السلام عليكم
ازيكو يا فتوكاتى يا قمراتى
انا حبيت اعمل الموضوع دا عشان انا عن نفسي يا ما غلطت الغلطة دى قبل كده اللى هيا ايييييييييييه
اللى هي انى ابقي عاملة ريجيم ادخل السوبر ماركت عينى تروح لشكولاته و بيبسي و عصير جبنه رومى اهو اى حاجة غلط ونتيجة لكده لما بتاكلى بترجعى تندمى و تقولى عك بعك بقي و مش بعيد تسيبي الدايت اصلا
بس انا الحمد لله بدأت اتغلب على المشكله دى
هقولكو ازاى
اولا بقيت بركز على الحاجة المفيدة اللى متتخنش و بفكر قبل ما اخد الحاجة دى تنفعنى و لا لأ و تقري السعرات الحراريه المكتوبة عليها
هقولكو بقي على قسم قسم و اللى تحب تضيف حاجة تضيفها عشان كلنا نستفيد
وطبعا انا بتكلم على الحجات اللى تخصك انتى مش بتكلم على طلبات البيت
اولا :قسم المشروبات :
يا ريت يكون عندك كل المشروبات زى الينسون الكركديه الكرايه التيليو القرفه الشاي الاخضر النعناع
كل الاعشاب دى مفيده و صحيه و ياريت تشربي منها كتير اثناء الدايت
و الشاي و القهوة تقلل منهم قدر المستطاع
طبعا بلاش الكابتشينو و الكريمر و الحجات دى
ثانيا :قسم المعلبات
عندك التونة و السردين
و الكورن فليكس اللى هو رقائق الذرة بلاش الحجات التانيه عليها سكر
و الشوفان
ثالثا:ندخل بقي على قسم الجبن و الالبان
عندك جبنه قريش و لو تعرفي تجيبيها من فلاحين يبقي افضل
و ممكن تعمليها بالزبادى و الزعتر بتبقي ممتازة
و الجبنه التلاجة و الجبنه اللى بالزيتون
و جبنه فيتا لايت
و جبنه نستو لا فاش كيري دايت دى ب 5 جنيه
و جبنه شيدر بريزيدون لايت ب 8 و نص
و طبعا الزبادى واللبن الرايب و اللبن
العصير افضل حاجة اثناء الدايت عصير اناناس بيور لان الاناناس بيساعد على الحرق و العصير دا خالى من السكر
لو نفسك فى حاجة ساقعه خديها دايت بس بلاش تكترى منها عشان هيا غلط بردو
رابعا:قسم الدايت
هتلاقي سكر سويتال
و دا افضل سكر دايت على الاطلاق لانه خالى من الاسبرتام
بسكوت شوفان و بسكوت نخاله دا لو حبيتي تاكلى بسكوته واحدة و لا حاجة و فى بسكوت دايجستف بالحبهان مفيد اوى بردو بس خليه فى اليوم المفتوح لان بسكوته كبيرة اوووى
فى كمان بسكوت توك المملح و دا ممكن تخديه بدل وجبه كنوع من التغيير
خامسا: الزيوت افضل ويت هو زيت الزيتون و زيت الذرةو زيت زهرة الشمس
و بالنسبه للسمنة اصح حاجة السمنة البلدى بلاش النباتى عشان خطر جدا و اتمنعت انها تتعمل برة اصلا لو مش عندك القدرة انك تجيبي سمنه بلدي خليكي فى الزيت احسن و اصح
سادسا:المخبوزات
طبعا العيش السن اساسي و ياريت لو تجيبيه طرى بيبقي طعمه روعه فعلا و البقسماط السن كويسة بردو و لو مش عاجباكى ممكن تجيبي بقسماط سادة تفطرى ب 2 منها
طبعا بقي مش هنروح ناحيه المربي و الحلاوة و الطحينه و الحجات دى متروحلهاش احسن
سابعا: الفاكهه و الخضراوات
الخضراوات خليكي حريصه ان يكون دايما عندك خيار و جزر و طماطم جامده دول للاكل خضرا كده مع الفطار او للسلطه
و يبقي عندك فاصوليا و كوسة و جزر للخضار السوتيه
و الحمد لله الفترة دى عندك القرنبيط و الكرنب حلوين اوووووووى ضيفيهم على شوربه الخضار مفيدين اوووى و هيخسسوكى
الفاكهه بقي الحمد لله اننا فى الشتا دلوقتى كل الفاكهه جميله و تنفع فى الدايت
عندك تفاح برتقال يوسفي كيوي جوافه موز (واحدة بس فاليوم )
ثامنا:قسم العطارة :
هاتى بردقوش
مريميه
حبه البركة
الزعتر
سنامكى تخديه كل اسبوع كده او لما يكون عندك امساك بس
لكن البردقوش و المريميه و الزعتر و حبه البركة حاولى تشربيهم دايما
دى الحجات اللى انا افتكرتها و حبيت افيدكو فعلا عشان انا فعلا حسيت بفرق لما بقيت احد انا محتاجة ايييه قبل كده كنت بدخل السوبر ماركت اشوف اييه عاجبنى و سايبه نفسي كده تروح لاى حاجة
لكن بفضل الله و نعمته عليه دلوقتى بقيت محددة اكتر و مركزة اكتر الحمد لله
و اللى عندها اضافه تقولهالنا يمكن تلفتى نظرنا لحاجة مش واخدين بالنا منها او كده
و يارب نخس كلنا بقي بصحه و عافيه و نقدر فعلا نعيش حياه صحيه و سليمة سواء تخان او رفيعين
و افتكرو دايما ( ان الله لا يغير ما بقوم حتى يغيرو ما بانفسهم )
يعنى اعملى اللى عليكي و اجتهدى و تاكدى ان ربنا معاكى و مش هيضيع تعبك ابدااااااااااااا
و دعواتكم ليا بقي بالزوج الصالح و الخسسان
farida010 farida010 425321_2.gif سوبر فتكات Fatakat 425321 مصر – مصر