السلام عليكم اخواتى وحبيباتى
زى ماقولت لكم هحكى لكم قصه ولادتى علشان الحوامل يطمنوا وياخدوا بالهم من كذا حاجه مهمه
انا كان محدد لى يوم ولادتى يوم 16 فى الشهر وكشفت قبلها باسبوع والدكتور قاللى ان الحوض واسع بس لسه منعرفش اذا كان الرحم بيفتح ولا ولا وانى لازم اروحله يوم 14 علشان يطمن عليا
انا بقى كان عندى ظروف ومعرفتش اروح يوم 14 الاعاده زى ما كان طالب منى ودا غلط غلط غلط بالله عليكم تنتظموا فى الاعاده والكشف زى ماالدكتور يقول لان بسبب غلطه زى دى فضلت اتالم وجع الطلق الطبيعى يومين بلياليهم والاخر ولدت قيصرى ولو كنت روحت يوم 14 كنت عرفت انى هولد قيصرى وكنت ريحت نفسى بس الحمد لله قدر الله وماشاء الله فعل
وانتظرت انى اروح اكشف فى بدايه الاسبوع لكنى لقيت يوم 16 بالليل وجع خفيف عمال يروح وييجى وكل ماادخل الحمام الاقى نقط ميه فى الاندر وير وطبعا انا محطتش فى بالى وقولت عادى
فضلت يوم الخميس اللى هوا 16 طول الليل عندى مغص ومش عارفه انام خالص ولا دقيقه وعماله رايحه جايه على الحمام ومش عارفه مالى اذا كان عندى امساك ولا اسهال ولا ايه بالظبط مسبب المغص بس معرفتش ( وطبعا العلاقه الخاصه محفز قوى جدا للطلق )
فضلت صاحيه لحد يوم الجمعه الصبح وبردو الالم بيزيد وفضلت مستحمله لحد بالليل بس الميه عماله تنزل ونزولها بيزيد وبقى فيها خيوم خفيفه مدممه
والغلط التانى انى مكلتش اى حاجه خالص وكنت صايمه تانى يوم للعمليه ودا خلى ابنى يتولد جعان جدااااا وبيعيط ويصرخ ياحبيبى من الجوع وطبعا انتى معندكيش لبن اول 3 ايام فبالله عليكم كلوا كويس لحد اخر لحظه علشان ينفعك فى الايام اللى معندكيش لبن فيها
المهم فضلت لحد الساعه 9 بالليل ولحد مااستويت من الوجع فروحت كشفت عند دكتوره قريبه مننا وعملت لى سونار وكشف نسا وقالت لى بكل وضوح ان الولاده قيصرى لان الراس عاليه اوى فى الحوض ومنزلتش
طبعا للو هله الاولىانتى بتتصدمى لكن والله ياحبايبى خلوا عندكم ثقه ان ربنا هيبعتلك اللى تستحمليه وربنا عزوجل القائل ( لا يكلف الله نفسا الا وسعها ) طيب يبقى ازاى بقى ربنا هيرزقك بحاجه اكتر من تحملك
اللى بيولد سواء طبيعى او قيصرى بيتألم جدا والله وانا جربت الاتنين بس انتى اعرفى ان اللى ربنا اختاره ليكى هوا الاصح والافضل والانسب واحمدى ربنا واهدى خالص طول ماربنا وكيلك
المهم الدكتوره قالتلى اخد حقنتين ديسكاميثازون اللى هما بتوع اكتمال الرئه وطبعا دى مش مهمه طول مانتى فى اخر التاسع وانا عن نفسى اخدت حقنه ومخدتش التانيه لانى كنت فى ميعاد ولادتى بس هيا فى النهايه مش هتاثر فى حاجه بالعكس هيا منفعه للبيبى
وكمان ياحبيباتى مادام الدكتور قال قيصرى يبقى تتوكلى على الله وتسرعى علشان متتعذبيش فى الاتنين والاخربردو هيبقى قيصرى وكمان الميه حوالين البيبى بتقل بسرعه وانتى متضمنيش لاقدر الله يحصل حاجه وبعدين تندمى واحنا اتفقنا ان الاتنين خير
