السلام عليكم حبيباتى وكل عام وأنتم بخير
العيد خلص والحمد لله كلنا عايدنا وكله تمام
عايزين بقي نهتم بوزننا تاني ونحافظ علية
ونحاول ننزل ونخس واحدة واحدة وبشكل صحى وسليم
أنا أم نورا من الرياض وزنى 80 كيلو فكرت كدة أمشي علي نظام الللقيمات وأظبط وزنى
خاصة إنى تعبانة من المرارة ونظام اللقيمات هايساعدنى جدا ومش هايتعبني
وكمان لية تجربة مع رجيم اللقيمات وجربته قبل كدة
ف اللي حابة تشترك معايا وتكون ملتزمة معايا برجيم اللقيمات أهلا وسهلا واللى شايفة إنها مش هاتقدر تكملى أو هاتتلتزم يبقي من الأول بلاش تشتركى
لية بقي الكلااااااااااااااااام دية ؟
لإننا هانكون جروب متوسط العدد فيه من عشرة ل خمسة عشر عضوة
ودية عشان اقدر أتابعكم وأنتوا كمان تتابعونى ونقدر نفتكر بعض كويس
ف اللى حابة تشترك تتفضل تقول اسمها ووزنها وطولها وهدفها وأنا هاقولك وزنك المناسب مع طولك
بس المهم المهم المهم يا بنات اللي هاتشترك تكون جادة بجد وحابة إنها تخس مش تتدلع
وصدقينى لو كنتى من جواكي صادقة وملتزمة مع نفسك هاتحققي اللي نفسك فية
خلاص يا بنات انا هانزل بنظام اللقيمات ومعناه:-
معنى اللقيمات
ابتكر الدكتور محمد الهاشمي أستاذ السمنة بكلية الطب جامعة القاهرة .نظاما جديدا للرجيم أسماه " رجيم اللقيمات " .وفيه يتم تعويد المعدة علي الوجبات الصغيرة حتي تنكمش ويقل حجمها ، وهذا الرجيم ليس له علاقة بالسعرات الحرارية ويهتم بكميات الطعام وتدريب عضلات المعدة وحاسة التذوق والمزاج الشخصي
قال رسول الله صلي الله عليه وسلم :- ( ما ملأ ابن آدم وعاءً شراً من بطنه، بحسب ابن آدم لقيمات يقمن صلبه ،فإن كان لا محالة فثلث لطعامه ،وثلث لشرابه ،وثلث لنفسه ) صدق الرسول الأمين
فإذا أردنا الرشاقة
فعلينا اتباع هدى نبينا محمد صلي الله عليه وسلم
وهو أحسن نظام غذائي في العالم
وزى ما اتعودنا إننا ناكل كتير من غير حساب أكيد هانتعود إننا ناكل بحساب وبنظام
نظام الللقيمات :
عبارة عن :-
الوجبة المرحة + 5 لقيمات فقط لاغير
والنظام كالتالي :-
في الفطار ( اللقيمة الأولى )
( ربع رغيف بلدى ومعاه قطعة جبنة لايت أو بيضة مسلوقة أو معلقة كبيرة حلاوة أو معلقتين كبيرة فول ومعاه شاى بلبن ،ولو لبن بودرة يبقي معلقة واحدة بس
وممكن مايكونش فيه فطار خالص ونبدأ يومنا عادي بثمرة فاكهة
بس أنا بفضل إن يكون فية وجبة فطار عشان نزود معدل الحرق
أمثلة مختلفة للقيمات ……،،،….
