برجر الفراخ المدخن مع شوي تكات فى طريقه تسويته وتشكيله هتخليه ماشــاء الله احلى برجر
وانضف واضمن من الجاهز كمان
ندخل على الصوره النهائيه ان شاء الله وبعدين ندخل على الطريقه بالتفصيل الممل
المقادير
4صدور فراخ مخليه+ورك مخلى (بيدى طراوه للصدور جميله)
بصل مبشور ناعم
معلقتين بقدونس
3معالق بقسماط
2بيضه
قرن فلفل اخضر مقطع صغير جدااا
فصين توم مفرومين ناعم اووى
ملح وفلفل وبابريكا وبصل بودر
هنفرم كل المكونات فى الكبه لغايه ماتمتزج ببعضها كويس وتبقى ناعمه جدا ولو حسيتى ان العجينه لينه اووى زياده عن الزوم ممكن تزودى بقسماط بس مش كتير لان البقسماط هيخليه ينشف ويبقى طعمه مش لطيف
هى كده كده العجينه بعد الفرم بتبقى لينه ومع الخطوات الجايه ان شاء الله هقولك تتعاملى معاه الزاى
ده شكل الفراخ بعد الفرم نحطها على بلاستيك راب ونقفلها كويس
هنا الفراخ بعد ماغلفناها كويس بالبلاستيك راب تدخل التلاجه بقا ترتاح لان حاليا هيبقى صعب التعامل معاها هتبقى عجينه رخوه جدا صعب التشكيل نسيبها فى التلاجه حوالى ساعه تقريبا ترتاح
بعد مانطلعها من التلاجه هنفرد على الرخامه بلاستيك راب ونحط فوقها بلاستيك راب تانى ونفرد بالنشابه براحه جدا ونبقى حذرين عشان متبقاش رفيعه من ناحيه وناحيه تانيه تخينه وخدى بالك ان العجينه برضه هتبقى رخوه نوعا ما برضه بس مش زى الاول يعنى هتعرفى تتحكمى فيها بإذن الله نفردها بسمك 1 سم تقريبا
انا هنا عملتها على 3 مراحل عشان اعرف ادخلها الفريزر ومتتكسرش منى لانى عيزاها تبقى مفروده كده زى ماهى
تكايه مهمه بقا :
تدخل الفريزر بقا لغايه ماتتجمد خالص شايفين شكلها هنا عامل الزاى تحسوا انها طريه جداا تعالوا نشوف بقا الفرق بعد ماطلعت من الفريزر
ودى بقا بعد ماخرجت من الفريزر واتجمدت هنسيبها حوالى 3 دقايق كده تفك بسيط بس مش تفك خالص عشان نعرف نشكلها لانها لو فكت خالص هترجع عجينه لينه جدااا ومش هتعرفى تتحكمى فيها نجيب بقا القطاعه الدواير وتقطعى البرجر بتاعك ولو مفيش قطاعه اتصرفى بغطا اى علبه عندك وده الى انا عملته لان معنديش قطاعه بالحجم اللى انا عيزاه
تكايه بقا مهمه
طبعا لما نيجى نقطع ارلبرج هيتبقى الاطراف اللى حوالين الدايره هنعمل ايه بقا
عندك حلين ياما تقطعيها مينى برجر بحجم اصغر او انك تسيبيها تفك خالص وترجعى تفرديها وتدخليها الفريز وتعيدى تشكيلها من اول وجديد زى او مرحله خالص تمام كده
تكايه مهمه جدا
اوعى تسيبى البرجر يفك التلج منه خالص شايفين لما قطعته لسه متجمد زى ماهو عش اناعرف اتعامل معاه
بعد مانشكل البرجر ندخله الفريزر تانى يرتاح شويه او ممكن تسويه علطول بقا مفيش مشكله بس الافضل يرتاح ربع ساعه كده كمان عشان تضمنى ان شاء الله انه يفضل محتفظ بشكله وحجمه اثناء السوى
معلشى هو لازم العجينه بعد كل مرحله ترتاح عشان نقدر نتحكم فيها وتدينا نتيجه جميله ان شاء الله
وده مينى برجر عملته برضه
تكايه مهمه جداا
بعد ماخلصنا البرجر بتاعنا نحط بين كل برجرايه ورق زبده او اكياس تلاجه اللى بتبقى متقطعه دى ودى الافضل عشان مش هتلزق منك ولما تيجى تطلعيها هتطل بمنتهى السهوله معاكى ع عكس ورق الزبده لما تدخليه الفريزر وتيجى تشيليه من ع البرجر هيغلبك شويه
هما الاتنين شغالين ورق الزبده او اكياس التلاجه بس انا بقولك الاسهل ليكى
طريقه التسويه بقا
ممكن تقليه او تشويه والافضل انه يتشوى
تكايه مهمه جدا فى التسويه ندهن الجريل او طاسه تيفال عندك زيت بسيط ونسيبها تسخن يعنى لما نيجى نحط البرجر يعمل طششششش عشان ياخد صدمه ويقفل المسام وميخرجش العصاره بتاعته وتبقى بتاكلى عجينه برجر وبعدي ماياخد الصدمه تخلى النار تبقى متوسطه ومتقليبهوش غير لما الجنب الاولانى يكون استوى عشان لو قلبتيه وهو لسه مستواش من الجنب الاولانى هتضيعى ملامح البرجر خالص والعجينه تشكيلها هيضيع لاقدر الله يعنى ومتقلقوش الفراخ بتستوى بسرعه يعنى مش هتحتاجى تدخليها الفرن بعد الجريل
وده شكله بقا بعد ماستوى بجد ماشـاء الله طعمه جمييل
وفى تكايه بقا اختيارى
كلنا متعودين ناكل برجر عادى سواء فراخ او لحمه طب ليه منجددش وناكل برجر مدخن بريحه الفحم انا بعد ماسويته حطيته فى صينيه وفردته جنب بعضه وحطيت فى وسطه فحمه وغطيتها تاخد ريحه الفحم بجد كان ماشاء الله طعم مختلف وجميل
تكايه مهمه ليه انا قولت صينيه عشان لو حطينها فى حله او حاجه ضيقه هنضطر نحطه فوق بعضه ودخان الفحم هيخليه يعمل ميه ويبقى كأنه مبلول كده ومعجن
واخيرا وليس اخراً ان شاء الله لو عجبتكم الاكله مش محتاجه منكم غير دعوه حلوه بظهر الغيب
ان ربنا يقر عينى بما اتمنى ويريح قلبى ويسعدنى
فى رعايه الله يافتوكات مواضيع هذا القسم برعاية
angelsmile2311 angelsmile2311 963758_5.gif فتكات رائعة Fatakat 963758 my home – egypt