السلام عليكم يا بناتيت
انا حبيت اشاركم تجربتى و معاناتى و ماساتى و صدماتى و نجاحى مع الدايت على مدار 3 سنين
اولا اعرفكم بشخصية اختكم كانت عاملة ازاى انا اللى بيتقال عليها ( كئيبة عشان تخينة و تخينة عشان كئيبة )
كنت البنوتة المانيكان فى المدرسة لغاية ثانوى و اللى كان الكل بيحلف بجسمها لغايت ما اتغرت و مابقتش تاخد بالها من جسمها و هوووووووووووب لقت نفسها من 55 ل 70 و طنشت و لقت نفسها على 80 و استهبلت و لقت نفسها على تانى سنة من الكلية 87 طبعا جالى اكتئاب انى بقيت كده و بقى كل تعليق حلو على جسمى اتحول لانتقاد و بصة قرف من اهلى و اللى حواليا و كنت بدى ودنى ليهم و اكتئب اكتر (خدى بالك معايا من نقطة بدى ودنى ليهم عشان حكلمك فيها بعدين) و بقيت اقف قدام المرايا استحقر شكلى (بالمناسبة انا جسمى جسم الكمثرى يعنى مليانة من تحت و رفيعة من فوق ) فلكى ان تتخيلى 87 كيلو من تحت كنت شبه القلة بالظبط …
رحت لدكتور رجيم و فرحت اوووى و خسيت معاه اول اسبوع 6 كيلو لانى كان عندى هاجس انى اخس بسرعة اوووى (خدى بالك معايا من النقطة دى برده) .. مقدرتش اكمل لانى كنت بموت من الجوع و حسيت بضعف و رجلى مكنتش بتشلنى .. رجعتهم تانى فى اسبوعين و رحت لدكتور تانى و تالت و رابع و بنفس تفكيرى ده و النتيجة فشل و فشل و فشل …
لغاية ما قررت انى اغير طريقة تفكيرى الاول من الدايت و جسمى و كل حاجة و طبعا قعدت عملت سيرشات من على النت اكتر من مذاكرة حياتى كلها : اشى دايت و اشى رياضة و اشى يوجا و اتوصلت لحاجة واحدة : انا بس اللى اقدر اغير جسمى و بأرادتى
فبدأت اعالج و اواجه مشاكلى ف الدايت و اللى هيا :
1- مش بتاعت الاكل السيكى ميكى و بحب اكل …… كل اللى عملته قللت فى اكلى و الله اكلت محشى و فتة و بيتزا و كل حاجة بس عينات (2 قطعة بيتزا بس و لو محشى (كام صباع مايزدوش عن 10) و الفتة (رز مسلوق و الشوربة شايلة دهونها و الزيت ما يزدش عن معلقة )
يعنى بأختصار اكلت كل حاجة بس بطريقة صحية و كانت النتيجة : أ-العيش الفينو بدلته بالعيش البلدى (نص رغيف فى اليوم اول شهرين) و بعدين (عيش توست سن مرتين فى اليوم مع الفطار و الغدا و يوم واحد فى الاسبوع اكل فيه رغيف بلدى زى مانا عايزة )
ب- قللت الزيت جداااااا و اكلى بقى خفيف و صحى ..الاول مكنتش حابة طعمه بس اتعودت عليه
ج-النشويات (رز مسلوق و مكرونة مسلوقة و مايزدوش عن مرة فى الاسبوع و بكميات صغيرة)
د- السلطة و الخضار بقت هى الوجبة الاساسية و بزود فيها لغاية ما اشبع
ه- قسمت اكلى ل5 وجبات فى اليوم (3 وجبات اساسية :فطار و غدا و عشا) و وجبتين سناك (ثمرة فاكهة او عصير بيور او طبق سلطة صغير او قطعة شيكولاتة وااااااحدة بس من اللى هى ماتتشافش فى الايد دى ) .. فطارى كان عبارة عن عيش توست او ربع رغيف بلدى + بيضة مسلوقة /فول من غير زيت/ معلقة مربى دايت + جبنة قريش /جبنة دايت + كوباية شاى بلبن خالى الدسم او سادة ( من غير سكر او بسكر دايت )
