السلام عليكم ورحمة الله وبركاتة
مساءكم زى العسل
صلو على حبيبكم وشفيعكم يوم القيامة صلى الله علية وسلم
اليوم هقدم لكم طريقتى المفضلة فى طبخ القلقاس من الاول للاخر بالتفصيل
وعملت ارز ابيض محمر بالفلفل الاسمر طعمة حكاية
وطبعا الفراخ عادى جدا غسلتها بملح وخل وليمون ونضفتها كويس وسلقتها وبشوربتها الجميلة عملت القلقاس الزبدة دة
واليكم التفاصيل
المكونات
قلقاس انا جبت كيلو قلقاستين متوسطين الحجم
حزمة سلق و2حزمة كسبرة
ثوم
الطريقة
اولا انا بنضف القلقاس بتاعى بالطريقة دى فى ناس بتغليلة ماية وتغسلة كذا مرة وحوسة
انا بقى عارفين بعمل ايه بمسحة اة والله بمسحة ومتعمليش كدة
اكيد فيكم ناس عارفة الطريقة دى سهلة جدا جدا وكمان مبتاخدش وقت وهى كالاتى
تجيبى قطعة قماشة بيضاء نظيفة جدا وتخصصيها للقلقاس مخصوص
وتجيبى سكينة وتقشرى القلقاس عادى جدا وتقطعية وكل متقطعى شريحة تمسحيها وبعدين تقطعى مكعبات وبكدة هيكون قلقاس نضيف وزى الفل وطعمى زبدة ولا فى المواد الازقة اللى انتو عارفينها ولا اى حاجة خالص
شوفوا بقى زى الفل ازاى
بعدين بحضر السلق بتاعى بقطع حزمة السلق مع حزمة كسبرة وبحطهم على النار يخد غلوة عشان اعرف اضربهم فى الخلاط
وبعد كدة بحضر التقلية اللى هى 3 فصوص ثوم بدقهم فى الهون وعليهم بقطف ورق الحزمة الثانية من الكسبرة وبدقهم جدا
طبعا بتكونى عندك شوربة بس شوربة تكون شوربة مش اى كلام عشان القلقاس يطلع معاكى زبدة
باخد شوية شوربة فى حلة وبحط القلقاس عليها وطبعا بتكونى انتى حطة ملح من الاول فى الشوربة فمش هتحتاجى تحطى ملح
وبعدين بنضيف عصير السلق المضروب فى الخلاص معلش بقى الصورة مش اد كدة بس المهم ان القلقاس يطلع اد كدة
بنسيبهم بقى ياخدو غلوة واحنا كدة سايبن القلقاس يستوى
نروح محمرين التوم بالكسبرة اللى احنا دقنهم كدة
نبص بقى على القلقاس هنلاقية اخد غلوة واستوى
نضيف بقى التقلية دى على القلقاس وتشمى احلى ريحة بقى وتدوقى احسن طعم
ودا طبق تشويقى مبدائيا
نيجى بقى لطريقة عمل الارز
والطريقة دى بقى هتخليكى متبطليش تعملى ارز بجد روعة والحباية بحبايتها
اولا ينقى الارز ثم يغسل جيدا ويوضع فى مصفاة
ثم نحضر الحلة اللى هنعمل فيها الارز وهنضع فيها معلقتين سمنة
ثم نضع الارز على السمنة ونقلبة بحيث ياخد شكل اللون الدهبى الفاتح مش يبقى غامق زى الارز حباية وحباية لا هو هيكون ابيض بس مصفر شوية هكذا بس الصورة مش موضحة اوى
وبعدين نحط معيار الماء المعاير وكمان انتى ممكن تحطى ربع الماء دى لبن بيبقى طعمى جميل جدا انا عن نفسى عملتة بالماية بس محطتش لبن وكدة حلو وكدة بردة حلو وطبعا بنحط نص معلقة صغيرة فلفل اسمر وطبعا الملح المناسب
بنسيب بقى الارز يستوى حتى يتشرب شايفين بقى الجمال والفلفل الاسمر شكلة يهوس ومش بس كدة داكمان تحسى ان الارز مفلفل ومش معجن بجد جربية وانتى هتتعودى انك على طول تعملية
بتوطى علية وبتحطى الشياطة وتنسيةبقى لاغاية ميستوى كويس
وهنا لما استوى خالص
كدة احنا خلصنا عمل القلقاس والارز
والف هنا وشفا ودى صورة تشويقية جماعية للعائلة الكريمة قصدى للاكلات الشهية اتفضلو
لو عجبتكم الاكلة متبخلوش وقيموا احسن انتو عارفين انا ممكن اعمل ايه خديها من اصرها يافتوكة كدة ودوسى على خامس لمبة حمرة احسن اعمل فيكى كدة وكمان كدة
وكمان مش هكتفى دا كمان هطلعلك كدة
ههههههههه بهزر هو انا اقدر اعمل كدة فى فتوكاتى حبايبى دانتو اخواتى والله ربنا يخليكم ليا ويخليكم لازواجكم واولادكم امين يارب
ارجو منكم دعوة حلوة بتسيير الحال والرزق بالذرية الصالحة امين يارب
فى رعاية الله مواضيع هذا القسم برعاية
النانو النانو 744042_2.gif فتكات رائعة Fatakat 744042 اسكندرية – مصر
سبحان الله و بحمده