السلام عليكم ورحمة الله وبركاته
ازيكم يا احلى فتوكات ؟
وحشتوووووووووووووووووووووووووووووووووووووونى
انا رجعت لكم النهاردة بأكلة متينة ان شاء الله تعجبكم
اكلة اخطبوووووووووووووووط
.
.
.
فى البداية احب اعرفكم علي الاستاذ اخطبوط
الاخطبوط هو كائن بحرى من الاسماك الصدفيه اسمها الرخويات ( يعنى ابن عم السبيط والكاليمارى )
وعنده 3 قلوب ( حبيب اوى ) و8 ارجل فى كل رجل صفين من الممصات اللى بيسخدمها فى صيد فريسته
كفاية النبذة العلمية البسيطة دى عن الاخطبوط كان نفسى انزل لكم تشريحه ودورة حياته ( الكلية لسة مأثرة عليا منها لله )
نيجى للمهم بقى … طعمه شهى ولذيذ جداااااااااااااااااااا ده غير انه مفيد جدا جدا جدا
طعمه يشبه الاستاكوزا لحد كبير ولو حد فيكم مايعرفش طعم الاستكاوزا قبل كده يبقى ممكن نقول ان طعمه قريب من الكابوريا
ريحته مافيهاش اى زفارة بالمرررررررررررررررة … مجرد ريحته تفكرك بنسمة البحر
كفاية رغى بقى
يلا بينا نبدأ الشغل ونقول بسم الله
ده شكل الاخطبوط اللخبوط قبل الشغل عليه
انا اشتريته من محل للمنتجات المجمدة عندنا فى طنطا وسعره مش غالى 22 جنيه للكيلو يعنى ارخص من السمك البورى !
اول خطوة هو سلق الاخطبوط
بنحضر حلة ونملاها ماية ونحطها على النار لحد ما تغلى
اول ما تغلى نسقط فيها الاخطبوط اللخبوط بتاعنا ونودعه
نلاحظ هنا ان لون الاخطبوط اول ما اتحط فى الماية المغلية لونه هو والماية اتغير من الابيض للروز وبعدين النبيتى
نسيب الاخطبوط على نار متوسطه يغلى من ربع لنص ساعه ( 15 – 30 دقيقة ) حسب حجمه
انا هنا اخطبوطى كان وزنه حوالى كيلو وربع بس
وده شكله بالمقلوب ورجوله باينه وفيها الممصات بتاعتها والجزء المكور ده راسه
نسيبه يغلى فى الماية اللى مغطياه لحد ما نلاحظ ان الجلد اللى عليه بدأ يتقطع وجسمه الابيضانى اللى جوا بدأ يبان
مجرد ما ده يحصل نطفى النار عليه فورا ونطلعه نصفيه من مايته ونسيبه يبرد
وده شكله بعد ما اتسلق والبخار طالع منه وريحته ما اوصفلكوش راااااااااااااائعه
شوفوا لونه اتغير ازاى وبقى اغمق بكتير عن الاول
نيجى بقى للمرحلة التانيه وهيا اننا نقشره من الجلد النبيتى اللى عليه ده
ودى خطوة سهله جدا وخصوصا بعد السلق لان الجلد رقيق جدا وبنشيله بمنتهى السهولة
انا قطعته الاول وبعدين قشرته علشان يبقى سهل عليا
وهنا نلاقى لما بنقطعه يبان لحمه الابيض الجميل
وهنا بعد ما قشرت الرجل كلها وبان لحمها الابيض كله
على فكرة الرجل دى كلها عبارة عن قطعة من اللحم مافيهاش اى عظم او شوك او اى حاجه
وده الشكل النهائى لاخطبوطى اللخبوطى الجميل
بعد سلقه وتقشيره وتقطيعه
بكده لحم الاخطبوط جاهز للاستخدام فى اى اكله ونتعامل معاه معاملة المأكولات البحرية كلها
يعنى ممكن نتبله ونغلفه بالدقيق ونحمره فى الزيت زى السمك الفيليه او الكالمارى
وممكن يتعمل صينيه زى السمك البياض
وممكن يتعمل طاجن فى الفرن زى السبيط
او ممكن يتعمل سلطه زى التونة والرنجة
الطرق كتير المهم اننا فى النهاية باذن الله هندوق احلى طعم
اتمنى ان الموضوع يكون عجبكم
لا تنسونى من دعائكم
اختكم فى الله
شيكولاته بيضاء
مواضيع هذا القسم برعاية
شيكولاته بيضاء شيكولاته بيضاء 175092_2.gif فتكات متميزة Fatakat 175092 طنطا – مصر