السلام عليكم ورحمة الله وبركاته
ازيكم حبيباتى
النهاردة بفضل الله حنزلكم عزومتى الصغيرة المتواضعة لناس قرايبى
وبتأسف انى منزلتش السفرة كاملة لانى مقدرتش اعمل كده زى ماانتوا عارفين ماينفعش اصور الاكل والناس موجودة
اول حاجة عملتها اول ماجم اقدمتلهم حاجة ساقعة
وقعدوا على السفرة قدمتلهم الاتى
شربة لسان عصفور
وكلكم طبعا شاطرين فيها شوحت لسان العصفور فى الزيت لحد لما بقى لونه حلو وحطيت عليه صلصة وقلبته ونزلت عليه بالشربة الساخنة واول لما غلت علطول هديت عليه النار حتى استوت
وعملت صنف مقبلات هو سمبوسك باللحمة المفرومة المعصجة بورق الجلاش
جبت لفة جلاش وقطعتها الى اربع مستطيلات بالطول وكل مستطيل قسمته الى اتنين وخدت كل 3 او 4 ورقات مع بعض وحطيت الحشو ولفيته زى السمبوسك وقفلت طرفه بعجينة سايلة عبارة عن ميه ودقيق ورصيتهم فى صينية مدهونة زيت ودهنت وش السمبوسك بالزيت ودخلته الفرن يستوى
والطبق الرئيسى كان وراك الفراخ المخلية والمحشية رز ولحمة مفرومة متعصجة
خليت الوراك وتبلتها بمية البصل وملح وفلفل وخل وبهارات قبلها بيوم ويوم العزومة حشيتها برز متشوح مع البصل وملح وفلفل وبهارات وسويته نص سوى وحشيت بيه وراك الفراخ ومعاه لحمة مفرومة متعصجة ولفيته بالدبارة وحطيته فى ورق فويل وسلقته ثم لما استوى فكيته وسيبته يبرد وفكيت الدبارة وحمرته فى الزيت
وعملت كوسة بالبشاميل
ودى طريقتها
https://fatakat.univanet.com/#5121827
وملوخية خضرا طبعا كلنا عارفين طريقتها
تسخنى الشربة بها توم مفروم بيدى طعم حلو للملوخية لحد لما تغلى والشربة فى الاول تكون قليلة مش كتير وتنزلى بالملوخية المخروطة وتقلبى كويس اوى لحد لما تفك وتشوفى محتاجة قد ايه شربة وتاخد غلوة وتطفيها وتعملى طشة التوم والكسبرة الناشفة وتنزلى بيها على الملوخية واوعى تغطى على الملوخية علشان ماتسقطش
والسلطة الخضرا
والحلو كان فاكهة
يارب عزومتى البسيطة دى تكون عجبتكم
وحتبقى حلوة كمان لرمضان
مواضيع هذا القسم برعاية
شكشوكة بالفلفل شكشوكة بالفلفل 360618_8.gif ملكة فتكات Fatakat 360618 الاقصر – مصر
سبحان الله و بحمده