السلام عليكم ورحمة الله وبركاته
انا من فترة قريت الموضوع ده لفتوكة معانا هنا ربنا يكرمها يارب
علاج الاكياس الدهنيه في العين ان شاء الله
انا جربت حب الرشاد والحمد لله الكيس اللي كان مدوخني بقالو شهور وعملتلو عملية ورجع اتملى تاني راح نصه تقريبا
ما شاء الله لا حول ولا قوة الا بالله ده اكنو سحر
وحقولكم تجربتي بالزبط
انا بيطلعلي الاكياس الدهنية في عيني من حوالي 11 سنة على فترات بعيدة واخر سنة طلعولي كذا مرة واتهريت ادوية وعمليات
والدكتور قالي ان في مرحلة مش حنقدر نعمل عمليات عشان جفن العين حيرق ويرتخي..انا لسة الحمد لله ما حصليش كده
فخفت من كلامو وعملت عملية في عيني اليمين عشان كان الكيس كبير اوي وما روحتش عملت الشمال
واللي عملت فيها العملية رجعت ملت تاني وكانت حالتي النفسية زفت
بس قبل ما اعمل العملية كنت قريت موضوع حب الرشاد ده بس خفت اجرب لان بردو الواحد يخاف يحط حاجة في عينو بصراحة
ولما فشلت العملية والدكتور قالي الكلام اللي يخوف ده فتحت الموضوع تاني وقريتو..ودورت على موضوع البنت الخليجية اللي صاحبة الموضوع عرفت منها وقريتو بردو واطمنت بصراحة
ورحت اول امبارح جبت حب الرشاد شوية كده ب جنيه طلعو كتير اوي ..من فتح الله ماركت عندنا في اسكندرية وطلع مشهور اوي وكل العطارين عارفينو
واخدت 3 حبات منو وهو صغير اوي اصغر من السمسمة..وقلت اجرب في عيني اليمين اللي عملت فيها العملية لان الكيس فيها اكبر وحقدر الاحظ اي تغيير يحصل
وفعلا اخدت ال3 حبات وحطيتهم في جفني من تحت..لاني قريت ان حتى لو الكيس في الجفن العلوي ممكن تحطي الحبات في الجفن السفلي
وقفلت عيني ونمت..وشوية صحيت لقيت الحبات طلعين من عيني ومش حواليهم دهن كتير زي ما كنت متصورة
توكلت على الله وحطيت 3 تانيين تحت الجفن العلوي..
اه صحيح حسيت بوجودهم بس صبرت..ربع ساعة كده ولقيت نفسي مش حاسة بيهم ونمت
لما صحيت بعد ساعتين لقيتهم نزلو في الجفن السفلي وطلعتهم بايدي بعد ما غسلتها كويس
ولقيت كمية دهن حواليهم بطريقة جامدة وكان الدهن شفاف مالوش لون
دققت في عيني بقا عشان اشوف الكيس فش ولا لأ..لقيت ايه
الكيس نزل نصو تقريبا لولولولوليييييي
وده بعد ساعتين بس ما شاء الله..لاني للاسف اضطريت اقوم عشان ابني صغير 5 شهور ومش بيخليني انام اكتر من ساعتين على بعض ربنا يهدهولي
اومال لو كنت نمت الليلة كلها بيه
وجيت جري ابلغكو النتيجة
وامانة يا بنات اللي تجرب تحكي تجربتها والله دي معاناة وانتو كده حتشجعو غيركو يجرب ويترحم من قرف العلاج والعمليات واللي ممكن تؤدي لتشوه الجفن زي ما قلتلكو
وبجد مش عارفة اوفيكي حقك ازاي ا يا صاحبة الموضوع ده انا حدعيلك طول حياتي والله ربنا يكرمك
ياريت التقييم يا بنات عشان اكبر عدد يشوف الموضوع ده باذن الله
تحذير هام:
حب الرشاد لا يستعمل اكتر من ليلتين..وبعدين تريحي عنيكي ليلتين..وترجعي تكملي علاج بيهم تاني حسب تحسن حالتك..ده اللي عرفتو من قرايتي وبحثي
ليه بقا؟؟ لانو بينزل الدهون الزيادة في العين وبالتالي لو ماريحتيش عنيكي عنيكي ميتها حتنشف اوي وده مش كويس لان المية دي بتحمي قرنية العين..اللهم بلغت اللهم فاشهد
AyA AyA 207601_2.gif فتكات متميزة Fatakat 207601 Alexandria – Egypt