ازيكم يا حبيباتى يارب تكونى بخييييييييييير
اولا نبدا بالصلاة والسلام على سيدنا محمد صلى الله عليه وسلم
ثانيا متنسوش التقييم لو عجبكوا الموضوع تقديرا للمجهود بس مش اكتر وكل فتوكة وذوقها
نبدا الاكلة بتاعتنا طبعا عارفين ان كل الشباب والاطفال بيحبو اوى الكريب احنا هنعمله فى البيت هيكون اوفر وانضف بكتيييييير وتعمليه بالطعم اللى يعجبك وفى نفس الوقت سهل جدا ومش بياخد وقت ولا مجهود ولا حتى مقادير كتير
اولا العجينة:
كوب ونص دقيق فاخر منخول
نص لتر لبن
2 بيضة كبيرة
معلقة صغيرة سكر
ذرة ملح
معلقتين زبدة سايحة
ثانيا الحشو:
لحمة مفرومة متبلة ومعصجة
طماطم قطع
فلفل اخضر او الوان قطع
جبنة رومى او موتزاريلا مبشورة
زيتون مخلى
كاتشب ومايونيز
شوفتو المقادير سهلة ازاى وموجودة فى كل بيت والكمية دى تكفى من10 الى12 واحدة على حسب سمك العجينة اللى هتعمليها
الـطــريـــــقـــــــــــة:
نحط كل المكونات فى خلاط الطماطم ونضرب كويس ونتاكد ان مفيش اى كلاكيع خالص
وبعدين نسيب العجين فى التلاجة نص ساعة ترتاح لحد مانحضر الحشو
وادى الطاسة التيفال مقاس 30 اللى عملت فيها
هناخد كبشة من العجين بس مش مليانة اوى وتكون الطاسة سخنة ويادوب ممسوحة زيت اول ماتحطى العجينة تمسكى الطاسة وتلفيها فى كل الاتجاهات عشان توزعى العجينة بسرعة فى كل الطاسة وخلى بالك كل ما العجينة تكون خفيفة ومش تخينة بتكون مقرمشة ولذيذة واحلى بكتير
وترفعى العجينة من الطرف زى الصورة ولما تاخد اللون الدهبى تقلبيها
شابفة لونها جميل ازاى ونفس الكلام الناحية التانية
وتتنيها نصين زى كدا وتحطى بقى الكاتشب والمايونيز
ثم اللحمة المفرومة
وبعدين الفلفل والطماطم والجبنة
ونطبقها بالشكل دا
وبعدين تحطيها فى الطاسة السخنة وتقلبيها على الناحيتين
وادى الطبق النهائى
وحطيته فى ورق فويل زى الجاهز ودا لكل الحلويين اللى هيردوا ويقيموا
والله اخواتى مش مصدقين انه اتعمل فى البيت من كتر طعامته وجربوه وان شاء الله يعجبكو وتدعولى
مواضيع هذا القسم برعاية
دكتورة دودى دكتورة دودى 270495_5.gif فتكات هايلة Fatakat 270495 المنيا – مصر