اهلالالالالالالالالالالا وسهلالالالالالالالالالالالا بالحلوين
انا النهارده عملالكو رول الفراخ المفرومه اه اشمعنى يعنى اللحمه بس اللى تتعمل رول ههههههه
مش عايزين تفرقه عنصريه بين الحيوانات والطيور هههههه
ودى صوره تجويعيه وتشجيعيه الاول كالعاده
طب يلا ندخل بقى ع الطريقه والمقادير
المقادير
نص كيلو فراخ بانيه
بصلايه كبيره
نص لمونه
2 فص توم
معلقه صلصه او كاتشب
بهارات ملح وفلفل وكارى وكركم وروز مارى وحبهان
فلفل اخضر وزتون
الطريقه
اولا انا جيبت الفراخ اهه وغسلتها غسله محترمه
وبعدين فرمتها فى الكبه فرمه خشنه مش تنعميها اوى هتبقى وحشه لو نعمتيها
اهه
وبعدين ابتديت اضيف كل المكونات والبهارات عليها
هنا انا حطيت رغيف عيش فينو انتى ممكن تعوضيه ببقسماط مطحون طبعا وهتبقى حلوه برضه
وحطيت مكعبين مرقه دجاج وحطيت ذره ملح بس لان المرقه طبعا مملحه كويس والصلصه والتوم والفلفل الاسمر
وهنا ضيفت الكركم والكارى كمان وابتديت اعجنها
وبعدين ضيفت البصل وطبعا مش مهم الترتيب يعنى اللى يجى فى ايدك حطيه الاول عادى
وهنا خلاص كنت عجنتها كويس وسيبتها ترتاح فى التلاجه ساعه
وده طبق الحشوه بتاعتها الزتون والفلفل
انا هنا بقى طلعتها من التلاجه و فردتها وفردت عليها الفلفل والزتون
وبعدين ابتديت الفها رول
هنا انا خلاص لفتها خلاص وظبطها
وعلى فكره انتى ممكن تلفيها فى ورق الومنيوم او فويل وتريحى دماغك
هنا بقى انا حطيتها فى القالب بتاعى حبيبى ههههههه
وحطيت بقى تحتها وجنبها كلللللل البهارات تانى بس مكترتش لانى هى اصلا متبله كويس ما شاء الله وزودتها نص كوبايه ميه
وبعدين حطيتها ع البوتاجاز تاخد غلوتين كده وبعدين دخلتها الفرن
قعدت فيه حوالى ساعه الا ربع
وده شكلها بعد ما خرجت
ما شاء الله كانت زى الفل طعم وريحه واووووووو
وهنا بقى بعد ما بردت وقطعتها
ولازم تسيبيها تبرد عشان متتكسرش معاكى وانتى بتقطعيها
اوك
اسيبكم بقى مع الصور
ها ايه رايكم هههههههههه
مواضيع هذا القسم برعاية
سنوات الضياع 2 سنوات الضياع 2 729913_1.gif برنسيسة فتكات Fatakat 729913 طنطا – مصر