حبيباتى الفتوكات ماشاء الله عليكم كلكم اساتذة فى الطبخ واكيد كتير منكم بيعرف يعمل الكبسة حلو قوى وماشاء الله واضح من اسئلة الناس للشيفات فى التليفزيون انها بقت مشهورة فى مصر زى دول الخليج تمام احنا هنا فى السعودية عندنا مطاعم الظازج بتعمل كبسة خرافة مش عارفة الفروع اللى فى مصر بتعمله ولا لا
وانا عن نفسى حاولت اعمل زيه اكتر من مرة واخيييييييييييرا الحمد لله نجحت
وقبل ماتقولولى بطلى رغى احب اهدى الوصفة دى لصديقتى واختى رفيقة غربتى شوماء لانها نزلت مصر نهائى وكانت بتحب كبسة الطازج قوى ..ربنا ييسرلها الخير
المقادير
بتضاعفيها براحتك
فرخة متوسطة مقطعة نصفين او 4 ارباع
كوب رز بسمتى (وده ماشاء الله بيعمل كتير يكفى فردين ويفيض)
ملعقة زيت(الفرخة بتنزل دسمها)
بصلة كبيرة مبشورة
عود قرفة صغير
فصين او 3 حبهان
ملعقة كبيرة توابل كبسة
ملعقة كبيرة زنجبيل بودر
ملعقة صغيرة كسبرة ناشفة
حبة لومى (ليمون ناشف)
فلفل اسود -ملح-شطة حمرا لو بتحبى الحراق
2 ملعقة كبيرة معجون صلصة
الطريقة
بتنضفى الفرخة كويس وتنقعيها فى مية وملح وخل او ليمون فترة مناسبة وتعصريها
تشوحيها على النار مع الزيت والبصل وكل التوابل على نار هادية لحد ماتنزل ميتها وتشربها
ولما الفراخ تشرب ميتها خاااالص وتنزل دسمها وتصفر كده وتبدا تاخد لون وتتجانس مع البصل والتوابل نزلى عليها الصلصة
وزوديها مية مغلية قيمة كوبايتين او اكتر تغطى الفراخ
نسيت اصور خطوة المية بسيطة يعنى
سيبيها على النار شوية تستوى نص سوا تكونى غسلتى الرز ونقعتيه فى مية دافية (يادوب دافية تستحمليها يعنى مش سخنة)
لمدة تلت ساعة
نولع الفرن بقى من تحت على 250 عشان يسخن
ونصفى الرز من المية ونحطه فى الصينية كده
وعليه الفراخ والصلصة بتاعتها وهى بتغلى واغطيه بفويل وع الفرن
علطوووووووووووووووول
اه مية الفراخ لو قلت كتير زوديها شوية
تقريبا كوب الرز البسمتى بياخد حوالى كوبين مية
وماتخافيش الرز ماشاء الله بيستحمل المية ومش بيعجن بسهولة
بس برضه ماتعوميهاش يعنى
بعد نص ساعة نهدى الفرن شوية ونسيبها ربع ساعة كمان وبعدها 10 دقايق تحت الشواية
انا متعودة على عدم الرد والتقييم يعنى فى كل مواضيعى مش هزعل
تنحت
بس بردو انتم وذوقكم
ووالله الاكلة لذيذة ياريت تجربوها
بحبكم فى الله
مواضيع هذا القسم برعاية
أم طيبة 85 أم طيبة 85 210619_2.gif سوبر فتكات Fatakat 210619 الطائف سابقا الباحة حاليا – السعودية