السلام عليكم أخواتى فى الله
كل عام وأنتم بخير والى الله أقرب وعلى طاعته أدوم
هأدخل فى الموضوع على طول
النهاردة عملت عيش باللحمة (وده مش أول مرة بقالى حوالى اربع سنين بأعمله)
النهاردة صورته وقلت لازم أنزلكم الموضوع
ودى الصور:
قبل ما أقول لكم المقادير والخطوات لازم نتبع الملاحظات الآتية:
1-الدقيق اللى بنستعمله نوع من اتنين (دقيق أسمر)وسعره مش غالى تمن الكيلو اربعة جنيه ونصف ومفيد جدآ،أو (دقيق أبيض) بس يكون خاص بالفطائر او البيتزا ، بالبلدى اسمه دقيق بعرق،لو اشتريتيه مغلف هتلاقى مكتوب عليه خاص بالفطائر.
2-نوعية البهارات المستعملة لازم تكون كويسة،أنا بأستعمل بهارات اسمها فايف مينتس ممتازة.
3-البصل يُقطع يدوى تقطيع ناعم (بالسكين) مش بالمبشرة ومش فى الكبة ، ليه؟
فى الكبةوالمبشرة بينزل المية بتاعته وبالتالى بيخلى الخلطة جافة
ولو شوفتى أى جزار بيعمل عيش باللحمة هتلاقيه بيقطع البصل يدوى مع ان الأسهل له تجاريآ استعمال الكبة لكن هو بيعمله بالطريقة الأفضل.
مقادير اللحمة:
1-نصف كيلو لحم مفروم
2-ثلاث بصلات متوسطة الحجم
3-اربع ملاعق كبيرة خل (بيساعد ان اللحمة تتشرب الخلطة كويس أوى)
4-قرفة
5-بهارات
6-ملح وفلفل أسود
7-شبت وبقدونس
(هذه الكمية بتكفى أربع أشخاص)
العجينة:
1-كيلو الا ربع دقيق عليه ملعقة صغيرة ملح
2-خميرة مضاف اليها ربع ملعقة صغيرة سكر(أنا بأستعمل خميرة فورية)
3-ثلاث ملاعق كبيرة زيت
بعد تخمر الخميرة نضيفها على الدقيق
ونستعمل الماء الدافئ للعجن(مالهوش مقدار معين لانه بيختلف باختلاف نوعية الدقيق)
وتترك العجينة حوالى ساعة فى مكان دافئ
وبعد ما بتخمر نبدأ فى تقطيعها كور صغيرة
ندهن النشابة(الأداة اللى بنفرد بها العجينة) بالزيت وكمان السطح اللى هنفرد عليها (لمنع لزق العجينة)
وقبل ما تفردى شغلى الفرن
أدهنى الصاج أو الصينية بالزيت
جهزتى الصاج دخليه الفرن (مش تحت أوى)
أول ما تلاقي العيش أحمر من تحت أطفى الفرن وشغلى الشواية(ورشى عليه مية بالبخاخة)
لو ما عندكيش شواية بالفرن تعملى أيه؟
أول ما تلاقيه احمر من تحت أقلبيه على وشه وهيحمر كويس
ولو عاوزة أكلك دايمآ يطلع جميل ويعجب الكل تعملى أيه؟
عن تجربتى الشخصية أولآ تُسمى الله قبل ما تبدئى تجهزى،وأثناء التجهيز بتستغفرى أو بتقولى أذكار المهم تذكرى الله ،و منها بتستفيدى بالوقت اللى بتقضيه فى المطبخ.
يا ريت اللى تجرب وتعمله تقول لنا عشان غيرها يستفيد ويتشجع
واللى عندها أى أستفسار أنا تحت أمرها
أنا خلصت كده بس ليا طلب بالله عليكم ما تنسوش تدعوا لاخواننا فى سوريا وبورما ربنا ينصرهم. مواضيع هذا القسم برعاية
أم عبدالله وعبدالرحمن أم عبدالله وعبدالرحمن 608302_9.gif فتكات متميزة Fatakat 608302 الاسكندرية – مصر