هووووووى اصحابى
ام نغم معاكم
تعالوا شفوا غدايا المتواضع انا و جوزى و زعبولتى نغم حبيبة ماما
نبدأ بسم الله
الجمبرى :
نغسل الجمبرى ع السريع بميه و ملح علشان الميه الكتير بتخليه يشد و ما يستويش .و من غير تقشير ، نحطه فى حلة على النار و عليه بصلة مقطعة مكعبات و ملح قليل و كمون و رشة كسبرة و فص توم كبير مبشور و شطة لو تحبى و غطيه و على نار هادية و هو هينزل ميته و يشربها و يستوى فى حدود 15 دقيقة او اقل .و هنلاقى لونه اتغير على طول و بقى اورنج ….
و ممكن تضيفوا للجمبرى ربع كوب ميه لو ما نزلش كتير
كده خلص الجمبرى ندخل على اسهل صوص من تأليفى بس هيعجبكم و الله
فى طاسة صغيره هنحط معلقة زيت و فص توم مبشور و معلقة صغيرة كارى و نفضى علبة زبادى عليهم على طول و نضيف عليهم شوية من الميه اللى الجمبرى نزله اخدها فى كوب و ادوب فيها معلقة دقيق كبيرة و اضيفها للطاسة علشان يبقى قوام الصوص حلو ، و نقلب و نطفى كده خلص و قوامه بيبقى تقيل زى الكاتشب كده.و نضيف شوية زعفران بيدى منظر حلو (اختيارى)
و ده صورة الجمبرى و الصوص و طريقة تقديم حلوة
ندخل على السمك :
بنجيبوه متنضف نغسله من جوه و بره كويس بالملح و نشطف و نصفى و نحضر الخلطة اللى هى (ملح-كمون-كسبره – ثوم و فلفل اخضر مفروم- رشة بهارات )
و هنعمل فتحات فى السمك من بره بالسكينة من الجهتين و نحط الخلطة جوه و فى الفتحات دى علشان تبقى السمكة كلها متبلة كويس و بعدين نحط فى الدقيق و على الزييييييييييت الغزير على نار متوسطة انا عادةً بضيف سمسم على دقيق القلى بيدى منظر حلو بس هنا نسيت
ندخل على الارز :
نقلى بصلة مفرومة فى الزيت و لما تصفر نضيف معلقة صغيرة كارى و كركم و نقلب و بعدين نضيف الميه حسب كمية الارز و الملح و لما الميه تغلى نضيف الارز و نغطى لحد ما يغلى و الميه بتكون مغطية الارز و اعلى ب 3 سم كده و نسيبها على نار عالية لحد ما تغلى و الميه تقل شوية و بعدين نوطى النار خااااالص لمدة 10 : 15 دقيقة لحد ما يستوى
و دى صورة للارز
و الطحينة :
نحط الطحينة و عليها شوية ملح و رشة كمون و ومعلقة خل و ميه مغليه و نقلب
و سلطة خضار :
سلطة عادية طماطم و فلفل و بصل و جزر و خيار و بقدونس ( ملح و خل و لمون )
و صورة للجميييييييييييييع يلا اضحكواااااااا علشان الصورة تطلع حلوة
و على رأى المثل اللى انا ألفته قدر تتقدر و قيم تتقيم و على الله حد يخرج من غير ما يقيم
مواضيع هذا القسم برعاية
نغم بتحب ماما نغم بتحب ماما 616334_10.gif فتكات ست الكل Fatakat 616334 القاهرة – مصر