حبايبى الفتوكات النهاردة هوريكوا صور عزومتى يارب تعجبكوا
انا نزلتها علشان ادى افكار لاى حد عايز يعمل عزومة شيك وممكن تجهزى كل مكوناتهها وتحطيها فى الفريزر
يعنى يوم العزومة يدوبك على السوى
معلش ياحبايبى الصور مش واضحة لانى كنت بصور وهما بيخبطوا
هقولكوا بقى عملت اية
كفتة مشوية
كبيبة
شيش طاووق
عرق لحمة باردة
رز بالخلطة والمكسرات
جلاش بالحمة المفرومة
لسان عصفور بالحمة
سلطة خضراء وسلطة زبادى
طبعا ياجماعة الكفتة تبلتها اول ما جبتها وعلى الفريزر
الشيش طاووق تبلتة وعلى الفريزر
الكبيبة نفس الكلام
عرق اللحمة عملتة وسويتة واستنيت لما برد وحطيتة فى كيس فى الفريزر
اللحمة عصجتها للجلاش والرز
يوم العزومة كنت مستريحة جدا لان التجهيز المسبق شىء مهم
وكمان ياجماعة دايما اختاروا فى العزومات النواشف بلاش الحاجة الى فيها شغل
كتير وفى الاخر بتترمى وبلاش الطبيخ لاننا فى حر
اتمنى تكونوا استفدتوا ولو بفكرة واحدة من هذا الموضوع واى سؤال انا تحت امركوا
ياجمل واحلى فتوكات بحبكوا قووووووووووووووى
اولا: طريقة الكفتة المشوية
ودى سهلة قووووووووى كل كيلو لحمة علية 4بصلة متوسطه
وكبشة بقدونس وملح وفلفل
نبشر البصل ونعصرة من ميتة وبعد كدة نحطة على الكفتة مع البقدونس
اهم حاجة علشان متفكش وتبقى ماسكة نفسها نفرمها كمان مرة مع المكونات دى ونصبعها على ايد معلقة خشب ونرصها فى الصنية لو عندك دهن ضانى ابشرية على الصوابع لو معندكيش تحطى معلقة سمنة ودخليها الفرن واوعى تحطى مية هى هتنزل ميتها وتستوى فيه
ثانيا: الكبيبة
ربع برغل مغسول ومنقوع ربع ساعة ونعصرة من الماء كويس جدا
بنحط معاة نص لحمة مفرومة وبصلة معصورة من الما ء
وملح وفلفل ويفرموا فى الكبة
عصاج لحمة مفرومة للحشو
بنجيب خلطة الكبيبة ونعملها كور ونخرمها بصباعنا من الوسط ونحشيها لحمة مفرومة
ونقفلها ونرصها فى الصنية
ونحط عليها سمنة وندخلها الفرن
ثالثا :عرق اللحمة الباردة
انا بجيبة من عند الجزار متنضف ومربوط جاهز
انا بغسلة تحت الماء وبعد كدة بعمل فية عدة خروم واحط فيها فصوص توم
واجيب صنية علة قدة واشوحة فيها مع قطع بصل وجزر
وارش علية ملح وفلفل واشوحة لحد ما لونة يبقى بنة
بعد كدة بسوية فى حلة الضغط مع شوية ماء يدوبك يغطوة
وفى ناس بيعملوة فى الفرن بس بياخد وقت طويل
رابعا الشيش طاووق
انا تبلتة بزبادى ومية بصل وكام فص توم وملح وفلفل وبهارات فراخ
وخل كل دة على الفراخ وحطيتة فى كيس وعلى الفريزر
لما طلعتة وساح قطعت فلفل اخضر واحمر واصفر وبصل مكعبات ورصيتة فى الاسياخ وعلية رشة زيت خفيف بعد ماستوى فتحت علية الشواية وولعت فحمة كبيرة وحطيتها فى وسط الشيش طاووق
علشان تبقى زى المشوية
مواضيع هذا القسم برعاية
kokoxx91 kokoxx91 448136_3.gif فتكات ست الكل Fatakat 448136 القاهرة – مصر