اذيكوا يابنااات انا من فترة كدة كنت عملت سمان محشي رز على غير عادتي لانى كنت دايما بحشيه بصل بس المرة دي كان طعمه حلو اوي وقلت ميغلاش على فتوكاتي حبيباتي
المهم نبدأ بالمقادير
الاول طبعا السمان
والحاجات اللي هاننضف بيها السمان دقيق وملح وليمون وخل
بصل متقطع صغير
وطبعا رز وكمان بهارات
نيجي بقى للطريقة
اول حاجة نتوكل على الله ونسمي بالرحمن ونجدد النية عشان ناخد ثواب
بعد كده نغسل السمان تحت المية كويس وننضفه ونشيل الحاجات اللي جواه ونحطه في طبق غويط ونغسله بالدقيق والخل والملح والليمون عشان ميبقاش فيه اي زفارة بالشكل ده ياقمرات
ونكون ناقعين الرز في مية
نحط زيت على النار ولما يسخن نحط عليه البصل اللي احنا مقطعينه وتكة هنا حلوة اوي انك تحطى شوية فلفل اسمر على البصل هايخلى ريحته حلوة اوي
ونحط الرز يتصفى كويس
ولما يدبل البصل ويتحمر نحط الرز ونقلب كويس ونحط البهارات اللي احنا بنحبها بالشكل ده
واول ما الرز يقرب يستوى نطفى عليه وهايبقى شكله كده
وبعد كده نحشى السمان ونخيطه بخيط نضيف او نعمله بخلة اسنان عشان الرز مايقعش منه وهو بيستوى وده شكله بعد ما حشيته
ونقطع بصل ونحطه مع السمان
ولما ببقى بالشكل ده نحط فوقه مية دافية ونوطي عليه
وكمان فضل معايا شوية رز من حشو السمان طبختهم
وده شكل السمان لما استوى وطلعته من الشوربة
وحطيته في الفرن يتحمر بس بصراحة اللي بيتحمر في الزيت بيبقى احلى بس نعمل ايه بقى في الدايت وسنينه
وهنا لما اتحمر وحطيته على الرز لما استوى والرز هو اللي كان حلو اوي بجد
سامحونى مش بعرف ازوق او اعمل اي اشكال في التقديم بس انتوا جربوا والطعم هو اللي هيشهد
يارب تكون الاكلة عجبتكوا وانا مش خبيرة في المطبخ بس لما حاجة تطلع حلوة بحب اشارككم بيها
مواضيع هذا القسم برعاية
لولو الكتكوتة لولو الكتكوتة images/avatars/sunset.jpg فتكات ست الكل Fatakat 13840 عجمان – الإمارات