فانا روحت وعرفت اهلى واهل زوجى بس هما قالوا ان الدكتوره مش عارفه ولازم نروح لغيرها ولسوء الحظ كنا يوم الجمعه بالليل ومفيش دكاتره وقعدنا نلف على الدكاتره لحد قرب الفجر ولحد مالقيت دكتور اعرفها فاتحه فدخلت كشفت عندها وقالت ان الراس عاليه و90 فى الميه قيصرى وطبعا ياحبيباتى نصيحه منى قالتاهالى الدكتوره الاولى ( ان الراس اللى منزلتش طول الشهر مش هتنزل فى يوم ) يعنى متأخريش على الفاضى لان الميه دى كارثه
والدكتوره التانيه قالت لى انى لازم قبل القيصرى اعمل تحاليل وهيا ( الهيموجلبين علشان نسبه الانيميا . وفصيله الدم وتحليل فيروسات والار اتش ) وكمان رسم قلب علشان تعرفى هتستحملى البنج الكلى ولا النصفى
المهم انى قولتلها مادام الولاده قيصرى فخلاص ادينى حاجه تهدى الوجع دا فادتنى حبوب مضاده للتقصات بس طبعا معملتش حاجه لان الطلق مينفعش معاه اى مسكن وفعلا فضلت طول الليل تعبانه لحد السبت الصبح روحت عملت التحاليل ورسم القلب والدكتور قال ينفع اى بنج عادى وروحت للدكتور اللى كنت مقرره اولد عنده لو قيصرى
روحت له على الساعه 3 وكشف عليا وقال ان الراس عاليه وانى استنى لحد يوم الاحد الصبح علشان اولد قيصرى لو الراس منزلتش
طبعا ياحبيباتى هوا عارف ان الراس مش هتنزل لكنه عاوزنى اروح له تانى يوم الصبح علشان مش عاوزنى ابات عندى فى المركز وعاوزنى اعمل العمليه الصبح واروح بالليل بدل ماعملها السبت بالليل فاضطر ابات عنده
ودا طبعا قله ضمير لانى عرفته انى عندى وجع جامد وهوا بكل هدوء قاللى لو كان عندك وجع كنتى جيتى من الصبح وانا قولتله انى جيتله الجمعه بالليل وهوا كان قافل وانى اتاخرت علشان بعمل التحاليل فراح رد عليا وقاللى انا مش هبص عليها اصلا وانا مش عاوزها فى حاجه وبعد مااتبهدلت 4 ساعات فى الشمس والطلق والميه نازله شلال راح قاللى مش عاوز تحاليل
كل دا علشان بقوا بيخافوا يفتحول مراكزهم بالليل علشان الدنيا مش امان بس الحمد لله علشان ربنا وحده عالم بحالى راح الدكتور اتصل على دكتور التخدير قالله انه فى المركز وقاله ابعت لى المدام حالا علشان ابنجها
راح وقتها بقى الدكتور قاللى اطلعى حالا على المركز وانا وراكى وفعلا على ماوصلت كان هوا ورايا ويادوب دخلت الحمام وحتى قبل ماهدوم ابنى ولا هدومى تيجى
روحت دخلت العمليات وقلعت حذائى اعزكم الله على الباب ودخلت الممرضه قالت لى اقلعى الطرحه والاندر وير وكنت لبسه عبايه قطعتين روحت قلعت اول قطعه وفضلت بالتلبيسه لانى مكنش معايا هدوم
ودخلت نمت على السرير والست رفعت هدومى لخد بطنى من فوق وحطت البيتادين وغطونى بقماش اخضر معقم ويادوب باين منى فتحه البطن اللى هيحصل فيها الفتح
والدكتور قعد يهدينى ويسئلنى هجيب ولد ولا بنت وهسمى ايه وقعد يدردش معايا شويه وقاللى لو عندك اى حاجه قوليلى وسمى واقرى الفاتحه وراح عطانى بنج كلى
