السلام عليكم ورحمه الله وبركاته
ازيكم يافتوكات ياحبايب قلبى ياحلوين وحشتونى خالص
النهارده جايبالكم عزومه بالصور والتفاصيل بس مش انا اللى عاملاها لا دى اعز اصحابى واختى كمان هى اللى كانت عازمانى عليها تسلم ايديها يارب وادعولها وادعولى بان ربنا يرزقنا ويرزق كل مشتاقه بالذريه الصالحه قولوا اميييييييييييييين
وطبعا مكنتش لوحدى وكان معايا ناس تانيه مش معقول هاكل الاكل ده لوحدى
اسيبكم مع الصور وبعدين الشرح
الاطباق
ممبار
كباب كوابرى
بانيه
كفته بطاطس
سلطه خضرا
توميه
سلطه مكرونه
الحلو كنافه ملوكى
التفاصيل بقى
الممبار
طبعا بنجيب الممبار من عند الجزار انا بصراحه بجيبه متنظف بدفع 5 جنيه زياده واريح دماغى من ارف التنضيف بس لما بجيبه بغسله بلمح ولمون واضبطه واخلى ريحته فله وبعدين اجهز الخلطه بتاعه الرز زى خلطه المحشى العادى بنحمر بصله وننزل عليها بعصير الطماطم ونسيبها تتسبك ونطفى عليها ونكون مقطعين بقدونس وشبت وكسبره ونقلبهم مع الصلصه وكمان الرز المغسول ونتبل بالملح والفلفل والتوابل اللى نحبها وبعدين نبتدى نحشى الممبار وبلاش نملاه على الاخر عشان ميفرقعش فى الحله وقت السلق خليكوا حونينين وبعدين ننزل بيه على حله فيها ميه بتغلى مع ورق لورى وقرفه وحبهان وبصله ونسيبه يغلى ونهدى النار شويه وناخد بالنا لو جملى بياخد وقت ولوعجالى مش بيستحمل كتير عالنار ونطلعه لما يستور ونحمره فى الزيت او السمن وبالف هنا
الكباب الكوابرىالمقادير
نص كيلو لحمه ونص كيلو رز مغسول وربطتشن بقدونس وشبت وبصلتين وسط ومعلقه توم مفروموطبعا ملح وفلفل
الطريقه
افرم البصل ومعاه الخضره كويس وبعدينافرم اللحم لوحده واقلبه مع البصل والخضره وبعدين احط التوم والرز والتوابل وبعدين اقلبه كويس واحط حته سمن بلدى وابتدى ادقه بالهون لحد ما يتجانس ومش الكبه هتفرق كتير وده كلام صاحبتى
بعد ما ندقه كويس نبتدى نصبعه صوابع كبيره شويه ونرصه بالطول فى الحله زى محشى الكوسه وبعدين اسقيه شوربه وياريت تبقى شوربه بط او فراخ بلدى ونحطه عالنار ولما يغلى نبتدى نهز الحله شويه وياريت مش نملا الحله كباب على الاخر ونسيب فراغ عشان هيريح مع السوا ونحط معلقه فى جنب الحله بالعرض ونشيلها بعد الشوربه ما تبتدى تقل ويدخل فى السوا
(ان شاء الله هعمله وانزلهولكوا بالصور التفصيليه)
البانيه
نفطع الفراخ الفيليه شرايح عريضه ونتبلها بالزبادى والمسترده والملح والفلفل وزعتر وممكن توم كمان وبعد ساعات من التتبيل نحطها فى دقيق وبعدين بيض وبعدين بقسماط ونحطها فى الفريزر شويه ونطلعها على التحمير علطول
كفته البطاطس
نسلق البطاطس ونهرسها ونحط معاها ملح وفلفل وممكن شويه لحمه متعصجه ومعلقه بقسماط ونعجنها كويس ونصبعها ونحطها فى الدقيق والبيض والبقسماط وعلى الفريزر وبعدين نحمرها
سلطه المكرونه
نسلق المكرونه ونحط عليهاحلقات زيتون وكسبره خضرا مقطعه وفلفل الوان مقطع وذره مسلوقه وبسله وجزر مسلوقين واقلبهم مع بعض
واعمل الصوص بتعها وهو عباره عن زيت وملح وفلفل ولمون وخل وشويه ميه واخلطهم وانزل بيهم على المكرونه واقلبها كويس والف هنا
التوميه
نسلق بطاطسايه ونفرمها مع معلقه مايونيز ومعلقه زبادى ومعلقه توم مفروم صغيره وملح وفلفل ونفرمهم فى الكبه ونقدمها
الكنافه الملوكى
نجيب الكنافه مثلا نص كيلو ونحطه فى الفريزر ولما يجمد نطلعه ونفرمه ونفتته كويس ونحطه مع سمن على النار ونحمرها زى الشعريه
وبعد ما تحمر نطفى عليها وننزل عليها بعلبه لبن مكثف ونقلبها كويس وطبعا بعيد عن النار ونجيب قوالب التلج ونحط فيها واحده مكسرات سودانى او لوز او زبيب ونملاه بالكنافه وبعدين نحط ربع ساعه فى الفريزر وبعدين نطلعها ونقلبها وبالف هنا
وهى دى عزومه اعز صحابى لينا تسلم ايديها بجد تعبت جدا فى العزومه دى جزاها الله خيرا
وياريت دعوتين حلوين كده وكلمتين تشجيع وتقييم حلو كده ماشى مواضيع هذا القسم برعاية
lovers4ever lovers4ever 202475_1.gif فتكات ست الكل Fatakat 202475 الزقازيق – مصر