-أي ثمرة فاكهة أى نوع
– ثمرة خضار أي نوع
– نص كوب لب
– نص كيس شيبسي
– أى نوع عصير ، هناخظ لتر علي خمس لقيمات بشرط ألا يزيد معدل السكر في اليوم كله عن خمس معالق سكر
– كبشة فشار
– أي مشروب باللبن زى النسكافية او السحلب
ويحسب لقيمة من تانى كوب ويكون اللبن ربع الكوب فقط
– تلت الكف بيتزا يعنى نص مثلث
– الحلويات حجمها قد علبة الكبريت بسبوسة أو كنافة
– كوب لبن
-نص كوب شوربة خضار أو شوربة لسان عصفور
– نص كوب سلطة
– 2 حبة برقوق
-3 بلحات
– تلت كوب عنب
-كوب بطيخ أو كانتلوب
– واحدة زبادى
– عدد 4إلى 5 حبات بسكوت
– قطعة صغيرة من الشيكولاتة قد تلت الكف
– نص كوب صغير أيس كريم
– ربع ساندوتش من الفاست فودز
-كبشة فنكوش
– علبة تونة هاتتقسم علي لقيمتين
– سمك نص واحدة
-واحدة كحك
– 2 قراصيا
-عصير قصب نص كوب
– نص كوب فول نابت
– 2 صابع محشي
– قطعة كيك تلت الكف
– نص كوب كورن فلكس مع اللبن
-الأرز باللبن نص كوب
– المكسرات 3 – 5 حبات بندق أو لوز أو 5 – 10 حبات فول سودانى
ونكرر هذة اللقيمات كل ساعتين أو 3 او 4 ساعات
وقبل اللقيمات بعشر دقايق هانشرب 2 كوب ماء ثم اللقيمة ثم بعد عشر دقايق 5 حبات سودانى نغلف بيها فم المعدة ومانحسش بالجوع
نيجى بقي للوجبة المرحة :-
ودية عبارة عن
كوب ونص سوائل ( زى السلطة ) وكوب ونص طعام وقطعة حلوى قد علبة الكبريت
عشان تحددى الكمية هانقسم الوجبة ل ……..،…..
النشويات ……
في النص كوب عبارة عن …..،،…
1- أربع إلي خمس معالق ارز أو مكرونة أو نص رغيف عيش بلدى أو رقاق أو بيتزا بحجم الكف زى ما اتفقنا
بالنسبةكبالنسبة للمحشي اللي وزنه فوق ال 90 كيلو هاتاكل 15 حبة ورق عنب
واللى تحت ال90 كيلو هاتاكل 12 حبة
ولو مشكل هاتكلى 5 ورق عنب و3 كرنب وواحدة باذنجان وقطعة لحمة ،وكوب ونص سلاطة وهانبدأ بالسلطة
لو هاتكلى جلاش باللحمة هايكون قد الكف ولو معاه لحمة يبقي الجلاش نص الكف والنص التانى قطعة اللحمة
نيجي بقي يا حلوييييييين للحلويات :
1_ بسبوسة قد حجم علبة الكبريت
2_ قطعة جاتوه قد حجم علبة الكبريت
3_ معلقتين أيس كريم
4_ أى نوع حلويات قد حجم علبة الكبريت
5_ لو مش عايزة حلويات ممكن اى مشروب عادى بحجم كوب ولو كان عصير يبقي نص كوب
6_ حبة واحد فاكهة
ودية يا بنات هايكون نظامنا مع رجيم اللقيمات
وزى ما قولت الإشتراك محدود بعدد اللى شايفة نفسها محتاجة تشجيع تتفضل معانا واللى هاتكسل من الأول كدة بلاش
عشان منكسلش معاها
هايكون في تشحيع لأكتر واحدة هاتكون ملتزمة بالرجيم واتفقد أكتر وزن في الأسبوع
في الأول هانوزن بعد أسبوعين وبعد كدة هانوزن كل أسبوع
اللى هاتفوز وتخسر أكتر وزن هاتقيم الجروب وتتابعه طوال الأسبوع وهاتكون الريسة
أما بقي اللي هاتكسل وتكون أقل واحدة في الإلتزام وخسارة الوزن مش هاوصي البنات عليها وهاتكتب في توقيعها تحت
إنها تختوخة الفريق
عايزة تشجيع وإلتزام وهانكمل بمشيئة الرحمن معلومات عن الرجيم بتاعنا
وهانعرف مع بعض إية الأكل البديل والصحي ووصفات جديدة
واللى عنده فكرة يزودنا بيها
تصبحوا علي خير يا قمرات
ملاحظات علي الرجيم هانخلى بالنا منها:
1_ شرب الماية من 8 الى 10 أكواب ماية طول اليوم
وهايكون قبل الوجبة أو اللقيمة ب10 دقايق
وبعدها بساعة علي الأقل علشان الكرش هههههه
2_ المقليات محظورة محظورة في أول 3 شهور
3_ مش شرط تاخدى سودانى إحنا بناخدة عشان بيحسسنا بالشبع
4_ البعد عن البيبسي بأنواعه حتى الدايت هانستبدله بعصير فريش وبيكون نص كوب فقط
5_ هانعتمد في رجيمنا علي مشروب الحرق المكون الأساسي لية الجنزبيل والأفضل الفريش ومعاه ينسون وقرفة ونعناع اللي متوفر عندك وممكن الشاي الأخضر
6_ السكر مايزدش معاكى عن خمس معالق سكر في اليوم.
