السلام عليكن أخواتي الفتوكات
النهاردة وفيت بوعدي ليكم وعملت لكم "ورق العنب"
ومش بس كدة عليه كمان تفريز " القرنبيط" و "الفلفل الأخضر" الحامي
وطبعا كل ده عشان أنا جبتهم بما إن سعرهم مش كبيرررر زي الأيام
اللي جاية طبعا كل حاجة على دخول رمضان الكريم كل حاجة بتغلى
سبحان الله الناس بتستنى رمضان عشان يبينوا طمعهم وجشعهم
مع إنه شهر الرحمة والواحد بيدور فيه على الحسنات ودول بياخدوا
دعوات عليهم بسبب الغلاء والجشع يلا مش هأنضيع وقتنا في الكلام
ندخل على موضوعنا على طول عشان الفتوكات تلحق تنزل من بكرة تشتري
الخضار وتفرز وتشيل وكله على أد الأيد وإستغلال للوقت الحالي وتوفير للوقت
الجاااااي عشان لما نكون عاوزين نعمل أكلة ما تاخدش وقت كبير مننا وتكون
كل حاجة جاهزة للتحضير بسرررعة وده هدفنا كلنا وبالأخص "الموظفات "
طبعا ورق العنب سعره نزل دلوقتي عن ما كان نازل في الأول .. أول ما نزل
كان سعره 16جنيه وبعدين بقى 14 جنيه لحد ما نزل ب7 وب6 جنيه وخلي بالك
عشان فيه ورق في السوق رخيص عن كدة بس ده مش ورق عنب ده "ورق توت"
طبعا إنتي عاوزة تعرفي إزاي تفرقي بين ورق "العنب" وورق "التوت"؟؟؟؟
معقول أبخل عليكي يا فتوكة مش أنا أبداااااااااااا اللي أعمل كدة
ده يا ستي الفرق العرق بتاع ورق العنب
بيكون بالشكل ده لونه لموني ورفيع
لاكن ورق التوت عرقه لونه من فوق محمر شوية وتخين ولو شميتي الورقة هاتلاقيها
ريحتها توت والورقة تخينة زيادة عن اللزوم وناشفة وحروفها تحسيها مشرشرة ..
وده مش معناه ان ورق التوت طعمه وحش لا هوا بس فيه عروق كتير بتشد في الأكل
كان لازم معلش أوضحلكم النقطة دي قبل ما ندخل على طريقة التفريز بتاعتنا ..
نبدأ بسم الله .. أولا انا شفت طرق كتير حلوة في التخزين بس مشكلتها معايا
انها مش هاتوفرلي في الوقت لاكن الطريقة دي هاتخليني اخد ورق العنب من الفريزر
على الحشو على طوووووووووووول …
إنتي هأتشتري الكمية اللي انتي عاوزاها من ورق العنب وتكوني محضرة
كالعادة ماية ولمون وملح مغلية
عشان تسلوقي الورق وطبعا انتي مش هأتسلوقيه بمعنى السلق
إنتي يا دوبك هأتشمميه الماية السخنة وهاتلاقي لونه إتغير
بالشكل ده في اقل من 3 ثواني
وتطلعيه من الماية بالمقصوصة على حلة الماية الساقعة وتعمليله صدمة ماية ساقعة وطبعا
هاتكوني محضرة حلة ماية المونيوم
هاااااا المونيوم مش طبق بلاستيك عشان الماية تفضل ساقعة وياااااااا حبزة
لو كان فيه لوح تلج في الماية والماية اللي هاتصدمي بيها ورق العنب
هيا اللي هاتخليه ماسك نفسه وما يتهريش ولا ينعم لما تخزنيه في الفريزر ..
طبعا كل ما تطلعي الورق من الماية السخنة على الماية الساقعة
هأتسيبي عليه الماية وتطلعيه
من الماية وهوا طبعا باين في ايدك انه بارد مش سخن على الماصفة لحد ما تخلصي الكمية كلها
وطبعا بعد ما يتصفى بس مش ينشفي يعني تحطيه في صينية او حلة برضه المونيوم وتدخليه
التلاجة لتاني يوم عشان يفضل متماسك والنقط دي مهمة جدااااااااااا
هاتيجي تاني يوم تخرجيه من التلاجة وتقطفي العروق بتاعته وخلي بالك تقطفي العروق بظوافرك
ولو ما عندكيش ضوافر تقدري تستعيني بمقص صغنون ويبقى بالشكل ده الورقة بعد ما تقصفي
رقبة العرق من الورقة يعني "تقطمي رقبته " مش تنتشيه تقومي قاطعة الورقة حافظي عليها
وبعد ما تخلصي تقطيف هاتبتدي ترصيه بالشكل ده لو هاتحطيه في اكياس تلاجة
أو ترصيه في اطباق "فوم " بس انا بأرصه بالشكل ده واشيله في اكياس عشان ما ياخدش مكان..
وتشيلي بقى الكمية اللي انتي عاوزاها على حسب اكلتك ولو عندك ميزان مطبخ تقدري تشيلي
بالوزن اللي انتي تحبيه ويكون بالشكل ده وتدخليه بقى على الفريزر على طول ..
كدة خلصنا ورق العنب خلاص ندخل بقى على القرنبيط والفلفل الحامي الاخضر
استنوني المشاركة الجاية ما تروحوش في اي حتة تانية ..إنتزيروينييي
ههههه على طريقة الشيف حسن
مواضيع هذا القسم برعاية
ليلى ام ادم وبلال ليلى ام ادم وبلال 863518_3.gif فتكات رائعة Fatakat 863518 امبابة – مصر