فتوكاتى حبايب قلبى الغاليييين قوى قوى عليا
بصوا بقى أنا بعد الحمل الولادة الثالثة ليا وربنا رزقنى بنور عيون ماما مارو حبيبى تخنت جدا وبقت عاملة زى البلونة ،، وولادى هاتك يا ذل وتريقة عليا ،، وعلشان ادارى المسائل البايظة عندى بقيت البس التونيكات الطويلة وبصراحة محبهاش بحس ان الست بتبقى عاملة زى الشوال فيها وبلدى قوى ،، ومع ذلك كانت الأمور سيئة جدا ،،، ناهيكم بقى عن المقاسات العائلية
المهم علشان ماطولش عليك قررت انى لازم اعمل ريجيم ،،، ووزنى ينزل ،، وبرغم كمية التريقة والاحباط من ولادى واللى يقولى انسى يا عمرو خلاص بقيتى تخينة يا ماما ،، مخبيش عليكم أنا كنت فاقدة الامل فى نفسى أصلا ،، لكن على مين ،، قررت الاتى
** اول وأهم حاجة تنظيم مواعيد النوم أنام بدرى وأصحى بدرى ،، ليه بقى لان بعد الساعة 6 مساءا مستحيل اكل اى شىء نهائيا
** تانى حاجة شرب المية الكتير ،، ازازة المية فى ايدى على طول جوة او برة البيت
** العربية نوووووووووووو ،، المشى ثم المشى ثم المشى ،، بقيت آخذ البيبى بتاعى احطه فى عربيته وهاتك يا مشى ،، العربية للمشاوير البعيدة والبعيدة قوى كمان
** المشروبات الغازية ممنوعة خالص ،، التسالى اللب والسودانى والحلويات ،،، متفكريش حتى ،،،، بس يعنى كنت ساعات باخد اللى فاضل منهم بلقط يعنى ماهو الامر ميسلمش من شوية حلويات يعنى
** التكيفات اثناء النهار ممنوعة بالليل عند النوم بس ،،، هتحسى انك قاعدة فى سونا ،، مش مهم كله يهون وفى آخر اليوم حمام دافىء ،، شوفى بقى كمية الدهون اللى هتتحرق اد ايه من العرق الكتيير
** وأخيرا بقى لعب الاستغماية مع ولادى ،،، ههههههههه آه والله بيخلينى اصب عرق وخصوصا لما اجرى ورا السفروت الصغير
بصى بقى اللى يقولك شغل البيت بيخسس ،، خدعة كبرى ،،، انا مكنتش بقعد أصلا ومع ذلك مخستش الا لما عملت الخطوات السابقة
كان وزنى كام بقى يا قمرات بعد الولادة 90 كيلو آه والله ،،،، دلوقتى انا وزنى 67
وطولى 168
انا بدات الموضوع ده من عمر 6شهور للبييى ،، دلوقتى بقى عنده سنة و8 شهور ،،، ده بأمانة كل اللى انا عملته آه بصوا فى حاجة كمان انا كنت باكل نصف وجبة والباقى بعد ساعتين يعنى كنت بقسم الوجبة الرئيسية لاثنين
لبسى حبيبى الغالى اللى كنت هوزعه ،،، الحمد لله بقيت بلبسه ،،، وبقيت بهتم كمان بشياكتى ومظهرى ،، وهاتك يا غيظ فى ولادى
اللى مكانوش مصدقين انى ممكن ارجع ماما الرشيقة بتاعه زماان
عايزة اشوف ردودكم وتجاربكم وادعوا ان وزنى يثبت على كده ،، وربنا يحقق لكل واحدة فيكم اللى بتتمناه
قولوا آمييييييين
modybedomaro modybedomaro images/avatars/whiteflower.jpg فتكات هايلة Fatakat 516266 الاسماعيلية – مصر