كل فترة اسبوع مثلا علشان نعرف الصفايح وال pt ولازم نتابع
لكن الكليكسان والاينوهيب مش بيحتاجو ,
3- ايه هى تركيزات الكلكسان وجرعاته وثمنها فى الصيدليات وازاى بتتحدد؟
عندنا من تركيزاته 20 وده العلبة (فيها سرنجتين) ب30 جنيه
40 مجم = 4000 وحدة دولية العلبة ب 60 جنيه
60 مجم = 6000 وحده دولية العلبة ب 74
80 مجم = 8000 وحدة دولية العلبة ب 86
4- ازاى ناخده وفين فى الجسم ؟؟
الابرة دى بتتاخد تحت الجلد مش فى العضل والرسمة دى هتوضح لينا الاماكن اللى ممكن ناخد فيها تحت الجلد
والصورة دى بتوضح ازاى نحقنها :
اولا لازم نعرف ان افضل مكان تاخدى فيه هو حول سرة البطن , أقل ألما , وأحسن فاعليه , واقل آثار جانبية اللى هى الاحمرار والزرقان وكده
ثانيا : نمسك جلد البطن اللى حوالين السرة بين الابهام والسبابة ونمسك الابرة بالايد التانية ونحقنها بشكل عمودى
وخدى بالك : الحقن بشكل عمودى
– متتخلصيش من فقاعه الهواء اللى جواها
دخلى سن الابرة كلها
واحقنى بالراحة , وبالشفا
معلش يا حبيبتى بس كله يهون علشان تشوفى اغلى حاجة فى الدنيا وهى لو خدتيها بالطريقة دى مش هتوجع خالص وهتعرفى تتديها لنفسك
آآه خدى بالك ..
تكونى مستلقية ( نايمة يعنى ) وانتى بتاخديها
الحقنة لا تحفظ بالثلاجة , تحفظ فى درجة حرارة الغرفة اللى هى اقل من 25
اى سؤال يا بنات انا موجودة ويارب اكون افدتكم …
اللى انا عايزاه منكم بقى بجد انكم تدعولى ربنا يرزقنى من فضله
صيدلانيه عسولة صيدلانيه عسولة 537052_1.gif فتكات متميزة Fatakat 537052 الزقازيق – مصر