السلام عليكم يا حبايب قلبى
وحشتووووووونى كتير
انهارده جبتلكم بدنجان بالبشاميل بس والله يجنن يهبل
تعالو نشوف المكونات والطريقه سوا سوا
المكونات
بدنجان كبير
فراخ فيليه
لسان عصفور
بصله
طماطم
بشاميل ولبن
توابل ( ملح- فلفل – زنجبيل )
الطريقه
نقسم البدنجان بالطول ونقوره ونرش عليه ملح خفيف ونرصه ف القارب وندخله الفرن
نقطع البصله ونقلبها فى زيت بسيط لحد ما تدبل مش تتحمر
نقطع الفراخ ونشوحها مع البصل ونحط الملح والفلفل والزنجبيل
ونقلب الفراخ لحد ماتدخل فى السوى
نبشر الطماطم ونحطها على الفراخ والبصل ونزودها شوية مايه ونحط عليهم لسان العصفور
نجهز البشاميل انا بجيب بشاميل فاين فودز لما اكون مستعجله وادوبه فى اللبن الاول كويس بعدين احطه على النار وافضل اقلب لحد ماوصل للسمك اللى انا عيزاه وانا هنا مش عيزاه سميك عيزاه خفيف شويه لان البدنجان لسه حيكمل سواه فيه
لسان العصفور خلاص استوى ومبقاش فى اى صوص
نطلع البدنجان ونحشيه بخلطة الفراخ ولسان العصفور وقلب البدنجان اللى طلع فى التقوير نفرشه فى الاماكن الفاضيه فى الصينيه نحط عليه بقى الخلطه وبعدين نضيف البشاميل وعالفرن
تقريبا بيقعد نص ساعه فى الفرن وهنا لما طلع من الفرن بس معلش نسيت اصوره قبل التقديم كنا متنا من الجوع هههههههههههههه
ومعلش الصور عموما مش حلوه لان موبايلى خلااااااااااااااااااااص بيودع
بجد يا جماعه جربوه حيعجبكم جداااااااااااااااااااا وينفع فى العزومات وبالنسبه للحشو ممن تغيرو فيه براحتكم ممكن بدل الفراخ ولسان العصفور لحمه او خضار او حشو البيتزا زى ما تحبوو
متنسونيش من دعواتكم والتقييم فى ايدكم بالمره
وبالف هنا وشفا
مواضيع هذا القسم برعاية
sparkel sparkel 131471_2.gif فتكات هايلة Fatakat 131471 الاسكندرية – مصر