السلام عليكم يا بنات
كل سنة وانتم جميعا بخير وربنا يكفينا شر يوم 30 يونيه ربنا يستر
المهم بقى انا كنت مرة مع ابنى فى التدريب وكان عاوز يشترى فشار كالعادة
رحت اشتريله لقيت اللى واقف ع الماكينة ولد صغير يدى على ثانوى كده وكان حاطط فوق ماكينة الفشار علبة بيكنج باودر وعلبة فانيليا وعلبة ملح
انا طبعا سألت هو انا هقف ساكتة ده حتى يبقى عيب
هو ده بيكنج باودر للفشار قاللى وهو بيبص حواليه ..ايوة .. كأنه بيقولى سر بيكاتا ابو شقرة
بس بقى اتكسفت اسأله بتعملوا بيه ايه
وبعدها بكام يوم كنا فى البيت ابنى طلب منى فشار تانى وافتكرت انى عندى كيس ذرة فشار بقاله فترة
حطيت الزيت يسخن وبعدين الذرة وساعة بقى انه يرضى يفتح ويطلع قماش ههههه قصدى فشار ابداااااا
افتكرت قصة البيكنج وقلت يمكن الولد كان حاطه عشان كده ..المهم جبت شوية بيكنج وفانيليا مع الملح وفعلا مفيش دقيقة ولقيت الفشار كله فتح معايا بس خلى بالك لازم النار تكون هادية موت احسن يتحرق
والفانيليا كانت عامله طعم فشار بره بالظبط بس متكتريهاش
على فكرة يا بنات الفشار ده مفيد جدا للمخ ومن ضمن الاغذية اللى بينصح بيها الاطباء لذكاء الاطفال ….تخيلوا
ده كلام دكتورة الاطفال
وطبعا عشان انا بقيت احتفظ بالورق الكرتون اللى بنجيب الفشار الجاهز فيه وطول الاسبوع لو ولادى طلبوه احطه فيه عشان يفتكروه جاهز
وبالنسبة للى بيسألوا ….فى فعلا انواع ذرة فشار مش بتفتح لما تحطيها ع النار وممكن الحباية تتحرق وهى لسه مفتحتش معاكى وغالبا اللى بيبعوا الفشار بره بيجيبوا النوع ده لأنه ارخص من النوع المستورد اللى بيفتح كله معاكى وقت التسوية بدون اضافات
تقريبا البلدى ب 5 جنيه والمستورد ب 12 جنيه
فرق كبير برضه وبيتهيألى اكسب لهم يضيفوا شوية بيكنج باودر للفشار بدل ما يضطروا يشتروا المستورد بفرق سعر 7 جنيه فى الكيلو
يارب اكون افادتكم يا فتوكات
آه التقييم على بعد سنتيمترات وثبت علميا ان التقييم مفيد للفشار
فى رعاية الله مواضيع هذا القسم برعاية
ماما فينو ماما فينو 345769_7.gif سوبر فتكات Fatakat 345769 القاهره – مصر