بسم الله الرحمن الرحيم
ازيكم يا فتوكات يارب تكونوا بخير و مصر كلها بخير و سوريا و فلسطين و العراق و كل بلاد المسلمين يارب و ربنا يرحم شهدائنا و يسكنهم فسيح جناته يارب العالمين
كان يا ما كان و ما يحل الكلام الا بذكر النبى عليه الصلاة و السلام ( قوليها بلسانك مش بعينيك ) كان فى فتوكة اسمها صافية و كان عندها جبنة قريش حاطها فى التلاجة بعدين جالها جبنة قريش تانى فقالت لو حطيتها هى كمان فى التلاجة هاتبوظ قامت جايبة الجبنة و رشت عليها ملح كتير اوى و حطتها فى التلاجة برضه و لما الجبنة الاولى خلصت جت تاكل الجبنة التانية لقتها حادقة اوى و كمان لقتها جمدت شوية عشان الشرش اللى فيها كله نزل و ماعرفتش تاكل منها ؛ قامت صافية قالت خلاص اعملها جبنة قديمة و خسارة انى ارميها و حرام علي مع ان محدش بيعمل جبنة قديمة وزن 1 كيلو اقل حاجة 10 ك بس مش مهم
المقادير
ا كيلو جبنة قريش و تكون مافيهاش شرش و جامدة ماسكة نفسها كده
كيس و نص ملح
ملعقة صغيرة مليانة شطة او زى ماتحب
1) نجيب صينية و نحط فيها كيس ملح و ملعقة الشطة بعدين نحط ع الجبنة الخليط ده بحيث انها تبقى ملفوفة كويس جدا جدا بالملح و الشطة (دى اهم خطوة عشان الجبنة ماتبوظش )
2 ) نحط الجبنة فى مصفاة بلاستيك و لو الكمية كبيرة نحطها فى حاجات كبيرة وهى معمولة من الخوص ( ممنوع انها تتحط فى حاجة معدن عشان الملح هاياكل المعدن )
3 ) نسيب الجبنة 3 ايام او 4 لحد ماتنزل الشرش اللى فيها طول ما بتنزل شرش نسيبها
بعد ما الجبنة جمدت و بطلت تنزل شرش نجيب البرطمان اللى هانحطها فيه و نغسله كويس و نشفه و نحط فى قاعه ملح بعدين جبنة يعنى طبقة ملح و طبقة جبنة و هكذا و هانيجى على وش الجبنة و نثبتها كويس علشان اما نحط الشرش ما تعموش فيه
المقادير التانية
1 ) 2 كوب شرش + ملعقة صلصة فلفل و نغليهم كويس جدا و نسيبهم لحد ما يبردوا تماما
( اهم شئ الشرش يكون بارد جدا اهم خطوة فى الجبنة القديمة )طبعا ممكن تستغنى عن الفلفل هو للون بس و ممكن لما الشرش يبرد تحطى كركم برضه للون
2 ) كوب مش نظيف جدا و متصفى و زى الفل
الشرش المغلى و المش هما الاساس و انت بتحط الكمية اللى انت عايزاها منهم بس اهم حاجة انهم يبقوا اعلى من الجبنة يعنى مغطيناها و المش يعتبر خميرة الجبنة و كل ما كميته زادت كل ما الجبنة اتعملت اسرع
3 ) اضافات لتحسين الجبنة و سرعة عملها و يمكن الاستغناء عنها
ملعقة كوزبة و هى نخالة السمسم
( رحت اشتريها من السرجة الرجل قاللى اقل حاجة 15 ك جبنة بتاخدى ليهم نص كيلو كوزبة قولتله انا عاملة كيلو ادانى ملعقة و الكيلو ب 30 ج )
4 ) ملعقة عسل اسود
5 ) نصف ملعقة حلبة مطحونة و انا استغنيت عنها
ممكن كمان تحط قشر يوستفندى بس انا ما حطيتش
نحط كل الحاجات دى على بعضها و ندوبهم كويس اوى و نحط عليهم ملعقتين تلاتة كبار ملح و نصبهم على الجبنة بحيث انهم يغطوها و نغطيها كويس و نسيبها شهر بالكتير
و دى صورتها بعد شهرين انا فتحت عليها يمكن بعد اسبوعين بس دلوقتى احسن لان الجبنة كل ما تقعد بتبقى احس
اهم اهم اهم من طريقة العمل و الخطوات دى كلها ان الجبنة تكون حلوة و ناعمة مش متفلة لان الجبنة لو مش حلوة لو سيبتها سنتين برضه هاتبقى جامدة لكن لو ناعمة خلال 30 يوم بس هاتبقى زى الزبدة
الموضوع حصرى و لاول مرة على فتكات و من مجهودى الشخصى يا قمرات اتمنى يعجبكوا ان شاء الله
و دى كانت طريقة امى و هى ربنا يخليها دايما بتعملها كده انا اول مرة اعملها لانى كنت بشترى و ساعات امى بتدينى بس بتاعة امى احلى الف مرة و جربوها و على ضمانتى و ان شاء الله تعجبكوا و حتة الجبنة اللى فوق دى من بتاعة امى
لو الموضوع عجبك قول جزاك الله خيرا لو شايفة انه ممكن يفيد غيرك ممكن تقيم يا جميل مواضيع هذا القسم برعاية
صافية الروح صافية الروح ممنوعة من المشاركة Fatakat 708298 القاهرة – مصر
