السلم عليكم ورحمة الله وبركاته
انا يا حلوات بمووووووت اخر حاجه في الجلاش اكتر من الرقاق وكنا دايما بنعمله بالعصاج او اللحمه المفرومه بس النهارده جايبه لكم حشوه جديده خالص
انا قلت مش خساره فيكم زي مابتفيدوني افيدكم باكله جميله وبحبها اوي وهي من اختراع خالتي او حد من صاحباتها مش متأكده بس الحكايه بدأت
ان مامتي كانت معزومه عند جدو وكات طنطي الي هي تعتبر خالتي هتعمل جلاش بطريقه جديده وماما ما شاء الله الكل بيشهد لها وهي من الناس اللي
مبيحبوش العك والاختراعات ولما عرفت ان خالتو هتعمل الجلاش بحشوه جديده فضلت بقي—- اوعي تعكي —و— عارفه لو طلع وحش –و–
انا مش هاكل منه عشان تبقي عارفه هم واخدين علي بعض مالناش دعوه احنا
المهم دخلت خالتو وشمرت وعزمت النيه علي ابهار الجميع بهذا الجلاش الرائع اللي بقت ماما نفسها بتعمله في البيت علي طول وتحبه كمان
وعشان اختصر بس هقول الحشوه
انتي هتجيبي زبده وكبد فراخ وكبشة زبيب هتنضفي الكبده كويس اوي وتغسليها وتقطعيها قطع مشكبيره ومش صغيره وهتشوحيها في الزبده مع الملح والفلفل
الاسود وقبل ما تطفي بدقيقيتين هتجيبي كبشة زبيب وتغسليها كويس وتصفي الميه منها وهتضيفيها علي الكبده وتقلبي وتطفي وهتفرشي الصينيه بالجلاش
عادي بعد ما تدهنيها زبده طبعا وهتيجي في النص وتحطي الحشوه اللي جهزتيها وترصي فوقيها باقي الجلاش وتقطعيها وهي كده وتكوني محضره طبق فيه
كوباية لبن كبيره مكسور فيها بيضه مضروبه بملح وفلفل وتقلبي كويس وتضيفيها ودخليها الفرن وطلعيها بقي وكلي احلي صينية جلاش باحلي حشوه جديده
والافضل بقي لو سقيتيها كمان نص كوباية شوربه اووف علي الطعم يعني اقسمي المقدار بين اللبن والشوربه
وده طبعا لو بتحبي الطعم المسكر في الاكل يعني اختي الفقريه ما بتحبش الرز اللي بالخلطه عشان الزبيب بس بتموت في الجلاش ده
وتذكروا لولا اختلاف الاذواق لبارت السلع
لو عجبكم بقي يعني كلكوا نظر قيموا وردوا ولو معجبكوش برده قيموا وادعوا لي
معلش الموضوع من غير صور تليفوني بعافيه حبتين ادعوله يقوم بالسلامه مواضيع هذا القسم برعاية
سارا رامي سارا رامي سوبر فتكات Fatakat 111784 القاهره – مصر