ازيكوا يافتوكات
اولا انا بحب أشكر كل واحدة استفدت منها او مااستفدتش منها ربنا يحفظكم ويبارك فيكوا انتوا اكتر والله جزاكم الله خيرا من قلبى فعلا
ثانيا ندخل على موضوعنا
عملت العيش الفينو والكيزر والكرواسون بعجينة العشر دقايق
ودى مقاديرها
المقادير
المرحلة الاولى
2كوب دقيق
2 كوب مياه دافيه
2ملعقة خميرة فورية ( انا بفضل الخميرة العاديه احسن الف مرة )
2ملعقة لبن بودرة
ربع كوب سكر
ربع ملعقه صغيرة ملح
المرحلة التانيه
3كوب دقيق
ربع كوب زيت
الطريقة
هنحط مقادير العجينه الاولى مع بعض بعد ماندوب الخميرة الاول وخلى بالك هندوب الخميرة من الكوبايتين بتوع المياه
هيبقى عندنا عجينة شبه لقمة القاضى كده نسبها عشر دقايق هنلاقيها عملت فقاقيع صغيرة كده ننزل بالدقيق اللى هما تلات كوبايات ونعجن كويس ولما تلم معانا ننزل بالزيت واعجنيها كويس اوى لحد ماتبقى زى القطنة معاكى كده وده سر نجاحها وسبيها تخمر كويس اوى وشكليها زى مانتى عايزة
وبالهنا والشفا ياقمرات
اسيبكوا مع الصور بقى
دا العيش الفينو قطعته اد بعضه
وفردته بالشكل ده ولفيته رول
وده الكيزر
وعملت هنا الكرواسون
وهنا بعد ما خمر كويس
وده السوا بتاعه من تحت
وده من جوه
وده العيش الفينو من جوه
ودى بقى اخر حاجه فى العجينه حشتها بسطرمه ولانشون وجبنه تركى ولفيته وكان طعمه رااااااااااائع صراحه
أما الحاجات الصغيرة الغريبه دى روفيده هى اللى حشتهم جبنة وصممت تسويهم مع الحاجه هى لسه مكملتش خمس سنين
كده أنا خلصت يارب يكون الموضوع عجبكم ومش عايزة غير دعوة ان رينا يبارك فى زوجى وأولادى ويجعلهم من الصالحين وإن ربنا يقومنى بالسلامة
فى رعاية الله يافتوكات مواضيع هذا القسم برعاية
ام روفيده ام روفيده 451644_6.gif فتكات متميزة Fatakat 451644 الإسكندرية – مصر