بسم الله الرحمن الرحيم
حالة طوارئ قصوى ف جروب…شعارنا في الاسواق "لو سمحت اصغر مقاااس small size "
من يوم
السبت 29 /10
لحد يوم
السبت 5/11
8 ايام حالة طوارئ في كل جاحه
طبعا الموضوع ده كاسر للقاعده ولنظام الجروب اللي احنا ماشيين عليه
بس كان لازم وقفه جد واعمل اي حاجه انقذ بيها نفسي والجروب
لان في الايام الاخيره في عين صابت الجروب باين كده ونام والبنات بقت نفسيتهم وحشه 
وده اثر ع الحماس في الجروب
علشان كده فكرت اعمل موضوع جديد للاسبوع اللي فاضل قبل العيد
علشان ندخل العيد واحنا نفسيتنا تمام
يمكن اللي يقرى الكلام يحس ان الموضوع صعب وان مستحيل نحقق حاجه ملحوظه في الفتره القصيره دي
بس الحمدلله احنا بقالنا اكتر من شهر مع بعض وكل اللي معانا بقالهم فتره معانا واتعودنا ع التخفيف والرياضه والعنايه بالبشره والشعر وكل حاجه
يعني ف ارضيه صلبه واقفين عليها والحمدلله
حالة الطوارئ بقا عباره عن ايه ؟؟؟؟؟
كل واحده تشوف ايه اللي ناقصها وايه اللي نفسها يجي عليها العيد وتكون هى عملاه
مش دايت بس
لا كل حاجه كل حاجه
انا في الفتره دي ما يهمنيش نزول الوزن قد مايهمني ان كل واحده فينا يجي عليها العيد وهى راضيه عن نفسها كل الرضا وتحس انها فعلا تعبت ع نفسها وتستاهل تفرح وتعيد مش جو النفسيه والاحباط اللي بقا زي ميكروب في الجو عند كله 
يعني احنا هنشتغل ع كذا حاجه ان شاء الله وقابله للزياده بس دي اللي ف بالي دلوقتي واللي ف نيتي ان شاء الله اني اركز عليه
{1}
اللي حاسه انها مقصره في حق ربنا وعاوزه ربنا يرضى عليها
دي احسن ايام وايام مفترجه للعباد
من اول الصيام لحد التسبيح والاستغفار وقراية القران
يبقا ليه منستغلش الايام دي صح؟
{2}
خسيتي بس مش باين عليكي اوي ؟؟
اكتر حاجه بتفرق مع الجسم وبيبان في الشكل
هى الرياضه ما تقوليش الفتره قصيره
لو انتي استغلتيها صح صدققيني هتفرق معاكي جدا كمان ومن غير ما تضري نفسك برجيمات مضره او وصفات هبله
خطه بسيطه اوي
حاولي يبقا التخفيف تمام مفهوش عك نهائي
يبقا اكلك صحي زي ما بيقول الكتاب بالظبط
والرياضه بدل ماهى ساعه ف اليوم خليهم ساعتين تلاته ان شاء عن ما حد حوش
والمشروبات الحارقه زوديهم بدل 3 خليهم 5
وطلوع السلم ونزوله حلوووووو اوي بجد خصوصا للارداف بس ده عاوز ناس عندها صحه
{3}
البشره والشعر
طبعا معروف ان اي حاجه للبشره او للشعر محتاجه استمرار علشان يبان نتيجتها
بس اعتقد ان احنا بقالنا فتره بنهتم ببشره والشعر واصبح روتين يومي ف حياتنا
بس ف الايام القليله دي
هنعمل حاجات حتى لو بسيطه هتفرق ف النفسيه اوي ع العيد
يعني حمام مغربي ف الجون وسويت وصنفره وحمام زيت للشعر
واللي بشرتها فيها غمقان من الشمس او حبوب
تعملها مسكات وتهتم بيها زياده علشان يبقا فرق ع العيد
كده يعني
{4}
مش احنا بس اللي بندخل ع العيد فله شمعه منوره
لا كمان البيت اللي احنا فيه
وماشاء الله معظم اللي معانا ستات بيوت
فترتيب البيت والنظافه وكل حاجه في البيت تبقا جديده وبتلمع من الحلاوه ع العيد
دي الاساسيات اللي هيبقا فيها طوارئ ان شاء الله
عاوزه شغل من نار
عاوزاكم تحسوا انكم داخلين معركه يا هتكسبوا يا هتكسبوا مفيش خيارات تانيه
وصدقوني النتيجه ان شاء الله هتلاحظوها وهتحسوا انها كانت فعلا تستاهل التعب ده
ملحوظه مهمه جدا:::::::::
لاعضاء الجروب ::
كان المفروض الفري يوم الثلاثاء اللي جاي وان الاتنين الميزان وتجميع الدرجات
بس ده استوب
وهنكمل من غير فري لحد الوقفه ان شاء الله
واول 3 ايام من العيد فري
يعني مفيش دلع اكتر من كده
وبالنسبه للدرجات
هتجمع الاسبوع اللي فات
يعني 7 تقارير بالنهارده
تجمعوا الدرجات وتتبعتلي ع الخااااااااااااااااااص
نفس الي كان هيحصل يوم الاتنين عادي خالص بس من غير وزن بقا
ومفيش ميزان غير يوم الوقفه السبت اللي جاي ان شاء الله
ويمكن تشوفوا ا اسبوعين من غير فري كتير بس كلنا عكينا وكده الحمدلله محدش فينا محتاج لفري يعني
وبعدين 3 ايام فري في العيد حاجه مكنتش في الاحلام
بس يارب يارب المجهود اللي نعمله في الاسبوع ده يستحق فعلا الفري وان احنا نفرح بالعيد
::
"""""""""""""""""""""
بنات الله يخليكم ما تخيبوش املي فيكم
عاوزين نكمل المشوار سوا لحد ما نحقق اللي احنا عوزينه
مش عاوزه ارجع ف نص الطريق وارجع للي كنت فيه تاني
احنا الحمدلله صحبه جميله وكلنا قلبنا ع قلب بعض ونادرا لما بيبقا ف جروب كده
فبلاش كل ده يضيع
ربنا ادانا فرصه يبقا منضيعهاش مننا بقا
يارب تكون فكره الموضوع الجديد فكره حلوه
وانا مش هقبل بتقارير عاديه من اللي كنا بنزلها عاوزه كل حاجه الضعف
عاوزه احس من التقارير ومن الكلام ان احنا رجعنا اقوى من الاول بمية مره
وده اسبوع طوارئ يعني حاجه استثنائيه
وبعد العيد ان شاء الله هنرجع لسابق عهدنا
بس احنا محتاجين نتعب حبه علشان نفرح اكتر ونقدر نكمل المشوار
وطبعا اهلا وسهلا باي فتوكه عاوزه تنورنا في الجروب
وتعمل معانا حالة طوارئ زي دي
واخر حاجه
كل سنه وانتن طيبات ياقمرات
ربنا يجعل الايام دي مفترجه عليكم كلكم
وماتنسنوناش بالدعوات
علشان ربنا يباركلنا ان شاء الله
بحبكم ف الله
أمنيتي أتغير للأحسن أمنيتي أتغير للأحسن 187750_28.gif فتكات غالية قوي Fatakat 187750 طنطا – طنطا