ازيكم يا فتوكات ده تالت موضوع ليا انزله فى فتكات ويارب يعجبكم عملت النهاردة صينية سمك ماكريل انما ايه تحفة وخفيفة جدا والمهم انها زى العنوان بدون زيت وخفيفة جدا وعملت جنبها رز بنى وسلطة والحمدلله عجبت الكل تعالوا نشوف السمك الماكريل ده صورته
جيبت كيلو سمك وهو بيطلع حوالى 3 او4 سمكات متوسطين
نعمل تتبيلة السمك وهى كالاتى :
واحدة طماطم كان معنديش بس انا دايما بحط فيها الطماطم
واحدة فلفل اخضر رومى مقطع صغير
3فصوص توم كبار مفرومين
بصلة متوسطة مقطعة صغير
جزرة مبشورة
حزمة كسبرة خضرا كبيرة ولو صغيرة هاتى اتنين لان الخضرة فى الشتا الحزمة بتاعتها كبيرة غير الصيف ونقطعها صغير
ملح
فلفل
كمون
كسبرة ناشفة
شطة لو بتحبى
2عصير لمونة كبيرة
ربع كوباية خل
ونحط كل المكونات دى على بعضها وناخد جزء منها ونفرش بيه الصينية
وبعدين نكون مجهزين السمك ويكون متنضف ونقطع الراس ونشيل الشوكة الكبيرة اللى فى النص بطول السمكة وننضفه من اى شوك ويكون شكله كده
بعد مافرشنا الصينية بجزء من الخلطة نحط السمك جنب بعض بالشكل ده
ونحط بقية الخلطة على وش السمك
وبعدين نحط فى الصينية كوباية مية
وندخلها الفرن من تحت على الصاج بتاع الفرن وبعد ربع ساعة كده نطلعها فوق على الشبكة لحد ماالمية تقل وتبدا تنشف وملحوظة مش لازم تنشف اوى يكون فيها شوية سائل بيكون طعمه جميل اوى وده شكلها لما طلع من الفرن
معلش الصورة دى مهزوزة شوية بس كانت ريحتها جميلة اوى
وعملت جنبها رز سمك وطريقته سهلة جدا
انا عملت 2 كوب رز مصرى العادى بتاعنا جيبت حلة وقطعت بصلة متوسطة وحمرتها فى شوية زيت لحد ما اتحمرت كويس ولونها بئا غامق شوية بس اوعى تتحرق وتسود اوى طعمها هايمرر الرز وبعدين تحطى الرز والمية بتاعتك وتحطى ملح ورشة فلفل اسود ورشة كمون ورشة قرنفل وقرفة حاجة بسيطة دول اللى بيدوا الطعم للرز وتسويه عادى على نار هادية لحد مايستوى
وعملت جنبها سلطة وطعمها يجنن والسر فيها حطيت فص توم كبير بشرته بالمبشرة جيبت طماطم وفلفل اخضر وبصلة والتوم دول اللى كانوا موجودين عندى وحطيت ملح وخل وكمون وفلفل وشطة وشوية مية وقلبت كله فى بعضه وسيبتها شوية قبل التقديم وبعدين حطتها فى اطباق وعجبت الكل الحمدلله مع انها بسيطة جدا
شوفوا السمك ساعة التقديم
معلش انا كنت بصور وانا فى المطبخ ملحقتش اصور وهو على السفرة لانهم كانوا جعانين جداااااااا
كان فى صور اكتر من كده بس معظمها طلع مهزوز لانى كنت مستعجلة وعايز اخلص بسرعة
يارب تكون الوصفة سهلة وعجبتكم ومتنسوش التقييم يا بنات وادعولى ربنا يسترها معايا ويكرمنى انا واختى بالزوج الصالح والذرية الصالحة اللهم امين
وان شاء الله اشوفكم قريب فى موضوع تانى باذن الله
سلام يا قمرات فى حفظ الله
مواضيع هذا القسم برعاية
بنوتة _ امورة بنوتة _ امورة 902052_1.gif فتكات متميزة Fatakat 902052 القاهرة – مصر