عجبتك الصورة يافتوكة
دى كبدة اسكندرانى عملتها من كام يوم وكانت لذيذة جدا
تعالى اقولك طريقتها
نبدا بسم الله الرحمن الرحيم
اولا المقادير
نص كيلو كبدة
بصلة كبيرة مقطعة شرائح
طماطمتين مقطعين شرائح
حوالى 5 او 6 قرون فلفل مقطعين شرائح طولية
ولو عندك فلفل حار حطى مايضرش خالص ههههه
توابل وبهارات هقولك عليها لما نوصل لتتبيلة الكبدة
ثانيا
هنغسل الكبدة بالمية كويس
وبعد كده هننقعها فى مية فيها حوالى ملعقتين كبار او 3 ملاعق خل وكمان عصير ليمونة
وهنسيبها منقوعة 10 دقايق او ربع ساعة
وهى منقوعة نستغل الوقت ونعمل التتبيلةوهى
تتبيلة الكبدة عبارة عن
نص راس توم مفرومة
حطيت معاهم 4 قرون شطة
رشة توم بودر
رشة ملح
رشة فلفل اسود مطحون
ملعقة صغيرة خل
ليمونتين
وكمان ملعقتين زيت زيتون
كزبرة مطحونة
كمون مطحون
ولو عندك بهارات كبدة حطيها بس انا مش عندى عشان كده حطيت الكزبرة والكمون
وهنسيبها فى التتبيلة دى ساعة
ثالثا
هنجيب الطاسة التيفال وهشوح فيها البصلة المقطعة شرايح فى زيت زيتون
واول مايبتدى لونها يغير هضيف الفلفل المقطع شرايح
وهقلبهم لغاية لما البصلة تاخد لون شوية
بعد كده هضيف الكبدة بعد ماتكون قعدت ساعة او اقل فى التتبيلة
وهحط عليها رشة ملح خفيفة
ورشة فلفل اسود مجروش او مطحون
وهحط كمان عصير ليمونة
وهقلبهم ع النار مع بعض
ولما تنشف الماية بتاعتها وهى ع النار هحطلها شقشاق ماية وهكذا لغاية لما الكبدة تستوى
وهعرف انها استوت لماالاقيها طريت و لونها اتغير عن لما جيت اشيلها من التتبيلة واحطها ع النار
وممكن ندوقها كمان عشان نتاكد انها استوت
ولما احسها ابتدت تستوى هضيف الطماطمتين المقطعين شرائح على الكبدة بالفلفل والبصل
وقبل ما اطفى النار بعد ماتستوى هحط عليها حبة طحينة
ودوقى احلى كبدة اسكندرانى من ايديا
وبالهنا والشفا
وده شكلها
صورة ابعد شوية
وعملت معاها سلطة طحينة حطيت فيها توم مشوى على نار هادية على عين البوتاجاز
وكان طعمها تحفة انا بقيت اعملها بالتوم المشوى ده علطول ومابياخدش وقت
بس دى ماصورتهاش
مستنية تجربوها يافتوكات وماتنسوش التقييم
مواضيع هذا القسم برعاية
zaytona2017 zaytona2017 39422_7.gif فتكات رائعة Fatakat 39422 قنا – مصر