السلام عليكم ورحمه الله وبركاته
عاملين ايه يا فتوكات
يا رب تكونوا بخير طبعا كلنا بنعمل مكرونه بالبشاميل مش قضيه يعنى
ولا محتاجه موضوع
بس الجديد اننى بعملها من غير نقطه زيت خالص
سواء للبشاميل او العصاج
يعنى تنفع للدايت وتنفع للى عندهم اى مشاكل صحيه او الى بيخافوا على صحتهم وعاوزين اكل صحى لاسرتهم وفى نفس الوقت طعمه لذيذ ومحدش يقدر يفرقه عن البشاميل العادى
طبعا عارفين اننا فى البشاميل العادى الدهون بتبقى اد الزيت او الزبده
يعنى لكم ان تتخيلو كميه الدهون الى بنستخدمها
كمان بنعصج اللحمه بدهون وهى اصلا حتى لو حمراء فيها دهون
المهم انا حلتلكم كل ده تعالو نشوف
المقادير للبشاميل
كيلو لبن
3 ملاعق كبار دقيق
2 مكعب مرقه دجاج ولو مش حابينه بلاش
ملح وفلفل ورشه جوزه الطيب
لغايه هنا بشاميل صحيح
اما اضافه البيضه انا بحبها علشان اللون مش اكتر
المقادير للعصاج
لحمه مفرومه ربع كيلو
عليها ربع كيلو بصل مقطع رفيع
فلفل رومى ممكن اى اضافات عاوزه تضيفيها ممكن
توابل ملح وفلفل وبهارات ورشه جنزبيل وقرفه وحبهان وورق لورا
وطبعا مكرونه بينى مسلوقه عادى
الطريقه
هنحط جميع المكونات بتاعه البشاميل على بعضها ونقلب كويس بمضرب سلك ونرفعها على النار لغايه ما تتخن ونحصل على قوام مش تخيين اووى ومش خفيف يعنى وسط
وده بعد ما طلعت من النار
شايفيين قوامها
هنحط البيضه عليها بعد ما تهدى خالص ونقلب
نجهز الصينيه ونرش زيت خفيف اووى فيها
ونحط نص كميه البشاميل على المكرونه وانا بضيفلها فلفل اسود شويه فى المرحله ده
نحط البشاميل
نحط نص كميه المكرونه فى الصينيه
وعليها اللحمه المعصجه
وبعدين نحط باقى البشاميل على الوش
وندخلها الفرن
وده شكلها طعم ولون وريحه والاهم خفيفه اووى ومتتعبش
زوووووووووووووووم
وده لما اتقطعت
طريقه العصاج واعذرونى مصورتش الخطوات لانىكنت شيلاه فى الفريزر
هنحط الحمه فى الحله من غير اى حاجه خالص لا زيت ولا سمنه ونوطى النار شويه هنلاقيها نزلت مايتها نحط البصل واى اضافات حبينها والتوابل ونسيبها تستوى عادى خالص ويبقى عندك احلى عصاج وصحى وخفيف من غير دهون
وشوفى انتى بنفسك كم الدهون الى بيبقى فيها من غير ما تضيفى حاجه
قدمت جنبها فراخ تكا والجديد اننى شوتها على الازازة فى الفرن
المقادير
فرخه سليمه
نتبلها
علبه زبادى ملح فلفل
بهارات كمون عصير ليمون خل
بصل بودره توم بودره كارى كركم
زنجبيل قرفه سماق زعتر
ونسيبها فى التبيله ده يوم بحاله
وبعدين نحطها فى الازازة مليانه مايه وعلى الفرن
وده شكلها طعمه وحلوة اووى
يا ريت تعجبكم الوصفات ده وتجربوها ومتنسوس الردود والتقييم
سلام
مواضيع هذا القسم برعاية
شروق الشمس 2024 شروق الشمس 2024 282785_28.gif ربنا يشفيكى يا أمى Fatakat 282785 مع جوزى – فى بيتى