بسم الله الرحمن الرحيم
النهاردة معايا وصفة أصليه وكمان معدلة عن طريقي وهكتب الإثنين عشان تتمتعوا
بنظام جديد من الاكل
الوصفة هيا وصفة الفراخ المقلية علي طريقة المنطقة الجنوبية الغربية ( مش لازم
أقول من فين ) ودي بالتأكيد أصح 100 مرة من طرق القلي العادية وكمان بتخلي
الفراخ تحتفظ بكل الفوايد بتعتها تماما وتضمني الصحة لأولادك ربنا يبارك ليكي
فيهم وبدون ما تشرب زيت
المقادير :
دجاجة مقطعة الي 8 قطع
دقيق
عبوة لبن رائب 1/2 لتر
1 ملعقة طعام ملح عادي ولو ملح بحري يكون 1/2 ملعقة
(سطل / جردل/ إناء/ طنجرة) من الآخر أي حاجة رفيعة وطويلة علشان يتكربسوا
علي بعض ؟ مين هما ؟ هتعرفي بعدين
حلة ضغط ( إن مكنش عندك يبقي لازم تخلي الفراخ )
–
دقيق وخل لغسل الدجاج قبل بدء العمل
بس ؟؟؟؟؟؟؟
أيوه بدون تعقيد دي أحسن طريقة لعمل الدجاج المقلي علي الإطلاق لا تقولوا كنتاكي
ولا تقولوا البيك – جربوا وإدعولي
الوصفة :
بعد تنضيف الفرخة وغسلها من الدقيق والخل كويس جدا
تقطعي الفرخة الي 8 قطع أنا خلتهم 9 مش مشكلة براحتك
***مهم جدا متشليش أي دهون من الفرخة أو جلد لأن كل الدهون تقريبا هتسيح وتصلع في الزيت وتسيب اللحم الممتاز بدون دهون .
وتضعيهم في حاجة عندك تكون ديقة بس مرتفعه يعني يكونوا فوق بعض
وفي دورق عندك صبي اللبن الرايب وضعي عليه الملح وقلبيه كويس دقيقتين مثلا
وبعدين دوقيه وشوفي مالح وعايزة تخرجيه من فمك ولا لسا لو لسا محتاج زوديله
1/2 ملعقة شاء ملح وقلبي كويس ودوقي تاني وهلاقيه إتظبط وطبعا بيختلف لبن
عن لبن
واللي ساكنه برا الوطن العربي تنقي لبن رايب يكون لازع لأنه كل ما يكون لازع
كل ما يكون أحسن وأجود في التسوية
ويتنقع ليلة علي الأقل 12 ساعة قبل القلي وخليه في الثلاجة مش برا
المرحلة الثانية :
تضعي الزيت في طنجرة الضغط علي الأقل 1/3 الطنجرة تكون مغمورة بالزيت
ويفضل الزيت الخليط أو زيت النخيل وتولعي النار عليه لغاية لما يسخن كويس جدا
ولو عندك بطاطس إقليها قبل الفراخ
ولما تخلصي إتأكدي من منسوب الزيت وحرارته
وبعدين تطلعي الفراخ من الثلاجة تمسكيها بإيدك وتحاولي تهزيها علشان تنزل
اللبن الرايب الزيادة بس مش كثير
وبعدين تغطيها كويس جدا بالدقيق في كل مكان فيها ( لو سبتي مكان صغير هيسود
أنا بنبهك)
وبعدين تخلصي كل الفرخة بالدقيق وتضعي القطع في حلة الضغط مع الإنتباه إن
أول حاجة الصدور ثم قطع الأفخاذ وبعدين الدبابيس وبعدين الأجنحة وتكوني
مخفضة النار قبل ما تضعي الدجاج ثم بدون تأخير أغلقي عليها الغطاء وإرفعي
النار الي متوسطة (إياكي تنسي ) وتكون الجهة اللي تحت هيا جهة العضم.
بعد ربع ساعة فضي الضغط وشيلي الغطاء وإنتظري عليها حتي يصبح لونها ذهبي
وبعدين خرجيها بهدوء بالمساكة علشان متشليش الجلد المقرمش من عليها .
وخليها دقيقتين في المصفة قبل ما تقدميها. بلاش موضوع الورق النشاف لأنه مش جايب همه.
ملاحظة :
الفراخ الصغيرة مش زي الكبيرة يعني أي فراخ فوق 1200 جرام تسيبيها 15 دقيقة
قبل ما تشيلي الغطاء….والفراخ الصغيرة 10 دقائق بحد أقصي
إنتباه : أي تأخير هتاكلي إن شاء الله فصوص فراخ خطيره بس متكيسة بطبقة طوب
بني إنما إيه تحفه . إسألي مجربة ( إضبطي منبه في موبيلك )
هيبانلك إن الطريقة معقدة مع إنها ممكن تتلخص في كلمات بسيطة شوفي معايا
( فراخ+ملح+لبن رايب=> نقع الفراخ + قلي الفراخ = تقديم وبالهنا والشفاء )
تقدم مع الثومية والشطة و والبطاطس المقلية ومتنسوش العيش الكايزر
تنبيييييييييييييييييييه/:
**ممنوع تضعي أكثر من فرخة في عملية القلي في المرة الواحدة وإلا هتبوظ الدنيا
**لو خليتي الفراخ يبقي ممكن تضعي فرختين مفيش مشكلة مش أكثر ونفس
الطريقة
————————–
تعديلي :
ميزة التعديل :
طبقة مقرمشة جدا جدا جدا
التعديل يتم نقع قطع الدجاج في ماء مملح بدل لبن مملح لمدة 12 ساعة
ثم ينقع في لبن رائب مملح ل 12 ساعة أخري علي الأقل وهتشوفي الإختلاف في
القرمشة
علي فكرة لما بيجيلي عزومة من 1 الي 4 بعمل الفراخ المقلية كل واحد نص فرخة
مع البطاطس والعيش والثومية وأكله هنية تكفي مية بدون تعب وجهد
إنتظروا موضوعي غدا إن شاء الله أو بعد غد عن طريقة مبتكرة للثومية من أجل
العزائم بأرخص سعر ممكن ها ها ها ها
ومواضيع أخري مميزة قريبا إن شاء الله
وفي نهاية موضوعي المتواضع
صورة الأكل النهائي :
أتمني إن الموضوع يكون عجبكم ومستنيه ردودكم ورأيكم في الموضوع ومتنسوش دعوة حلوة والله يوفقكم لما يحب ويرضي.
مواضيع هذا القسم برعاية
الساعة الذهبية الساعة الذهبية 1045339_1.gif فتكات متميزة Fatakat 1045339 القاهرة – مصر