بالنسبه للبنج انا بفضل الكلى لكذا سبب
اولا : انتى بتكونى ميته من الرعب والخوف ومش هتستحملى تسمعى صوت مقصات او تتخيلى فى دماغك اللى بيحصل والله انك بتكونى ميته من الخوف والرهبه وعاوزه تنامى وتصحى تلاقى ابنك جنبك
ثانيا : ابره الظهر مؤلمه واصحابى اخدوها وخلت ضهرهم يوجعهم لفتره وطبعا حساسه جدا وخطيره
وطبعا انتوا ورغبتكم فى النهايه
وفوقت الحمد لله على عياط عموره وطبعا بيبقى فيه الم اول ما تفوقى بس الدكتور بيديكى مخدر قوى يخلى الوجع محتمل وبتبقى فايقه اول ماتروحى سريرك
نصيحه ليكم
اول ما تفوقى ابدئى افردى رجليكى واتنيها واستريحى لاخر اليوم وبعدين قومى اقعدى على السرير وطبعا حد مسندك ولما تلاقى نفسك افضل قومى اقفى ولما تبقى افضل امشى خطوتين وبعدين كتيرى
لانك فى الاول بتبقى متسكنه بمسكن قوى فاستغلى النقطه دى واتمشى بسرعه علشان تروحى بسرعه وتفوقى علشان جسمك وابنك
معليش فى الاول مش هتقدر تمشى كتير علشان بطنك مشدوده ومتخيطه بس واحده واحده هتبقى قرده ^_^
ثانيا لازم تتاكدى انك دخلتى الحمام ولو مدخلتيش يبقى تاخدى لبوستين جلسرين وتنتظرى نص ساعه وتدخلى الحمام ولو معملتيش خدى اتنين كمان ودا كلام الدكتور لانك لو معملتيش هيجيلك انتفاخ وتراكم غازات فى بطنك ودا مؤلم جداااا
ثالثا : خلى عندك مسكن علشان لو تعبتى بالليل يبقى موجود عندك
رابعا : الدكتور هيكتب لك على مضاد حيوى متقلقيش منه خالص على الرضاعه بالعكس هيخفف الضغط على صدرك لان نزول اللبن بينزل شديد وبيتقل صدرك وهو هيخففه شويه صغيرين
خامسا : متقلقيش لو سخنتى شويه لانى نزول اللبن بيصصاحبه ارتفاع فى درجه الحراره فانتى ممكن تاخدى حبايه بانادول اكسترا وهتبقى زى الفل
سادسا : اشربى سوايل كتير واشربى ميه ومتسمعيش كلام اللى يقولك متشربيش ميه لان كل دى سوايل تزود اللبن وكلى كويس ومتقلقيش من اللبن ساعات يبقى قليل وساعات يبقى كتير وربنا هيبعت لابنك رزقه ان شاء الله
سابعا: الرضاعه فعلا مؤلمه بس علشان خاطرى معليش نشجع بعض ونيجى على نفسنا علشان اللبن لو مرضعتيش هينشف ولازم يرضع من الاتين وبين كل رضعه والتانيه حطى كريم بانثينول وامسحيه بقطنه بميه قبل الرضاعه
ثامنا : هيجيلك مغصه اثناء الرضاعه دى طبيعيه لان الرحم بينقبض وبينزل الدم اللى فيه واطمنى على ابنك على الصفره ومتنسيش تطعيم اول اسبوع
ومتنسيش تسجلى البيبى ^_^ ومتنسيش تدعيلى وتدعى لابنى ولزوجى دعوه حلوه بظهر الغيب واى اسئله تحت امركم ولو افتكرت حاجه جديده هقولهالكم وادعولى ربنا يتم نفاسى على خير ومعليش للاطاله بس والله نفسى افيدكم واطمنكم
ربنا يقر عيونكم برؤيه ابنائكم سالمين يارب
mama nonia mama nonia images/avatars/orangeflower.gif فتكات رائعة Fatakat 803827 مصر – مصر