السلام عليكن يا فتوكات
وحشتوني اوووي بقالي كتير مش بأشارك معاكم بوصفات واختراعات
فقلت أجي أطل طلة على فتوكاتي الغاليات وأقول لكم على طريقة
إتبعتها جديدة لتفريز البسلة والجزر وكمان الإستفادة من قشر الجزر !!!
نبدأ بسم الله وما تنسوش ان فيه صور ها عشان ما أبقاش حرماكم من حاجة
طبعا كلنا عارفين إن اليومين دول البسلة والجزر رخاص اوووووي
يعني انا جبت البسلة مرة ال3 كيلو ب10 جنيه ومرة ال5 ب20 جنيه
يعني مرة الكيلو ب3ونص ومرة ب4 جنيه والجزر ب2 جنيه
طب نسكت ونسيب الفرصة تضيع من إيدينا ؟؟ لا طبعا أمال نبقى فتاتيك ازاي؟
لازم نفرز البسلة والجزر بدل ما بنشتريها من برة ومش بتكون حلوة وهيا
في اكياس وليها طرق تخليها وكأنها لسة مفردة من ورقها
والجزر كمان لازم نفرزه بطريقة جديدة عشان كل الاستخدامات
وهنا بقى بعد ما فصصت البسلة
بعد ما نفصص البسلة هانشيلها زي ما هيا في إكياس
بكمية على حسب ما بتحتاجي كل طبخة طبعا
ومش هاتسلقيها يا قمر هاتشيليها زي ما هيا كدة
اقصد ما تسلقيهاش عشان فيه ناس بتشيلها مسلوقة
وده بيغير طعمها وبيخليها تتهري لما تحطيها بعد مدة في التسبيكة
ولما تيجي تتبخيها تاني عشان ما تاخدش وقت اثناء الطهي
انقعيها شوية في ماية مغلية مش تغليها في الماية تنقعيها في ماية
مغلية لحد ما تحضري التسبيكة وبعدين تسقطيها
وتيجي تاكليها بعد كدة تلاقيها وطعمها الروعة كأنك لسة مفصصاها
نيجي بقى للجزر وده طبعا قبل ما ننظفه ونقشره وجبت طبعا كمية عشان التفريز
هاتقطعي الراس بالطريقة دي
وبعد ما تقطعي الراس والديل بتاع الجزر هاتجيبي القشارة
اللي كلنا عارفينها بتاعة البطاطس
ودي طبعا القشارة عشان اللي مش عندها تجيبها من محلات الادوات المنزلية
او تشتريها من عندي هههههههههههه
عشان تسهل عليكم التقشير بسرعة واسهل بكتيير رررر
وده الجزر بعد ما قشرناه وبقى منور زي الفل
وطبعا احتياجنا للجزر مش للبسلة بس اكيد ها نحتاجه للعدس
وللتورلي ولحجات كتير على مختلف طبخاتنا يا قمرات
وده الجزر بعد ما قطعته مكعبات وطبعا ها نكيسه في اكياس طبعا
بكميات على حسب احتياجك طبعا يا قمراية انتي وهيا
كدة خلصنا البسلة والجزر طبعا المفروض اننا نرمي القشر بتاع الجزر
طبعا لا لا لا لا معايا مافيش حاجة هاتترمي يعني هاتستخدميه
زي ما انا باستخدمه دايما …. طيب ازااااااي وفي ايه بقى
ده طبعا شكل القشر بتاع الجزر
انا عن نفسي باستخدمه تحت المحاشي وبالأخص ورق العنب
انا دايما كنت باحط في قعر الحلة بشر الجزر يعني كنت بأجيب
الجزر وابشره سواء كان رخيص او غالي عشان المحاشي ما تتلسعش
او احط بواقي الخضرة " خضرة المحشي " عشان المحشي
ما يتلسعش … المهم خطرت لي فكرة اني ما ارميش القشر وافرزه
هوا كمان واستخدمه لما اجي اعمل محشي
ومن فترة كنت عملت نفس العملية دي بتاعة التفريز وما رميتش القشر
واستخدمت القشر بعد كدة لما عملت المحشي ومافيش ولا صباع واحد
اتلسع خالص من المحشي الحمد لله اخر سطر كان زي اول سطر
وهنا بعد ما كيست قشر الجزر في اكياس شفافة عشان تعرفيه طبعا
ويلا بقى يا بنات كله يلحق يفرز البسلة والجزر
انا حبيت افيد حبيباتي الفتوكات زي ما انا استفدت ونبينا
صلى الله عليه وسلم قال: "الدال على الخير كفاعله " يعني انا كمان
هايوصلني نفس الأجر من نقل المعلومة يعني كلكم جربوا وانشروا ليستفيد
الباقي وربنا يصلح الحال لنا جميعا
واشوفكم قريب ان شاء الله مع طريقة تفريز الثوم لأنه على الأبواب هوا كمان
ومن بعده طبعا ورق العنب وطريقة تفريزه
وكلنا نستفيد يا فتوكات يا قمرات ……
ما تنسوش تقيم الموضوع بكل صراحة
وسلام الله عليكن جميعا
مواضيع هذا القسم برعاية
ليلى ام ادم وبلال ليلى ام ادم وبلال 863518_3.gif فتكات رائعة Fatakat 863518 امبابة – مصر