ازيكوا يا رواد قسم الرشاقة .. ان شاء الله نكون كلنا مستمرين فى الريجيم عشان نوصل للى نفسنا فيه
انا هعرضلكوا شوية تقنيات عشان نحافظ على الريجيم بتاعنا وعلى وزننا التقنيات دى من تجربتى وخبرتى المحدودة مع الدايت
نبدا بسم الله :
1. اهم حاجة زى ما كلنا عارفين فى اى نظام تخسيس الارادة وضيفى عليه تحديد الهدف .. يعنى حطى لنفسك هدف وصممى توصليله
2. قبل ما تبداى دايت ابداى بتغيير نفسك وعاداتك الغذائية يعنى بلاش تاكلى لمجرد الاكل وخلاص كلى لما تكونى جعانة وعودى نفسك عالصبر عشان مش هتخسى بين يوم وليلة وكمان المواظية عشان تقدرى تحققى النتايج اللى عايزاها
3. بالنسبالى التلاجة هى اهم عامل فى نجاح او افساد النظام الغذائى خصوصا لو كنتى من النوع اللى بياكل عشان زهقان او مضايق او كل ما تفتحى التلاجة لازم تشدى حاجة .. يبقى تبداى بتنظيم التلاجة اولا شيلى اى حاجة ممكن تكون مغرية بالنسبالك وشيلى كل الاكل الغير صحى يعنى مثلا استبدلى الحلويات بخضروات وفاكهة واذا كان فيه ناس معاكى فى البيت , خصصى لنفسك مكان محدد فى التلاجة هو دة بس اللى تاكلى منه ركنك الخاص فى التلاجة المفروض يكون فيه منتجات البان زبادى وجبنة ولبن بس من غير دهون او سعرات وطبق كبير جهز فيه خضار وفاكهة مقطعين وطبعا الخبز البنى (من دقيق القمح الكامل ) مش الخبز الابيض
4. قسمى دايما وجباتك وكليها على فترات دة بيساعد جهاز الحرق انه يشتغل احسن
5. متتعشيش وتنامى على طول ادى فرصة لجسمك يهضم وجبة العشا ويحرقها
6. اشربى مية كتير مش اقل من 8 اكواب فى اليوم .. ودايما شرب المية قبل الاكل مش بعد الاكل
7. استبدلى اى اكل متحمر بزيت او سمنة باكل مسلوق او مشوى
8. عودى نفسك على تقليل كمية اكلك تدريجيا لحد ما تتعودى على الاكل القليل
9. خصصى يوم محدد فى الاسبوع عشان لو فيه حاجة نفسك تاكليها خليها فى اليوم دة .. مش معنى كدة ان لما اليوم دة يجى تاكلى كل اللى انتى عايزاه لا.. اليوم دة بس عشان لو فى اى حاجة نفسك تاكليها وخايفة تيوظى نظامك
10. لو نفسك فى حلويات او حاجة ممنوعة عليكى مثلا .. ممكن تاكليها بس تاخدى حتة صغيرة جدا وتاكليها براحة اوى وتتلذذى بيها وانتى بتاكليها ..فعلا بتحسى بطعمها وبتشبعى من جزء قليل
11. اهم حاجة طبعا الالتزام بنظامك الغذائى .. وحاولى جنب النظام تمشى كل يوم .. وبلاش تمارين من نفسك لو كانت لياقتك البدنية مش عالية او مبتعرفيش تعملى تمارين
وان شاء الله ربنا معانا كلنا .. ونوصل للى احنا عايزينه ونخس بصحة
heidi heidi 94757_4.gif ممنوعة من المشاركة Fatakat 94757 القاهرة – مصر