السلام عليكم ورحمة الله وبركاته
ازيكو يا فتوكات يارب تكونو فى احسن حال يارب
بصو بقى قبل اى حاجه عاوزه كل واحده فيكو بتقرا موضوعى دلوقتى تدعيلى دعوة حلوة كده من قلبها ان ربنا ينجحنى يااارب ويفرح قلبى
ثانيا بقى انا بصراحه مش عارفه الموضوع مكانه هنا ولا لا بس انا شايفه انه مناسب فى القسم ده فلو اى حد من المشرفين شايف ان فيه مكان تانى انسب للموضوع ياريت تنقله و معلش هتعبكو معايا
نبتدى الموضوع
مين فينا مش عايزه انها تكون شخصيه جذابه ومحبوبه من كل الناس اللى حواليها وكل اللى يقعد يتكلم معاها يحب انه يقعد تانى وتالت وعلى طول كمان؟ اكيد كلنا عايزين نبقى كده صح
طب ايه رأيك وانتى شخصيه محبوبه وجذابه واجتماعيه كده تاخدى كمان حسنات هتقوليلى ازاى هقولك
مبدئيا كده وقبل اى حاجه انا عايزه اقولك حاجه صغنونه ااااد كده
الشخصيه المحبوبه من الناس دى ملهاش اى علاقه بالجمال اه ممكن جدا الناس تعجب بواحده شكلها حلو اوى بس تقعد معاها مره وف اقل من الثانية الاعجاب ده يختفى والاسباب كتييره جدا واكيد حصلت معانا او سمعنا حتى انك تعجبى بحد علشان خاطر شكله وبمجرد ماتقعدى وتتكلمى معاه الاعجاب ده يختفى ليه لقيتيه مغرور مثلا فااضى اوى من جوه وعقله صغير وغيره كتير مش ده اللى بيحصل؟
وممكن تلاقى بنوته عاديه جدا بس شخصيتها جميله ودافيه وتحبى انك تتكلمى معاها وخدى بالك انا قولت عاديه ده لان مفيش بنت وحشه بس فيه بنت مش عارفه ازاى تكون جميله
تمام كده
طيب انا دلوقتى هقولك على كام حاجه كده نعملها مع بعض نخلى الناس تحبنا وناخد كمان منها حسنات
شوفى ياستى اهم حااجه علشان تكونى شخصيه محبوبه وجذابه انك تكونى متواضعه
عمرك شوفتى واحده مغرورة والناس بتحبها وبتحب تقعد وتتكلم معاها ؟ عمرك قعدتى مع حد وفضل طول القاعده يتكلم عن نفسه ويقول انا وانا وانا الا وقولتى عليه انه مغرور وعنده نقص
ليه لان الانسان بطبيعته بيبعد عن الشخص المتكبر المتعالى اللى يحسسه انه دايما اقل منه ويفضل يفخر بنفسه
يبقى اياكى والغرور او التكبر على الناس لانها حاجه وحشه جدا جدا وبتخلى الناس تزهق منك وتبعد عنك مهما كنتى جميله ده غير انك مش هتكونى شخصيه محبوبه واجتماعيه لانه ببساطه مينفعش صح ولا ايه؟
يبقى اول حاجه ودى الاساس انك تكونى متواضعه مع كل الناس الكبير والصغير وافتكرى دايما ان من تواضع لله رفعه
اتفقنا
يلا امشى معايا بقى واحده واحده
اول حاجه الابتسامه
شوفتى واحده الناس كلها بتحبها ومعروف عنها انها اجتماعيه وشخصيتها حلوة ولقتيها دايما مكشره؟
اكيد لا لانه ببساطه مينفعش الناس كلها بتحب وبتنجذب لاشعوريا للمبتسمين ازاى؟ هقولك
لو انتى فى مره كده ماشيه مكشره ولا زعلانه ولا مبوزه والسبب كان اى حاجه ( حد زعلك _نرفزك_متأخره _نسيتى حاجه ف البيت … اى حاجه)
المهم انك كنتى مبوزه كده ومكشره وجيتى قعدتى ف مكان مثلا ولا ركبتى مواصلات ولقيتى ف وشك بنوته كده صغيره او حتى انسه كبيره او ست عجوزه قدامك وقامت بصالك وضحكت ليكى كدهو
هاا رد فعلك هيبقى ايه
مش هتلاقى نفسك كده غصب عنك ابتسمتيلها ؟ صح
يعنى هى بأبتسامتها الحلوة دى قدرت تحولك من واحده مكشره ومبوزه مش طايقه نفسها لواحده جميله هاديه مبتسمه لأ وكمان ايه دى اخدت ثواب
لان تبسمك فى وجه اخيك صدقه
يبقى انتى تحاولى دايما دايما انك تبتسمى حتى لو كنتى زعلانه خليكى دايما عامله كده
اولا هتاخدى ثواب وحسنات
ثانيا لما تخلى على وشك ابتسامه جميله زيك كده هتلاقى الناس كلها تحبك وتنجذب ليكى كمان وممكن اوى تخلى حد زعلان ولا مخنوق ومكشر كده يفرح ويبتسم ويتغير المود عنده
وخلى كمان نيتك تكون لله لانك من خلال ابتسامتك دى هتاخدى ثواب
شوفتى بقى الحكايه سهله ازاى
هاا اكمل ولا زهقتو يا قمرات؟؟
dody.m41 dody.m41 531052_2.gif فتكات نشيطة Fatakat 531052 اليكساوية ( alex ) – اسكندرية حبيبتى