ازيكم يا بنات ؟
انا مش مخطوبة ولا متجوزه ولا حاجة بس عندي فكرة كدة و عايزة اعرف رايكم ايه
بصوا بقي بما ان الاسعار بقت نااااااااااار ….و الواحدة لما تيجي تتجوز بتفع هي و العريس مبالغ ضخمة جدا…. و ساعات لا قدر الله بعيد عن اي واحدة تحصل خلافات عالشبكة…. جتلي الفكرة دي :
ليه ماتبقاش الشبكة فضة؟؟؟؟؟؟
اشمعني ذهب؟؟
اصلا تعالوا نفكر بمنطقية : الشبكة دي اصلا المفروض العريس بيقدمها كهدية لعروسته….يعني القيمة كلها في الفكرة مش الحاجة المادية…. هي مجرد تعبير عن مشاعرة و عن قدر العروسة عنده
واحدة هاتقوللي : "طب ولما هي تقدير لقيمتي يقوم يجيبلي فضة رخيصة ؟ يعني هي دي قيمتي عنده؟ لا انا اتاقل بالدهب !"
انا معاكي عندك حق …. بس الواحد لازم يكون نظره اوسع شوية…. يعني هو لو مجبلكيش شبكة بالشىء الفلاني يبقي مابيحبكيش و مستخسر فيكي و مايبقاش ليه امان؟
ونسيتي بقي كل حاجة جابها للبيت …البيت اللي هايعيش فيه معاكي انتي….هايبني فيه حياته معاكي انتي
و نسيتي برده كل الاخلاق الحلوة و المشاعر الطيبة اللي بينكم… و نسيتي تعب اهله عشان يوفروا له الحاجات دي زي ما اهلك تعبوا….(انا و الله بنت مش ولد….فيه ناس ممكن تفتكر اني رجل عشان بدافع عنهم يعني..لا انا بنت زيكم)
نسيتي كل ده و افتكرتي انه وحش عشان مستخسر فيكي الدهب (اللي هو ثروة لوحده اصلا !)
طب ما تيجوا نمسك العصا من النصف ….نجيب شبكة حلوة بس يكون ثمنها معقول…هي المشكلة دلوقتي ان الدهب غالي جدا فالفلوس بتكفي حاجات ممكن تكون العروسة عايزة احلي و اكتر بس مش هاينفع….طب خلاص ! ماتيجوا نحاول نغير التقليد ده و نجيب الشبكة فضة . فضة؟!!! اه فضة! انتوا نسيتوا انها هي كمان معدن نفيس ؟ و ان غالبا اشكالها بتبقي احلي كتيييييييييييييييييير من الدهب؟ و في نفس الوقت سعرها مقبول و مش غالي بالنسبة للدهب….
و اكيد انتوا عارفين ان فيه فضة ايطالي و سويسري لونها اصلا دهبي و بجد لونها مش فارق عن الدهب !! و بعدين ليها ميزة : لو حد لا قدر الله ناوي يسرقك هايفتكرها اكسسوار !!!! بهزر طبعا
هاتقوليلي:" دي الناس تاكل وشنا كدة و يقولوا مستخسرين في بنتهم!!"
ليه ؟ هو انتي بتتجوزي عشان الناس؟ يا بنتي ماكيش دعوة بالناس الناس ماوراهاش غير الكلام! هاتاخدي منه ايه كلامهم؟ الفرح فرحك انتي و العريس جوزك انتي و الشبكة بتاعتك انتي…. لازم تكوني مقتنعة بان ده زوقك و عاجبك
(ده عموما يعني مش عشان الفضة ) يعني هي الناس لو قالت شبكتك مش حلوة هاتنزلي تاني يوم ترجعيها؟؟؟؟ لا طبعا!
عموما ده راي و احب انكم تشاركوني فيه…. هاه ايه رايكم ؟ انا عارفة ان فيه ناس كتير هاتقول عليا مجنونة…بس فكروا معايا كدة عشان مش نعقد الدنيا علي نفسنا . و ياريت نتفاعل عشان نعرف اراء كتير و نستفيد كلنا
nona nonos 91 nona nonos 91 469478_3.gif فتكات رائعة Fatakat 469478 القاهرة – مصر