حبايبي واخواتي في الله انا متزوجه من 6 سنوات
عملت تاني سنه زواج منظار رحمي عشان كان عندي بطانه مهاجرة والحمد لله بعدها بقيت زي الفل وكله تمام
تالت سنه قلت اعمل تلقيح صناعي وفشل الحمد لله
رابع سنه حقن مجهري وفشل الحمد لله
خامس سنه يعني من حوالي 4 شهور عملت تاني حقن مجهري وفشل الحمد لله
من حوالي شهرين فكرت انا وزوجي نعمل تلقيح صناعي وقلت ربنا بيده كل الخير و قادر يرزقني مش بالتلقيح ولا بالحقن المجهري ما انا عملت الحقن المجهري وفشل وبعدين في صحابي اعرفهم عمله تلقيح صناعي والحمد لله نجح ومعاهم دلوقتي عيالهم اللهم بارك وده كان بعد فشل حقن مجهري برده
كل ده شجعني اني اتوكل علي الله واعمل التلقيح الصناعي الشهر اللي فات وفعلا روحت تابعت مع الدكتورة وكانت مبسوطه ما شاء الله من استجابه المبيض
بس كان في مشكله وهو تحليل زوجي بس انا دعيت ربنا كتير اوي اوي اوي وكان عندي يقين بالله
والمفاجاة
يوم العمليه توكلنا علي الله وروحنا المستشفي ونتيجه تحليل زوجي ماشاء الله اتحسنت جدا جدا حتي هوا ماكانش مصدق قلتله سبحان الله ربنا كريم وقادر علي كل شئ وبكرة افكرك ربنا حيرزقني بتؤام كمان
المهم روحت البيت وكنت حريصه جدا علي نفسي بس كنت بدعي ربنا بيقين وكمان كنت بحلم باليوم اللي حفرح فيه وحقول لزوجي وماما وبابا وحمايا وحماتي وكمان سلايفي اخيرا حتصل بيهم واقولهم الحمد لله انا حامل
المهم واسفه اني طولت استحملوني
في خلال اسبوعين الانتظار اتصلت بيا صاحبتي قالتلي انها حامل بصراحه انا فرحت جدا جدا ليها واعتبرت انها بشرة خير لانها كمان متاخرة في الحمل
وقلت في نفسي انا كمان حتصل بيكي كمان كام يوم واقولك اني حامل
من4 ايام لقيت اتصال بيقولي مش سلفتك حامل وسلفتي ماشاء الله معاها 3 عيال قلت مبروك بس في سري يا جماعه اصبروا انا اللي نفسي احمل وانا اللي نفسي اتصل اقولكم الخبر ده
بس يا حلوين اول امبارح لقيت سلفتي التانيه بتتصل بيا وبتقولي عندي خبر حلو قلتلها خير ان شاء الله قالتلي انا حامل :smiley-
قلتلها ماشاء الله اللهم بارك وسلفتي دي كمان ماشاء الله عندها برده 3 عيال
سبحان الله يا جماعه انا اللي نفسي احمل وانا اللي حتصل كمان يومين اقولكم علي الخبر اللي نفسي اسمعه من 6 سنين
والنهارده كنت مستنيه احلي خبر في حياتي
بس الحمد لله الدورة جت
اللهم ارزقني الصبر يا رب لا اعتراض علي حكمك يا رب بس انا نفسي افرح وانفسي اكون ام
مش عارفه اعمل ايه ومش عارفه ابطل عياط
اتمني تدعولي بالرضا والصبر وبالذريه الصالحه
واستغفر الله واتوب اليه من اي كلمه تحمل الشكوي او الاعتراض علي حكم الله .
ام سما وسلمي ان شاء الله ام سما وسلمي ان شاء الله 719222_1.gif فتكات متميزة Fatakat 719222 الاسكندريه – الاسكندريه