السلام عليكم ورحمة الله وبركاته
ياجماعة الكيس الدموي على المبيض مش دايما بطانة مهاجرة
بيبقا بطانة مهاجرة او التهاب حاد في الحوض وده بيتعالج
اقروا تجربتي وانتو تفهموا
—————————————————————
قبل جوازي بشهر واجدة قريبتي نصحتني اني اكشف سونار عند دكتور نس وده لاني كنت بشتكي دايما من الم فظيع في جنبي اليمين ايام البيريود والالم ده كان بيبدأ قبل البيريود ماتزل على طول وبيزيد مع زيادة نزول الدم ويبدأ يخف لما الدم يبدأ يخف …
المهم روحت كشفت واتصدمت جدااااااااا الدكتور قالي ان عندي كيس شيكولاته على المبيض اليمين وحجمه حوالي 5 سم وماقليش تفاصيل عنه وقالي اتجوزي ولو ماحصلش حمل بعد 3 شهور تعالي اشيلهولك بعملية…
طبعا مااكتفتش بكلامه ورحت لاكتر من دكتور وللعلم كلهم دكاترو كبار اساتذة في الجامعة واجمعوا على تفس التشخيص اللي هو :
ده كيس شيكولاته ناتج عن مرض البطانة المهاجرة والعلاج الوحيد الحمل لو حصل جمل هايضمر لوحدة وكل شئ هايبقا تمام , لو ماحصلش في حلين تانييين يااما عمليه واشيله يااما اخد حبوب منع الحمل فترة 6 شهور عشان الكيس يضمر ويحصل حمل….
فاتجوزت وماحكيلكمش عن شعوري كان ازاي كانت فرحتي ناقصة وشيلت هم الحمل بدري اوي … الحمدلله على كل حال
فضلت استنى الحمل بفارغ الصبر شهر ورا شهر ومفيش حمل
والمشكله ان الحلين اصعب من بعض لاني كنت يترعب من العمليات وبرده مش عاوزة اخد حبوب منع الحمل على امل يحصل حمل …
وقعدت على الحال ده لمدة سنة وبعد السنة قررت اني اعمل العمليه المهم نسيت اقولكم اني في خلال السنة دي طلع لي كيس دم تاني على المبيض الشمال ….
وروحت لدكتور عشان اعمل العملية قالي هانفتح قيصرية احسن قولت تكالي على الله اهه كله يهون .
وعملت العملية والدكتور بعت عينة من الاكياس دي تتحلل في معمل باثولوجي ………. والنتيجة انهم مجرد دم لا بطانة مهاجرة ولا اي نوع من الاورام الحمدلله.
طبعا فرحت اوي لاني كنت قريت كتير عن البطانة المهاجرة دي وعرفت اد ايه انها مرض بايخ ربنا يزيح عن كل مريضة يارب ويرزقها الذرية الصالحة …
الدكتور قالي بعد العمليه كله تمام وروحي ان شاء الله تحملي في خلال ست شهور لو ماحملتيش تعالي اعملك حقن مجهري…
طبعا مارتحتش للكلام ده لانه ماقليش ايه سبب تكوين الاكياس دي ودورت كتير على النت مالقتش لها سبب غير البطانة المهاجرة..
المهم فضلت في نفس المعاناة اولا الام البيريود الغير محتمله لسة مستمرة معايا وشهر ورا شهر مابيحصلش حمل… والمفاجاة لما روحت اتابع التبيوض بعد العملية لقيت اكياس طلعتلي بس المرة دي اكياس مرة…
طبعا ماطمنتش وقولت اكيد في سبب عندي ماحدش عارف يوصله وفضلت اسال على دكتور عقن كويس بقا المرة دي لاني كنت بروح لدكاترة نسء وولادة عموما مش شرط تخصصهم يكون في العقم ..
المهم واحدة قريبتي قالتلي على دكتور في طنطا مع العلم اني من اسكندرية وروحتله وهنا بديت مرحلة جدية من التشخيص والعلاج….
الدكتور من كلامي قالي حالتك دي حاجة من اتنين يااما بطانة مهاجرة وده هانستبعدة لاني عملت تحليل للكيس
يااما التهابات شديدة في الحوض بتخللي البويضة بدل ماتفجر الكيس بتاعها وتطلع بتفضل تنزف جوه الكيس لغاية ماتعمل كيس دم….
وان التشخيص التاني هو الاقرب للصح وخاصة بعد ماكشف عليا كشف نسا ولقى الالتهابات مبهدلاني وعاملالي صديد وقرحة في عنق الرحم وعلى فكرة دي كان اول دكتور يكشف عليا نسا
وطبعا ده معناه ان قرار الانتظار في اول الجواز انه يحصل حمل ده قرار غلط لان عندي التهابات فظيعة في الحوض حتى لو عملت حقن مجهري ميت مرة مش هاينجح وده طبعا كلام الطب والعلم
فضلت اخد علاج للالتهابات كورس قوي جدا 9 حقن كلافوران ومحاليل فلاجيل لمده 3 شهور وبرده مفيش فايدة .. الاتهابات مش راضية تروح
فالدكتور طلب مني تحليل اسمه تي بي بيتحقن حاجة تحت الجلد في ايدي وبيكشف على بعد كام يوم..
والنتيجة كانت موجب وده بقا بتاع ايه ؟
ده لاني ماجيتش على العلاج بتاع الالتهابات اللي بتعالج انواع البكتيريا المشهورة فشك فنوع ميكروب معين ان هو اللي عملي الالتهابات وفعلا طلع عندي
والعلاج بتاعه كان كورس ست شهور اقراص بس مش فاكرة اسمها …..
المهم اني اتعالجت واتحسنت الحمد لله بس ماحصلش حمل برده لاني حصلي التصاقات فظيعة من الالتهابات اللي كانت عندي واتاخرت في علاجها
انا اسفة اني طولت عليكم بس خايفة يكون في بنات كتير تايهين زي ماكنت تايهة ويدخلو في متاهة عمليات وتوقيف بيريود والسنين تضيع من ايديهم على الفاضي وهما اصلا التشخيص بتاعهم غلط مش بطانة مهاجرة …
يارب اكون فيدتكم يارب
يارب ياارحم الراحمين يرزقني واياكم الذرية الصالحة عاجلا وليس اجلا
ادعولي بقا لاني هابدأ في محاولة حقن مجهري للمرة التانية كنت عملتها مرة وحملت بس البيبي ماكملش..
ملحوظة : اللي عاوزة اسم وبيانات الدكتور اللي عالجني تبعتلي على الخاص وانا ابعتلها
فرحة قريبة فرحة قريبة فتكات هايلة Fatakat 511951 الجيزة – مصر