7_ عصير الليمون مشروب عادى مش لقيمة
8_ لو لغبطى في الأكل في يوم هاتلغي الوجبة المرحة وهاتقضي اليوم لقيمات ودة عقاب
9_ لو حد فينا في سن انقطاع الدورة هاتزود في الرجيم البنفسجيات عشان نعلي نسبة الحرق
10_ممكن نعمل الرجيم السريع
هاتقسمى الوجبة المرحة علي مرتين وال خمس لقيمات ثابت
ط11_ عايزين نزود معدل الحرق في أول 3 شهور
عشان نزود من معدل حرق الدهون بالجسم هاتاخدى دية لقيمة :
.3 حبات فراولة أو نص كوب
.2 معلقة كبيرة زبيب
. واحدة باذنجان مسلوق
.2 معلقة بابا غنوج
نكتر من الكرنب الأحمر في السلطة
.اتنين حبة أراصيا
. اتنين حبة برقوق
. نص كوب عنب أسود
12_ تقدرى تاخدى في الوجبة المرحة رز وبطاطس بنسبة محدودة
13_ لو الأكل في دهون قليلة هاناخد منه كوباية في الوجبة المرحة
بس هانأخر ميعاد الللقيمة الللي بعدها ب 3 ساعات بدل ساعتين
نظام الللقيمات في الصيام ،:-
الأول نبدأ الفطار بشرب 1_ 3 كوب سوائل ( ماء شوربة عصير ) معاهم تلات تمرات
ثانيا:- بعدصلاة المغرب هانشرب سوائل مقدار كوب عصير أو اى نوع شوربة او كوب خشاف او شاي بلبن نسكافية
..الطعام …………
هانحط الأكل في طبق او اكتر بحيث لا يزيد حجم الطعام كله عن كوب ونصف ويحتوى عل جميع العناصر الغذائية منها :-
نشويات أرز مكرونة خبز بطاطس
خضار. مطبوخ
سلاطة خضراء بمعلقة زيت زيتون
البروتين قطعة صغيرة لحمة أو ربع فرخة مسلوقة أو حبة واحدة سمك او 3 بيضات او قطعة جبنة
انحلى بقطعة صغيرة من الحلويات
مثال لوجبة الصيام :–
مكرونة بشاميل حجم الكف
كوب سلطة خضراء
قطعة لحمة صغيرة
ملحوظة عاماشي ؛
الأطعمة التى تقدم على هيئة قطع زى الشاميل او الرقاق والجلاش حجم الكف يساوى حجم الكوب
بعد صلاة التراويح هاناخد كل ساعتين كوب أو أكثر ماء بعدها بعشر دقايق ثمرة فاكهة
وجبة السحور
لينا لقيمتين
1_ كوب او اكتر من الماء + كوب شاى بحليب + كوب زبادى
2_ ربع رغيف + 3 معالق فول كبيرة أو 2 بيضة مسلوقة او قطعة جبنة
يا بنات متنسوش تضيفي الموضوع عندك في المفضلة عشان الموضوع ميضيعش منك
تانى حاجة لو سمحتم تكتبي تحت في توقيعك و،زنك وهدفك عشان. اقدر اتابعك مش كل شوية أدور عليكى في الصفحات
نقول مين معانا في الجروب ……….،،
1_ أم فارس وإياد روحى .
2_ tota01
3_ سمسمة 2212
4_ زينة الهدى
5_ ريناد 77
6_ بسبوسة ام النونه
7_ أم نوورى
8_ …………
9_ …………
10_ …………
وفي النهاية عايزة اشكر أختى أم سيف صاحبة اول جروب اشتركت فية واستفدت من تجربتها تسلملى يارب
أى تساؤلات يا بنات أنا معاكم
وفي نهاية اليوم هانتقابل سيبيلى تقريرك قبل ما تنامى وانا هاقيمة ونشجع بعض ونشوف اللى لغبطنا فية ونعدله
خلاص اتفقنا ؟؟؟
أم نووري أم نووري سوبر فتكات Fatakat 633896 القاهرة – مصر