انا اللى كل وحده فيكوا كل شويه داخله تعمل موضوع عنها ومال تدينا حكم مواعظ وتقول تخلف ورجعيه والكلام احنا خلاص حفظينه كويسه فيها
ايه لما وحده تبقى عوزة تخلف ولد ايه كفرت يعنى ولا مش من حقها تحلم وتتنمى ولا انتوا كمان حتى الحلم عوزينا منحلمش فيها ايه لما
يبقى معايا ولدين ولا حتى 10 وبتمنى اخلف ولد تانى حد شريكى حد ليه عندى حاجه
فيها ايه لما وحده عوزة تخلف ولد حد حماتها قرفاها فى عيشتها وسلايفها شمتانينى فيها فيها ايه
ولا وحده جوزها بيهددها انها لو مخلفتش ولد هيتجوز عليها لان خلفتها كلها بنات وبرضوة عارفين ان الولد والبنت من الرجل مش محتاجين حد
يعرفنا
فيها لما تبقى وحدة مخلفه ولد واحد ونفسها فى اخ لابنها اظن انها معملتش جريمه يعنى
كلنا بتمنى وليا احلام نفسنا نحققها واظن ان اكبر مثال على كده لما كلنا كنا فى الثانويه العامه كلنا كنا بنتمنى ندخل كليه معينه يبقى كده برضوة حرام علينا
اما بالنسبه اننا فى مجتمع ذكورى ايوة احنا فى مجتمع ذكورى وعمر البنت ما هتبقى زى الولد ما كنش ربنا قال ( وليس الذكر كالانثى)
بصى الرجل واخد حق ازااى فى الدنيا وانتى تعرفى كم وحده فيكوا اهلها جوزها قرفنها فى عيشتها وهى صابرة ومستحمله علشان تربى العيال
انا مش بتكلم عن نفسى لان اهل جوزى اساسا معشت معاهم كتير لانى خارج مصر وبشوفهم مرة فى سنه
كم وحده فيكواخايفه ومهددة ان جوزها يتجوز عليها حتى لو هى ست كامله مكمله وده ليه لان الشرع مديله الحق فى كده والمجتمع برضوة
كم وحدة جوزها مات والمجتمع رافض انها تتجوز ولازم تقعد تربى العيال لانها لو اتجوزت تبقى سافله وقلقه الادب اما الرجل لو مراته هى اللى
ماتت عادى قشطه ادفنها واتجوز تانى لازم طبعا يتجوز علشان يعف نفسه ومحدش يقدر غلطه ليه راجل طيب مهى كمان من حقها تتجوز
كم وحده متقدرش تدخل ولا تخرج من غير اذن جوزها لكن هو رجل فله يعمل اللى هو عاوزة ان شاء الله حتى يبات بره
كم وحده فيكوا عاشت فى بيت كله بنات وشايف زله امها وهى كل شويه خايفه لجوزها يتجوز عليها علشان الولد
وغيره وغيره
عمركوا شوفتوا واحده جوزها اتجوز عليها علشان عاوز يخلف بنت لا طبعا العكس هو اللى صحيح
طب ايدكوا اكبر مثال دكتور نسا عندنا مشهور جدا اتجوز على مراته الدكتورة وحده معاها دبلوم علشان مخلفاله 4 بنات اظن ده برضوا يبقى تخلف ولا ايه
ايوة احنا فى مجتمع ذكورى البنت مظلومه فيه ظلم بين مفيش كلام البنت لما توصل لسن 25 سنه وما فوق خلاص تاخد لقب عانس من المجتمع والمفروض ترضى باى حد وتبوس ايدها شعر ودقن لكن الرجل لا ان شاء الله يبقى عنده 60 سنه لسه شاب
ولا لو البنت مطلقه ملهاش حق اصلا انها تحلم تتجوز واحد لسه متجوزش لاء تتجوزى واحد ضربه السلك والمفروض ومتتكلمش
لكن الرجل فله ان شاء يبقى مطلق وعنده طابور عيال ويتجوز وحده لسه انسه ويقعد ويحط رجل على رجل
اظن بعد كل الفروق دى محدش بقى يقول البنت زى الولد تانى ماشى
وخلى اللى عوزة تحلم تخلف ولد خليها فى حالها ماللك انتى اساسا ومالها خاليكى فى حالك
مش وحده تدخل فرحانه تقول باركولى انا حامل فى ولد داخلين تسدوا نفسها وتقوللها خيركم من بشر بانثى طيب يا سيتى افرحلها انا اهو الدكتورة قالتى احتمال بنت والله والله بفرح اوى لما الاقى وحده داخله تقول انا حامل فى ولد
والنبى يا اختى بلاش كلام الانشاء ده والحكم اللى صدعتونا بيها التخلف والرجعيه والجهل والكلام المتزوق ده علشان تبانوا بس انكوا الناس المودرين المتحضرين واحنا بقى الجاهله اللى جايين من ورا الجاموسه وانتوا اساسا فى قرااره نفسكوا ان كلامى صح كل الحكايه عاوزين تبانوا فى الصورة ليس الا
ثم تعالى هنا مين قالك ان الولد لازم يبقى بلطجى ويغلب ابوه وامه ويشحططهم والبنت بقى الصدر الحنين اللى هتشيل امها وابوها وهتبقى احسن من الولد
ليه ميكونش ولد صالح يقف جنب ابوه لما يكبر ويكون سند لامه واخواته البنات لما ابوهم يموت ويصرف عليهم
بصى كده لكام وحده جوزها مات وخلفتها كلها بنات والناس بتستهتر بيها علشان عارفين ملهاش ابن ولد الناس تهابه وتخاف منه
ياريت كل وحده تخليها فى حالها وملهاش دعوة وبحد ووفروا الحكم والمواعظ اللى داخله تقرفنا بيها لنفسكوا ماشى
ملكه الطماطم ملكه الطماطم ممنوعة من المشاركة Fatakat 1059191 الرياض – السعوديه