السلام عليكم ورحمة الله وبركاته
انا كنت اخدت رأيكوا اروح للممرخه ولا لأ ومعظمكوا قاللي جربي بعد ما صديقتى السعوديه كانت دايخه علي علاج للتكيس وهرمون الحليب وبرضه مكنش فى فايده وسبحان الله راحت للست دى الشهر اللي فات وربنا كرمها وحامل اهى ربنا يتملها علي خير ده طبعآ كله بتاع ربنا ..انا قلت اروح واجرب وفعلآ رحت النهارده
زحمه فظيعه جدآ عندها وسيارات كتير جدآ ودخلت جوه اخدت رقم واستنيت دورى كان رقمى 18 الحمد لله وجه بعدى ييجى 50 واحده وده كله هى بتفتح من بعد العصر للمغرب واللي يلحق دخلت اسأل الكشف بكام قالوا بس خدى رقم وبعدين الحساب اخدت رقمى واستنيت ودخلت علي الست دى ماشاء الله وشها منور هى عجوزه ربنا يديها الصحه المهم قالتلي نامى علي ضهرك ..نمت ادامها وغطتنى وبعدين كشفت عليا حطت ايدها علي بطنى وبعدين اتكت كده لقيت حاجه وجعتنى اوى جوه كأنها عارفه المكان بالظبط وقالتلي عندك تكيسات وضعف تبويض بعد طبعآ 10 دقايق تحسيس علي بطنى من تحت كده عند عضم الحوض وفوق شويه وبعد كده قالتلي عندك هرمون الحليب عالي المهم قالتلي ادخلي جوه بنتى هتعملك تدليك دخلت جوه لقيت ستات كتير ممددين وبيتعملهم تدليك للبطن نمت وبعدين جت دلكتنى وقالتلي التدليك ده عشان الرحم بتاعك مايل وانى هروح بكره وبعده كمان اعمل تدليك تانى وكان جنبي واحده بتعمل كاسات هوا كده علي بطنها وفيها حاجات كده دى قالتلي عشان عندها ارتخاء فى عضلات الرحم بيعملها سقط علطول وواحده تانيه كانت بتعمل حجامه المهم التدليك ده كان مريح جدآ ومكنتش عاوزه اقوم هو بيبقي بزيت كده .خلصت وقمت لقيتها ادتنى كيس كده في خلطه وقالتلي اخد معلقه علي كوبايه حليب كل يوم مرتين من اليوم الرابع للدوره لمده 10 ايام وكمان ادتنى زيت كده قالتلي للالتهابات وكمان سبحان الله بيسلك الانابيب واحط منه 2 ملم ونص وانام علي ضهرى وقالتلي عشان التهابات زوجى يشرب مر كل يوم علي الريق وانا كمان ..وبقولها احاسب فين طيب وكام الحساب قالتلي بعدين روحى بس ولما تييجى تانى وانا عارفه اصلآ ان كشفها غالي وعلاجها وطبعآ سألتها قلتلها طيب الخلطه دى إيه قالتلي ده تعب سنين مينفعش اقوله كده يبقي مجهودى راح والله كان نفسي اعرف عشان اقولكوا بس اللي شفته جوه الخلطه وعرفته الكمون والسمسم والبردقوش الباقي بقي معرفتهوش عشان مطحون
انا ارتحت نفسيآ جدآ لان سبحان الله كل الناس اللي راحولها حملوا بعد فضل ربنا طبعآ وانا اول مادخلت ارتحت نفسيآ جدآ ونفسي ربنا يجعل فى ايديها الشفا وادينى بجرب الحاجات الطبيعيه ومش خسرانه حاجه علي فكره الست دى اسمها ام ممدوح مسمينها جوهره حفر الباطن ومشهوره فى الخليج وعلي فكره المغتربات فى اى حته اكيد موجود ممرخات كتير
وانا بإذن الله هتابعكوا بالأخبار اول بأول والتطورات عشان اشوف بجد ممكن نتعالج بالأعشاب بعيد عن الادويه والكيماويات ولا لأ وربنا يكرمنا جميعآ وادعولي يابنات
اه ونسيت اقولكوا لازم اللي تروح تروح وهى عليها الدوره ويبقي تانى يوم للدوره عشان التدليك
nona 7iaty nona 7iaty 854485_7.gif فتكات رائعة Fatakat 854485 السعوديه – السعودية