السلام عليكم يا احلى بناتيت فى الدنيا
انا فى اشد فرحتى لانى بالصدفة النهاردة كنت بقرأ موضوع فى المدونة هنا و لقيت بنوتة كاتبة انها بدأت رجيم و اتشجعت جداااااااااااااااااااا من موضوعى الاولانى
اللى هو ده : https://fatakat.univanet.com/#5309474
ماتتصوروش فرحتى ان ربنا يستخدمنى لمساعدة البناتيت الحلوة (اللهم استخدمنى و لا تستبدلنى) و طبعا كلكم عارفيين اى استفسار انا تحت امركم
انا جيت بقى اقولكم تطوراتى
فى موضوعى بتاريخ 16 ابريل 2024 كنت 65 كيلو و كنت حاطة هدف ل 55 كيلو
اللهم لك الحمد حتى ترضى وصلت ل58 كيلو دلوقتى
اه مش بخس بسرعة بس برده راااااضية جدا لان ده معدل طبيعى طبيعى للنزول لان جسمى قل و بالتالى معدل حرقى قل … قعدت اسبوعين نزلت فيهم نص كيلو بس و الله ! مع انهم كانوا منصرمين و برياضة كمان بس طالما خسيت يبقى سوووووووووو وااااات المهم ان فى 500 جم راحوا خلاص ..
انا فى رمضان ماشية على نظام معتدل و خسيت فيه كمان الحمدلله و حقولكم تفاصيله و الدعوة عليكم يا سكرة منك ليها
الفطار : عصير دايت بيور او فريش من غير سكر
3 معلاق رز مسلوق او 4 معلاق مكرونة مسلوقة (من 3-4 ايام فى الاسبوع بس) + طبق سلطة خضرا محترم و كبير ( طماطم و خيار و فلفل الوان و جرجير و بقدونس و الذى منه ) + ربع فرخة مسلوقة بدون جلد او 2 شريحة لحمة مشوية او ترلى (خضار مشكل بدون دهون بقطعة لحم واحدة) او 2 شريحة كبدة مشوية بحجم كف اليد او نص كيلو سمك مشوى او نص ارنب مسلوق او ربع كيلو جمبرى مسلوق ( بتاكلى كل حاجة اهو مش بتحرمى نفسك ) + طبق ملوخية (التقلية تتحط فى الشوربة بدل من السمنة) او طاجن بامية معمول فى البرام و من غير زيت او طبق شربة خضار او سوتيه او سلطة زبادى
" يبقى فطارك عبارة عن عصير + سلطة + نشويات بكميات قليلة + بروتين + خضار = وجبة صحية و متكاملة و زيرررو دهون )
بعد الفطار بساعة بفضل اشرب مية على مدار الساعة كلها
بعد الفطار بساعتين ثمرة فاكهة او عصير فريش من غير سكر او كوباية شاى اخضر و يومين بس فى الاسبوع (كنافة فى حجم نص الكف او واحدة قطايف او اى حاجة حلوة بتحبيها )
السحور : واحدة توست سن او ربع رغيف بلدى + بيضة بلدى مسلوقة او معلقتين فول مدمس بدون زيت + معلقة كبيرة جبنة بيضا لايت + زبادى خالى الدسم بمعلقة عسل صغيرة + كوب شاى بلبن خالى الدسم غير محلى
و طبعا ما تنسوش الرياضة … انا و لله الحمد بجاهد نفسى و بعصر على نفسى فدان ليمون اخضر و فدان ليمون اصفر عشان العب رياضة و بحاول انتظم و بدأت بتمارين جيليان مايكل اللى دعيت عليها من قلبى 30 Days Shred و لانى دراعى كبيرة جدا و كانت بتخس بصعوبة اووى دخلت معاها تماريت عشر دقايق للدراعات و بدأت النتايج تظهر بعد شهر اه بسيطة بس فى نتيجة اسمها
يلا يا بنات اى استفسار انا معاكم و متنسوش دعوة حلوة ليا كده بفك الكرب و انى اكمل خسية بصحة و عافية و اخلص من فخادى و دراعاتى شوية بقى
فى امانة الله
2 secret garden 2 secret garden فتكات متميزة Fatakat 1104753 مصر – مصر