ازيكم يا احلى فتوكات
انا جايبالكم النهارده تلات اكلات فى مره واحده اوكازيون يعنى
كفته جمبرى من غير رز
رز بالسى فود الكابوريا والجمبرى
جمبرى بانيه
نخش على الموضوع على طووووووووول
الاول خدوا الصوره دى تفتح نفسكم على الاخر
ايه رأيكم جوعتكم ولا لسه صامدين
اولا نخش على الكفته الاول
مقادير كفته الجمبرى
انا كنت عامله كميه معقوله واللى عاوزه اكتر تزود طبعا
نصف كيلوا جمبرى مقشر ومغسول
تلات اكواب دقيق
8 بيضات
ربطه شبت وربطه كسبره مقطعه رفيع
بصلتين كبار مقطعين رفيع اوى او مبشورين
معلقه توم مبشور
ملح وفلفل وكمون
ندخل على الطريقه على طوووول
نغسل الجمبرى ونتبله ملح وفلفل وكمون
ونضيف عليه البصل والتوم والخضره ونقلب كويس
وبعدين نضيف البيض والدقيق ونقلب جامد جدا زى الصور كده
كده الكفته جاهزه علشان تتقلى على طول
نسخن الزيت وناخد بالمعلقه ونقلى زى الصور كده
النار تكون متوسطه يا فتوكات علشان تستوى كويس
ومتهديهاش اوى علشان متنشفش ماشى يا قمرات
ودى الصوره بعد ما استوت خلاص بالهنا والشفا
ريحتها ايه مقولكوش ولذيذه جدا والعيال
مش هيبطلوا اكل فيها زى ولادى
هما وابوهم طبعا منقدرش ننساه
نخش على الزر بالسى فود
ده طبعا مقاديره على حسب عدد الافراد
انا عملت اربع كوبيات رز
كيسين كابوريا
نصف كيلوا جمبرى
ملح وفلفل وكمون
بصله مفريه ومعلقه توم مفرى
نقطع صوابع الكابوريا مربعات صغيره زى الصوره كده
ونتبل الجمبرى بالملح والفلفل والكمون
والبصل والتوم ونضيف عليه الكابوريا ونقلب كده
نرفعها على النار وتكون هاديه مش هتاخد اكتر من نصف ساعه
ومنقلبش كتير علشان الكابوريا متتهريش ماشى يا قمرات
الرز عادى جدا زى الرز الابيض نحط شويه زيت فى الحله ونشوح فيهم الرز
مع معلقتين كركم ونضيف الميه عدد كوبيات الرز تحطى ميه ولما يغلى تهدى النار لغايه مايستوى
وده الرز بعد ما قلبت فيه الكركم والسى فود بعد ما استوى
وده الشكل النهائى يا قمرات بالهنا والشفا
نخش على الجمبرى البانيه
طبعا زى ما تحبى جمبرى انا كنت عامله نصف كيلوا
نتبلهم بالملح والفلفل والكمون فقط
وبحطهم فى خلطه من الدقيق والبقسماط بالشكل ده
نسخن زيت جامد وغزير ونقلى فيه الجمبرى
وده الشكل النهائى بالهنا والشفا
كده الحمد لله انا خلصت واسيبكم مع صور الاكل كله ورجعالكم تانى اوعوا تمشوا
امانه عليكم لو عجبكم موضوعى متنسوش تدعوا لابنى زيزو ربنا يشفيه
مواضيع هذا القسم برعاية
سيسو زيزو سيسو زيزو 822446_8.gif فتكات غالية قوي Fatakat 822446 المنصوره – مصر