البفتيك كان عقدتى واخر مرة عملته كان من حوالى 6 سنين لانى اسنحرمت اجيبه ويبوظ ويبقى زى قلته فقررت انى انساه خااالص
بس قلبى حن ليه كده وجبته وقولت الصلح خير بقى وقعدت ادور على احسن طريقة عشان يطلع طرى ومستوى وربنا وفقنى وقريت تقريبا كل موضوعات الفتوكات الحلوين بخصوص البفتيك وكان اكتر موضوع فادنى هو ده
https://fatakat.univanet.com/#642230
المهم جمعت الافكار وعملته طلع راااااااااااائع مفرود وطرى ومستوى ولونه فاتح وشكله زى الفراخ البانية ….ما شاء الله كان يستاهل بقكم الحلو …
الطريقة بقى :-
1- جبت البفتيك فردته جوا كيس ودقيت عليه بإيد الهون عشان يتفتح مسامه ويبقى خفيف وسهل السوى
2- حطيت عليه بصلة مبشورة ومعلقتين زبادى "بيخليه طرى " وملح وفلفل وحبهان وعصير نص لمونه وقلبتهم كويس وقفلت العلبة وسيبته ف التلاجه من بالليل
3 جبت طبق فيه دقيق وطبق فيه بيضتين كبار وشوية لبن ضربتهم كويس وطبق فيه بقسماط …..وحطيت ملح وفلفل خفيف على كل طبق من دول
4- خدت البفتيك نفضته من البصل وحطيته ف الدقيق ونفضت اى دقيق زيادة وبعدين فى البيض وبعدين البقسماط وبعدين فى البيض تانى "ايوه دى تكاية خطيرة فرقت قوى معايا بجد" ودخليهم الفريزر 5 دقايق عشان البقسماط يمسك كويس
5- سخنت الزيت جامد وحطيت البفتيك دقيقة واحدة وبعدين هديت النار خاااالص وسيبته يستوى براحته وبعدين قلبته ع الوش التانى ولما استوى "دوقت واحدة واتأكدت" طلعته على الطبق …..وبالهنا والشفا
ملحوظات هامة :-
**حاولى تسوى البفتيك كله فى طاسة كبيييرة لان الدور الاول بيستوى حلو قوى وبيطلع لونه فاتح بعكس الدور التانى بيحمر بسرعة وقلبه مش بيستوى جامد زى اللى سوتيهم الاول عشان الزيت بيكون سخن عليهم
**لو طلعتيهم من الزيت تقدميهم فورا للاكل …او تغطيهم كويس لو هتستنى شوية عشان يفضل طرى وجميل
ودى صورة بتوضح طبقة البقسماط اللى مغلفة البوفتيك كانت جميلة ازاى ولا فكت ولا اتحرقت اثناء القلى … ها استاهل تقييم بقى ولا ……
مواضيع هذا القسم برعاية
* WHITE BIRD * * WHITE BIRD * 94432_10.gif سوبر فتكات Fatakat 94432 البيت – ………..