سلام عليكم
انا كنت عاملة الموضوع ده
https://fatakat.univanet.com/#4844224
لعزومة والعزومة اتعملت والحمد لله وعدت على خير وجبتلكم الصور
اتفضلوا معايا:
جبت كيسين مكرونه اسباجيتي وسلقتهم وغسلت المكرونه واديتها رشة زيت وركنتها على جنب
جبت بصلتين كبار وحمرتهم مع قرن شطة حامي وكنت خاليف فرخة محترمة ومقطعاها مكعبات حطيتها ع البصلة ونرش بقي كاري وكركم وملح وفلفل وتوابل فراخ وشطة وكزبرة
ونقلب شويه لحد ما الفراخ تدبل وتحمر وحطيت 3 معالق بسله وقلبت لحد ما احمرت وزودت كوبايتين كبار ميه وغطيت لحد ما الفراخ والبسلة استو كنت عملت البشاميل وحطيت شويه من البشاميل ع المكرونه وقلبت كويس
جبت صينيه بيركس كبيرة لان الكمية دي تكفي معاكي ل 9 او 10 اشخاص وحطيت 1/2 المكرونه وبعدين حطيت الفراخ وبعدين طبقة مكرونه
ونغطي بالبشاميل ورشيت جبنه رومي مبشورة ع الوش وحطيتها في الفرن
الكوسة بالبشاميل:
جبت 1 ك كوسة كبيرة وقطعتها شرايح وسط متكونش كبيره عشان متستويش ولا رفيعه تتهري وشوحتها في معلقتين زيت
وجبت البركس وحطيت 1/2 الكوسة وحطيت عليها 1/2 ك لحمة مفرومة متعصجة وعليها معلقتين صلصة وحطيت باقي الكوسة وغطيت بالبشاميل وعليه رشة الجبنه الرومي اياها وع الفرن بس طلعت حلوة اوى الحمد لله وعجبت الكل
الممبار
جبت كيلو ممبار وغسلت بالخل والملح وقلبت ونضفته بالسكينة ورجعت غسلته تاني بالملح والخل وشطفته وحطيتله ميه وخل وسبته فيهم يجي 3 ساعات كده وشطفته وقصيته اطوال تقريبا شبه بعض
وجهزت الخلطة انا بحبها مسبكةمش ني في ني
حمرت بصل وحطيت عليها فص توم وفلفل اخضر (بموت فيه في الاكل ) وحطيت عليها صلصه طماطم وعصير طماطم وسبتها تتسبك لحد ما بقت تمام التمام تبلت بقي الملح والفلفل والكزبرة الكتيييير وحطيت الارز المغسول الناشف وعليه الشبت والبقدونس وقلبت كويس فيه ناس بتحط نعناع ناشف انا مبفضلوش
وحطيت رشة زيت محترمة وقلبت وحشيت ومزودتش الارز عشان يطلع مفلفل وحطيته في ميه بتغلي ع النار واديته لوري بقي وملح
ويطلع يتحمر ويتقدم وتحته البقدونس المقطع
كان عندي بقي في الفريزر من شم النسيم طلعته ونزلته في ميه مغليه دقيقتين كده فك وبنفس الخلطة اللي فاتت حشيت ورصيت وشويه صلصه ع الوش وشسرايح ليمون للي بيحبه حادق
جبتها جاهزة م السوبر ماركت هههههههههههه وحشيبتها شويه بجبنه مثلثات وشويه بعصاج اللحمه بتاع الكوسة وشويه من الفراخ بتاعت النجرسكو
بس بقي والباقي كله انتو عارفينو
وعملت رمان
جبت الرمان وفرطته وحطيته في الكوبايات وحطيت عليه شربات فراولة بعد ما خففته بقي شكله حلو اوى وطعمه زي بتاع بره
وعصير جوافه وحطيتله فانيليا وحطيت في الكاس شويه عصيرجوافة تقيل شويه وعليهم شويه شرباتفراولة وبعدين جوافه وع الوش نقطة شربات وتنعكشيها بالشاليمو زي الشرايط كده بيبقي الشكل حلو اوي
الحلويات بقي مفيش داعي احكيلكم عليها عملت سويسرول طلع وحش موووووووووووت
وكيكة شيكولاته وجيلي بس محدش كل كلهم قالو مفيش مكان واهم مشرفين في التلاجه اتفضلو معانا
دعواتكم ليا بالذرية الصالحه احسن هموت وابقي ام واطلع عين ولادي اللي اتاخرو اوى اوى عليا
مواضيع هذا القسم برعاية
loyal friend loyal friend 880882_2.gif فتكات متميزة Fatakat 880882 القاهرة – مصر