السلام عليكم ورحمة الله وبركاته
ازيكو ياقمرات وحشتونى
ده تالت موضوع ليا فى قسم الطبخ
والنهارده جايبالكو فتة الشاورما اكله مميزة جدا ولذيذه وشيك كمان فالعزومات وكل اللى هيدوقها هتعجبه جدا جدا
نبدأ المقادير بس الله
لحمه شرايح وانا قطعتها رفيعه زى الشاورما
وتبلتها بالاتى :
قرفه بودر كتير _جنزبيل بودر _فلفل ابيض _فلفل اسود _بشرة جوزة الطيب _حبهان بودر _بهارات _بابريكا _شطه اختيارى +ورق لورا وحبهان وقرفه خشب وقرنفل محمصين اولا على النار
ومعاهم زبادى وطحينه وخل وزيت زيتون وليمون عصير وقطع او تضربيها فالخلاط
مع بصله مقطعه
وممكن تزودى مياه حتى تتجانس التتبيله كويس
وبعدين اضيف فيها اللحمه واقفلها وادخلها التلاجه اطول فترة ممكنه انا تركتها ليله
نيجى بقى للارز بالكارى ::
هدبل بصله صغيرة فى معلقة زيت زيتون فى حله على النار
واكون مجهزة رز مغسول كويس ومعلقة صغيرة كارى وورق لورا وحبهان وقرنفل وقرفة خشب وفلفل اسود حب وليمون اسود مجفف بيدى طعم خطير للرز
بعد ماتصفر البصله المبشورة اضيف الكارى والتوابل الصحيحه واحمصها ثوانى
ثم اضيف الرز واقلبه علشان يسخن وبعدين اضيف الماء المغلى والملح واغطى عليه واتركه حتى يتشرب الماء
واهدى عليه واتركه حتى يستوى تماما
نيجى بقى للعيش المحمص ::
عيش شامى مقطع مربعات
هحمصه فى معلقتين زيت زيتون مع التقليب باستمرار حتى لايحترق وبيكون اخف من قليه فى زيت غزير
شوفو بقى محمص وجميل ازاى
نرجع بقى للشاورما ::
خلاص جهزت الارز والعيش هبدأ فى تسوية الشاورما نفسها ::
وهنحتاج مايونيز وطماط وفلفل مقطع مكعبات وبقدونس مفروم وممكن اضافة بصل بس انا وجوزى مش بيحبه باين فالاكل علشان كده انا اكتفيت بالبصل بتاع التتبيله فقط
هنسخن الشوايه او طاسه تيفال كويس اوى مع معلقتين زيت زيتون
وننزل عليها الشاورما (بعد ماشيل منها قطع الليمون والبهارات الصحيحه لو مش حاباها )علشان نعملها شوك ونقفل مسامها
ونقلبها من حين لاخر مع اضافه القليل من الماء المغلى حتى تستوى ونضيف الملح اللازم
وتكون بهذا الشكل بعد ما استوت واضفت عليها معلقتين مايونيز
ثم اضيف الخضروات المقطعه
وارفعها من على النار واقلبها كويس وده شكلها
واجهز صوص الزبادى اللى هو اساس الطعم الخطير ::
علبتين زبادى عليهم ذرة ملح وبشر فص توم صغير فقط لاغير وتقلبيهم كويس اوى ودوقى احلى طعم للزبادى مع انى مش بحب الزبادى ولا باكلها لكن الصوص دى غير خالص
ونركب بقى البايركس ::
طبقة عيش محمص وعليه معلقتين من صوص الزبادى وبعدين طبقة الارز بالكارى
وطبقة عيش محمص
وبعدين الشاورما
واجملها بصوص الزبادى وورقة بقدونس
وبالهنا والشفا ياقمرات
يارب يعجبكم الطبق البسيط والمميز ده
وياري دعوة حلوة بهداية اولادى وزوجى اللهم امين مواضيع هذا القسم برعاية
miro hani miro hani سوبر فتكات Fatakat 46101 DUBIE – UAE