السلام عليكم ورحمة الله وبركاته
كل سنه وانتم طيبين ياحلوين وعيد سعيد عليكم اعاده الله علي امة المسلمين جميعا بالخير واليمن والبركات .
بصوا بقي يا حلوين بما ان العيد قرب قلت لازم اعمل لفتوكاتي حبايب قلبي طبق من اطباق لحمة العيد ويارب تعجبكم ندخل بقي علي المفيده يلا
ونقول بسم الله الرحمن الرحيم ومش ننسئ يافتوكات نقول دعاء سيدنا ابراهيم عليه الصلاة وسلام ( اللهم لا تفضحني في ضيفي ) واحنا بنعمل اكل العزومات علشان ربنا يبارك في الاكل ومش يبوظ ومحدش يقوم جعان الكل يبقي شبعان وتمام التمام
اقولك سر كمان لما تكوني بتطبخي وانتى واقفه شغاله افضلي قولي اسم الله الحسني يا وادود ياوادود علشان ربنا ينزل الموده في اكلك وكل اللي ياكل منه يحبك ويحب اكلك ويسلام لو كان جوزك والولاد
يلا اسكت بقي رغيت كتير ندخل علي المفيد
طريقة عمل الستيك المشوي
اولا حنجيب حتة لحمه حلوه زي دي ونقول مشاء الله
حنحضر التوابل بقي مسطره وصويا صوص وعصير لمونه ومعلقه خل بلسمك لو متاح (خل العنب) ويمكن استبداله بخل تفاح او عادي واوريجانو وزعتر وورقة لوري ومعلقة كاتشب وبهارات وملح وفلفل وشوية قرفه بسيطه بصي بقي لو عندك كيوي ممكن تحطي نصف واحده بيطري اللحم جدااا ومش بياثر علي الطعم ده بيدي نكهه حلوه جدا وبصله صغيره.
بصي يافتوكه انا طول موسم البرتقان بنشف القشر واطحنه واحطه بودر في برطمان اسحب منه مع تتبيلة اللحوم والفراخ بيدي طعم خرافه لو مش عندك ممكن عصير برتقان عادي ونضرب كله في الخلاط .
ونظبط اللحمه بالتتبيله وننغزه بشوكه علشان تشربها ونغطيها بفويل وعلي التلاجه وكل منطول المده يكون احسن وبعد منطلعها من التلاجه نجيب الفويل اللي كانت متغطيه بيه ونبطن بيها الصنيه
ونجيب شبكه الي بنطلع عليها الكيك او لوعندك شويه كهربائيه ناخد الشبكه بتاعتها ونحطها في الصنيه وعليها قطعة اللحم بحيث تكون اللحمه مرفوعه علي الصنيه علشان لما تنزل مايه تكون بعيد عن اللحمه زي الشوايه بظبط .
وبعدين نحطها في الفرن علي الصاج وحراره عليا وممكن تقلبيها بعد نص ساعه علي الوش التاني علشان تستوي كويس وبعد كده نحطها في الشوايه تاخد لون واول لما نطلعها نكون محضرين الفحه السخنه بشوية زيت نحطها مع اللحمه ونغطيها علشان طعم الشوي .
طبعا شايفين شكل الفويل مطرح الشوي مسود ازى حنرميه في الزباله وهتلاقي الصنيه زي الفل ولا تتعبي نفسك في دعك صوانى وشوايات وبالف هنا وشفه وعيد سعيد عليكم .
اللهم تقبل موضوعي هذا لخالص وجهك الكريم واجعله صدقه جاريه لي في حياتى وبعد مماتي لكل من انتفع به في شئ
مواضيع هذا القسم برعاية
asmaa85 asmaa85 328833_1.gif فتكات هايلة Fatakat 328833 مكان ما ؟ – مش حيفرق معاكم