غدايا كان عبارة عن الاكل اللى موجود فى البيت بس مطبوخ بطريقة صحية زى ما قلت لكم و بكميات صغيرة + طبق سلطة اخضر +عيش توست سن بس مش كل يوم
العشا : اخرى الساعة 9 عشان معدل الحرق فى الجسم بيقل بليل و كنت بتعشى جبنة قريش /بيضة مسلوقة /زبادى دايت
و طبعاااااااااااااااااا يوم فرررررررررررررررررى بس وجبة واحدة بس
2- مشكلة انى دايما عايزة اخس بسرعة : طبعا من تجاربى الكتيرة السريعة اكتشفت ان الخسية بسرعة مصيبة بمعنى الكلمة لانها بتخليكى بتضعفى بسرعة و كمان بتتخنى تانى بسرعة .. ده انا كنت برجع اكتر من الاول لو وقفت اسبوع فصبرت على نفسى و بقيت لما اشوف نفسى خاسة كيلو واحد بس على الميزان اصبر نفسى و اقول برااااافو يا بت على الاقل اسمك خسيتى برده و بكره حيبان و كانت بتعدى عليا الاسابيع المشئومة اياها بتاعت زيرو كيلو كنت برده بتماسك و ااقول اكيد جسمى اتعود يبقى لازم اغير حاجة فى اكلى و ما اقلقش ان شاء الله حوصل هدفى و فعلا يا بنات و الله اول ما غيرت طريقة تفكيرى دى ارتحت نفسيا و تقبلت نفسى اكتر
3-مشكلة الوزن اليويو : انا اليويو نفسه جسمى الشهر ده مثلا 80 و كمان 5 شهور 70 و بعد 3 شهور 75 !! وزنى مش بيثبت و طالع نازل نازل طالع .. فى نفس ذات المعاناة اكتشفت خير اللهم ما اجعله خير انى المسئولة عن البلوة دى .. لانى اول ما بسيب الدايت ارجع اكل اللى قدامى تانى فطبيعى حتخن بس الحمدلله مكنتش برجع زى الاول مهمها كان عشان خسيت براحة
عالجت المشكلة دى انى اخدت الدايت ده اسلوب حياة و مش لمجرد وقت مؤقت بس و بقيت لما اسيب الدايت خااالص ( اعمل حسابى فى يوم دايت ف وسط الاسبوع و متعشاش اليوم اللى اهبل فيه جامد ) او ادخل ف اكلى الحاجات اللى بتزود معدل الحرق زى : الرياضة و الشاى الاخضر و البهارات و خاصة الكركم و الشطة و كنت بشرب على الريق كوباية مية سخنة او فاترة و عليها ليمونة و معلقة عسل .. و الحمدلله مبقتش بتخن لما اسيب الدايت …
4- مشكلة الرياضة : صراحتا صراحتا يعنى لسه محلتش المشكلة دى اوووى لانى و الحمدلله بكره الرياضة .. جتى خيبة بس بدأت بالمشى و المشى سحر … بيقوى قلبك و بيزيد من معدل حرقك و بيشد جسمك … امشى فى اليوم نص ساعة و شوفى جسمك حيبقى عامل ازاى .. و لو مش حتعرفى اعملى تمارين المشى فى البيت كان فى فتوكة ربنا يباركلها هنا منزلاها كل اللى جربها بيقول حلو جدا ….
5-اخر مشكلة اللى كنت قايلاها فوق : اوعى اوعى اوعى اوعى تدى ودنك لحد و تتأثرى بكلامه .. عندك ودنين عشان تسمعى و تطنشى اى اراء سلبية و حتخليكى تقفى .. كملى و ملكيش دعوة بحد و بكره فرجيهم على نفسك و انتى حلوة و سكر و مانيكان كده
اخر حاجة بقى عشان انا عارفة وجعت دماغكم بس و الله حبيت افيدكم على اد ما اقدر 
انا كنت 87 كيلو و بقت 65 كيلو دلوقتى و باقى على وزنى المثالى طبقا لطولى 10 كيلو امانة عليكم ادعولى انى اوصل لهدفى على خير و صحة و ان ربنا يفرج كربى
و لو فى اى استفسار يا بنات اسألونى علطول
2 secret garden 2 secret garden فتكات متميزة Fatakat 1104753 مصر – مصر